കനത്ത മഴ തുടരുന്നതിനാലും മഞ്ഞ അലർട്ട് പ്രഖ്യാപിച്ച സാഹചര്യത്തിലും ദുരന്തങ്ങൾ തടയുന്നതിനായി കോഴിക്കോട് ജില്ലയിൽ നിയന്ത്രണങ്ങൾ ഏർപ്പെടുത്തി ജില്ലാ കലക്ടർ എ ഗീത ഉത്തരവിറക്കി. ജില്ലയിലെ ക്വാറികളുടെ പ്രവർത്തനം, എല്ലാ തരത്തിലുമുളള മണ്ണെടുക്കൽ, ഖനനം, കിണർ നിർമ്മാണ പ്രവർത്തനങ്ങൾ എന്നിവ കർശനമായി നിർത്തിവച്ചു. ഇനിയൊരറിയിപ്പ് ഉണ്ടാകുന്നതുവരെ ഇത്തരം പ്രവർത്തനങ്ങൾക്ക് അനുമതി ഉണ്ടാവില്ലെന്ന് കലക്ടർ അറിയിച്ചു.

കോട്ടയം: പള്ളം അഡീഷണൽ ഐ.സി.ഡി.എസ്. പ്രോജക്ടിന്റെ പരിധിയിലുള്ള 134 അങ്കണവാടികളിലെ 1029 ഗുണഭോക്താക്കൾക്ക് പ്രീ സ്‌കൂൾ കിറ്റ് സാധനങ്ങൾ വിതരണം ചെയ്യുന്നതിന് ദർഘാസ് ക്ഷണിച്ചു. സെപ്റ്റംബർ 28ന് ഉച്ചകഴിഞ്ഞ് 2.30 വരെ ദർഘാസ് സ്വീകരിക്കും. വിശദവിവരത്തിന് ഫോൺ: 0481 2310355.
 

മാലിന്യമുക്തം നവകേരളം കാമ്പയിനിന്റെ ഭാഗമായി പനങ്ങാട് ഗ്രാമപഞ്ചായത്തിലെ 20 വാർഡുകളിലും ശുചീകരണ പ്രവൃത്തികൾ നടത്തി. കുടംബശ്രീ, തൊഴിലുറപ്പ് തൊഴിലാളികൾ, ക്ലബ്ബുകൾ, റസിഡൻസ് അസോസിയേഷനുകൾ, എന്നിവരോടൊപ്പം ബാലുശ്ശേരി ഗവ.അംബേദ്കർ കോളേജിലെ എഴുപതോളം എൻ.എസ്.എസ് വളണ്ടിയർമാരും പങ്കെടുത്തു.

വിദ്യാലയങ്ങൾ, ആരോഗ്യസ്ഥാപനങ്ങൾ എന്നിവിടങ്ങളിലും സ്ഥാപന മേധാവികളുടെ നേതൃത്വത്തിൽ ശുചീകരണ പ്രവർത്തനങ്ങൾ നടത്തി. പഞ്ചായത്തിലെ വിവിധ ഭാഗങ്ങളിൽ നടന്ന ശുചീകരണ പരിപാടികളിൽ 2,500ഓളം പേർ പങ്കെടുത്തു.

കുടുംബശ്രീയുടെ നേതൃത്വത്തിൽ സംഘടിപ്പിക്കുന്ന 'തിരികെ സ്കൂളിൽ' സംസ്ഥാനതല ക്യാമ്പയിന്റെ ഭാഗമായി കൊയിലാണ്ടി നഗരസഭാ തല സ്വാഗത സംഘം രൂപീകരിച്ചു. വിദ്യാഭ്യാസ വകുപ്പുമായി സഹകരിച്ച് ഒക്ടോബർ ഒന്നു മുതൽ ഡിസംബർ പത്തു വരെയാണ് അയൽക്കൂട്ട വനിതകൾ വീണ്ടും വിദ്യാലയങ്ങളിലേക്കെത്തുന്നത്. സംസ്ഥാനതലത്തിൽ 46 ലക്ഷം അയൽക്കൂട്ട വനിതകളാണ് പദ്ധതിയുടെ ഭാഗമാകുന്നത്.

കേരള സർക്കാർ സ്ഥാപനമായ ഇൻസ്റ്റിറ്റ്യൂട്ട് ഫോർ ക്ലൈമറ്റ് ചെയ്ഞ്ച് സ്റ്റഡീസിൽ സിസ്റ്റം അനലിസ്റ്റ്/ ജൂനിയർ റിസർച്ച് ഫെല്ലോ ഒഴിവിലേക്ക് ഒക്ടോബർ 18ന് രാവിലെ ഒമ്പതിന് വോക്-ഇൻ-ഇന്റർവ്യൂ നടക്കും. വിശദവിവരങ്ങൾക്ക് www.iccs.res.in എന്ന വെബ് സൈറ്റ് സന്ദർശിക്കുക.

