ശബരിമല തീര്‍ഥാടകര്‍ക്ക് മെച്ചപ്പെട്ട ആരോഗ്യ ചികിത്സാ സേവനങ്ങള്‍ ലഭ്യമാക്കുന്നതിന് സന്നിധാനത്ത് ദേശീയ ആരോഗ്യ ദൗത്യം ഫണ്ടില്‍ നിന്നും തുക ചെലവഴിച്ച് നിര്‍മിച്ചിട്ടുള്ള ആശുപത്രി കെട്ടിടത്തിന്‍റെ പ്രവര്‍ത്തനോദ്ഘാടനം ഇന്ന് (16ന്) രാവിലെ 10ന് ആരോഗ്യ സാമൂഹ്യനീതി വകുപ്പ് മന്ത്രി കെ.കെ.ഷൈലജ ടീച്ചര്‍ സന്നിധാനത്ത് നിര്‍വഹിക്കും. ദേവസ്വം വകുപ്പ് മന്ത്രി കടകംപള്ളി സുരേന്ദ്രന്‍ അധ്യക്ഷത വഹിക്കുന്ന ചടങ്ങില്‍ രാജുഎബ്രഹാം എംഎല്‍എ സ്വാഗതം ആശംസിക്കും . ദേശീയ ആരോഗ്യ ദൗത്യം സ്റ്റേറ്റ് മിഷന്‍ ഡയറക്ടര്‍ കേശവേന്ദ്രകുമാര്‍ റിപ്പോര്‍ട്ട് അവതരിപ്പിക്കും. ആന്‍റോ ആന്‍റണി എംപി മുഖ്യപ്രഭാഷണം നടത്തും. 

    ജില്ലയിലെ തദ്ദേശ സ്വയംഭരണ സ്ഥാപനങ്ങളുടെ 2017-18 വാര്‍ഷിക പദ്ധതി പുരോഗതി വിലയിരുത്തുന്നതിനുള്ള യോഗം തദ്ദേശ സ്വയംഭരണ വകുപ്പ് മന്ത്രി ഡോ.കെ.റ്റി.   ജലീലിന്‍റെ നേതൃത്വത്തില്‍ 24ന് രാവിലെ 10ന് പത്തനംതിട്ട കിഴക്കേടത്ത് മറിയം ഓഡിറ്റോറിയത്തില്‍ നടക്കും.                                      (പിഎന്‍പി 3053/17)

അടുത്ത വര്‍ഷത്തെ (2018) റിപ്പബ്ലിക്ക് ദിനാഘോഷങ്ങളുടെ ഭാഗമായി നെഹ്‌റു യുവ കേന്ദ്ര യുവതീ യുവാക്കള്‍ക്കായി പ്രസംഗമത്സരം നടത്തും. 'രാജ്യ സ്‌നേഹവും രാഷ്ട്ര നിര്‍മ്മാണവും'  എന്ന വിഷയത്തില്‍ ജില്ലാതലം മുതല്‍ ദേശിയതലം വരെ ഹിന്ദിയിലും ഇംഗ്ലീഷിലുമാണ് മത്സരം. 2017 നവംബര്‍ ഒന്നിന് 18-29 പ്രായ പരിധിയിലുള്ള യുവതീ യുവാക്കള്‍ക്ക് പങ്കെടുക്കാം.

കെ.എ.പി. ഒന്ന്, രണ്ട് ബറ്റാലിയന്‍ പൊലീസ് കോണ്‍സ്റ്റബിള്‍മാരുടെ പാസിങ് ഔട്ട് പരേഡില്‍ മുഖ്യമന്ത്രി പിണറായി വിജയന്‍ സല്യൂട്ട് സ്വീകരിക്കും. നവംബര്‍ 18-ന് രാവിലെ എട്ടിന് പാലക്കാട് മുട്ടിക്കുളങ്ങരയില്‍ കെ.എ.പി രണ്ടാം ബറ്റാലിയന്‍ പരേഡ് ഗ്രൗണ്ടിലാണ് പാസിങ് ഔട്ട് നടക്കുക. സംസ്ഥാന പൊലീസ് മേധാവി ലോക്‌നാഥ് ബഹ്‌റ, ഡി.ഐ.ജി(ആമ്ഡ് പൊലീസ് ബറ്റാലിയന്‍) കെ.ഷെഫീന്‍ അഹമ്മദ്, എ.ഡി.ജി.പി( ആമ്ഡ് പൊലീസ് ബറ്റാലിയന്‍) സുധേഷ് കുമാര്‍ തുടങ്ങിയവര്‍ പങ്കെടുക്കും.

പി.വി വില്‍സനാണ് കെ.എ.പി ഒന്നാം ബറ്റാലിയന്‍ കമാന്‍ഡന്റ്. പി.എസ് ഗോപിനാഥാണ് രണ്ടാം ബറ്റാലിയന്‍ കമാന്‍ഡന്റ്. 
 

തദ്ദേശസ്വയംഭരണ സ്ഥാപനങ്ങളുടെ  വാര്‍ഷിക പദ്ധതി ഭേദഗതികള്‍ക്ക് ആസൂത്രണസമിതി ഹാളില്‍ ചേര്‍ന്ന ജില്ലാ ആസൂത്രണസമിതി  യോഗം  അംഗീകാരം നല്‍കി. മീഞ്ച, ബളാല്‍, പുല്ലൂര്‍-പെരിയ, മടിക്കൈ, പിലിക്കോട്, കയ്യൂര്‍-ചീമേനി, ചെറുവത്തൂര്‍, വെസ്റ്റ് എളേരി, കിനാനൂര്‍-കരിന്തളം, വൊര്‍കകാടി ഗ്രാമപഞ്ചായത്തുകളുടെയും കാഞ്ഞങ്ങാട് നഗരസഭയുടെയും ഭേദഗതി പദ്ധതികള്‍ യോഗം അംഗീകരിച്ചു. ജില്ലാ ആസൂത്രണസമിതി ഹാളില്‍ ചേര്‍ന്ന യോഗത്തില്‍ ജില്ലാ പഞ്ചായത്ത് പ്രസിഡന്റ് എ ജി സി ബഷീര്‍ അധ്യക്ഷത വഹിച്ചു. ജില്ലാ കളക്ടര്‍ ജീവന്‍ബാബു കെ പദ്ധതികള്‍ അവലോകനം ചെയ്തു.

പുതുനഗരം സെന്‍ട്രല്‍ സ്‌ക്കൂള്‍ കെട്ടിടം ഉദ്ഘാടനം ഇന്ന് (നവംബര്‍ 16) ഉച്ചയ്ക്ക് 12-ന് വിദ്യാഭ്യാസമന്ത്രി പ്രൊഫ.സി .രവീന്ദ്രനാഥ് നിര്‍വഹിക്കും. പരിപാടിയില്‍ കെ.കൃഷ്ണന്‍ കുട്ടി എം.എല്‍.എ അധ്യക്ഷനാകും.

അഗളി മിനിസിവില്‍സ്റ്റേഷന്‍ ഉദ്ഘാടനം നവംബര്‍ 18-ന് രാവിലെ 11 -ന് മുഖ്യമന്ത്രി പിണറായി വിജയന്‍ നിര്‍വഹിക്കും. അഗളി പഞ്ചായത്ത് സ്റ്റേഡിയത്തില്‍ നടക്കുന്ന പരിപാടിയില്‍ റവന്യൂ മന്ത്രി ഇ.ചന്ദ്രശേഖരന്‍  അധ്യക്ഷനാകും. എന്‍.ഷംസുദ്ദീന്‍ എം.എല്‍.എ, ഭരണപരിഷ്‌കരണ കമ്മീഷന്‍ ചെയര്‍മാന്‍ വി.എസ് അച്യുതാനന്ദന്‍, എം.ബി രാജേഷ് എം.പി , ജില്ലയിലെ എം.എല്‍.എമാര്‍, ജില്ലാ പഞ്ചായത്ത് പ്രസിഡന്റ് കെ.ശാന്തകുമാരി, ഗ്രാമ-ബ്ലോക്ക് ജില്ലാ പഞ്ചായത്ത് പ്രതിനിധികള്‍, മറ്റു രാഷ്ട്രീയ പാര്‍ട്ടി പ്രതിനിധികള്‍, സബ് കലക്ടര്‍ ജെറോമിക് ജോര്‍ജ് തുടങ്ങിയവര്‍ പങ്കെടുക്കും.

ദേശീയ മാധ്യമ ദിനത്തിന്റെ ഭാഗമായി നാളെ (നവംബര്‍ 16) കണ്ണൂര്‍ പ്രസ്സ് ക്ലബ്ബുമായി ചേര്‍ന്ന് ഇന്‍ഫര്‍മേഷന്‍ പബ്ലിക് റിലേഷന്‍സ് വകുപ്പ്് മാധ്യമ സെമിനാര്‍ സംഘടിപ്പിക്കുന്നു. മാധ്യമസ്വാതന്ത്ര്യം-വര്‍ത്തമാനകാല വെല്ലുവിളികള്‍ എന്ന വിഷയത്തില്‍ കണ്ണൂര്‍ പ്രസ്സ്‌ക്ലബ്ബ് ഹാളിലാണ് സെമിനാര്‍. 

ജില്ലാ പഞ്ചായത്തും ആര്‍.എം.എസ്.എയും സംയുക്തമായി ജില്ലയിലെ ഇരുന്നൂറോളം ഹൈസ്‌ക്കൂളുകളില്‍ നടപ്പിലാക്കുന്ന പെണ്‍കുട്ടികള്‍ക്കുള്ള സ്വയംപ്രതിരോധ പരിശീലന പരിപാടിക്ക് മയ്യില്‍ ഐ.എം.എന്‍.എസ് ഗവ. ഹയര്‍ സെക്കന്ററി സ്‌കൂളില്‍ തുടക്കമായി. പദ്ധതിയുടെ ജില്ലാതല ഉദ്ഘാടനം ജില്ലാപഞ്ചായത്ത് പ്രസിഡന്റ് കെ.വി സുമേഷ് നിര്‍വഹിച്ചു.