ജില്ലയിലെ 10 ആയുഷ് സ്ഥാപനങ്ങൾ എൻ എ ബി എച്ച് നിലവാരത്തിലേക്ക് ഉയർത്തുന്നു. അരിക്കുളം, കുരുവട്ടൂർ, ഫറോക്ക്, വെള്ളന്നൂർ, കട്ടിപ്പാറ എന്നീ ആയുർവേദ സ്ഥാപനങ്ങളും ചെറുവണ്ണൂർ, തൂണേരി, നന്മണ്ട, കോക്കലൂർ, കട്ടിപ്പാറ തുടങ്ങിയ ഹോമിയോപ്പതി സ്ഥാപനങ്ങളിലുമാണ്  എൻ എ ബി എച്ച് നിലവാരം നടപ്പിലാക്കുന്നത്. 

ഹെൽത്ത് ആന്റ് വെൽനസ്സ് സെൻ്ററുകൾ വന്നതോടെ വലിയ മാറ്റങ്ങളാണ് ആരോഗ്യ മേഖലയിൽ ഉണ്ടായിട്ടുള്ളത്. സമൂഹത്തിലെ ആരോഗ്യ നിലവാരം മെച്ചപ്പെടുത്തുന്നതിനും രോഗങ്ങൾ വരാതിരിക്കാനുള്ള പ്രാഥമിക പ്രതിരോധം ശക്തിപ്പെടുത്തുകയുമാണ് ആയുഷ് ഹെൽത്ത് ആന്റ് വെൽനസ്സ് സെൻ്ററുകളിലൂടെ ലക്ഷ്യം വെക്കുന്നത്.

കോഴിക്കോട് ജില്ലയിൽ നിപ സമ്പർക്ക പട്ടികയിൽ നിലവിൽ ഉള്ളത് 517പേർ. 51 പേരെ ശനിയാഴ്ച സമ്പർക്ക പട്ടികയിൽ നിന്ന് ഒഴിവാക്കി.  പുതുതായി ആരെയും സമ്പർക്ക പട്ടികയിൽ ഉൾപ്പെടുത്തിയിട്ടില്ല. നിപ നെഗറ്റീവ് ആയി വെള്ളിയാഴ്ച ആശുപത്രികളിൽ നിന്നും 
ഡിസ്ചാർജ്ജായ  നാലുപേരെയും ഫോൺ  വിളിച്ച് സ്ഥിതിഗതികൾ വിലയിരുത്തി. ഓൺലൈനായി ചേർന്ന അവലോകന യോഗത്തിൽ ആരോഗ്യ മന്ത്രി വീണാ ജോർജ് , ഡിഎംഒ തുടങ്ങിയവർ പങ്കെടുത്തു.

അരീക്കോട് ഗവ. ഐ.ടി.ഐയിലെ ടെക്‌നീഷ്യൻ പവർ ഇലക്‌ട്രോണിക്‌സ് സിസ്റ്റം (ഒ.ബി.സി സംവരണം) ട്രേഡിലും, എപ്ലോയബിലിറ്റി സ്‌കിൽ വിഷയത്തിലും (ജനറൽ വിഭാഗം) ഓരോ ഗസ്റ്റ് ഇൻസ്ട്രക്ടർമാരെ താത്കാലികമായി നിയമിക്കുന്നു. മതിയായ യോഗ്യതയുള്ളവർ ടെക്‌നീഷ്യൻ പവർ ഇലക്‌ട്രോണിക്‌സ് സിസ്റ്റം ട്രേഡിലെ അഭിമുഖത്തിന് ഒക്ടോബർ നാലിന് രാവിലെ പത്തിനും എപ്ലോയബിലിറ്റി സ്‌കിൽ വിഷയത്തിലെ അഭിമുഖത്തിന് അഞ്ചിന് രാവിലെ പത്തിനും അസ്സൽ സർട്ടിഫിക്കറ്റുകളുമായി അരീക്കോട് ഗവ. ഐ.ടി.ഐ പ്രിൻസിപ്പൽ മുമ്പാകെ അഭിമുഖത്തിന് ഹാജരാവണം. ഫോൺ: 0483 2850238.

പേരാമ്പ്ര - നാദാപുരം മണ്ഡലങ്ങളെ ബന്ധിപ്പിച്ച് എക്കൽ പാലം നിർമ്മിക്കുന്നതിന് 16.75 കോടി രൂപയുടെ ഭരണാനുമതിയായതായി ടി.പി രാമകൃഷ്ണൻ എം എൽ എ അറിയിച്ചു. 
പേരാമ്പ്ര   മണ്ഡലത്തിലെ പുഴിത്തോടിനെയും നാദാപുരം മണ്ഡലത്തിലെ മരുതോങ്കര പ്രദേശങ്ങളെയും ബന്ധിപ്പിക്കുന്നതാണ് പാലം.