എന്റെ കേരളം പ്രദര്‍ശന വിപണന മേളയില്‍ ഇക്കുറി പൊലീസ് ഡോഗ് ഷോ ശ്രദ്ധേയമാകും
പൊലീസ് വകുപ്പിന്റെ കെ-9 സ്‌ക്വാഡ് മുന്നിട്ടിറങ്ങുമ്പോള്‍ എന്റെ കേരളം പ്രദര്‍ശന വിപണന മേളയില്‍ ഇക്കുറി പൊലീസ് ഡോഗ് ഷോ ശ്രദ്ധേയമാകുമെന്ന് മാത്രമല്ല കാണികളെ തരിപ്പിക്കുകയും ത്രസിപ്പിക്കുകയും ചെയ്യും . ഇന്‍ഫര്‍മേഷന്‍- പബ്ലിക് റിലേഷന്‍സ് വകുപ്പ് വിവിധ വകുപ്പുകളുടെ സഹകരണത്തോടെ മെയ് നാല് മുതല്‍ 10 വരെ സ്‌റ്റേഡിയം ബസ് സ്റ്റാന്റിന് സമീപത്തെ മൈതാനത്താണ് എന്റെ കേരളം പ്രദര്‍ശന വിപണന മേള നടക്കുക. പാലക്കാട് ജില്ല പോലീസ് മേധാവിയുടെ കീഴിലെ പാലക്കാട് കെ9 സ്‌ക്വാഡിലെ അഞ്ച് ഡോഗുകളും ഷൊര്‍ണൂര്‍ കെ9 സ്‌ക്വാഡിലെ നാല് ഡോഗുകളും മേളയില്‍ വിവിധ ദിവസങ്ങളില്‍ ഭാഗമാകും.
സ്‌ഫോടക വസ്തുക്കള്‍ കണ്ടെത്തുന്നവ, ലഹരി പദാര്‍ത്ഥങ്ങള്‍ കണ്ടെത്തുന്നവ, മോഷണം, കവര്‍ച്ച, കൊലപാതകം തുടങ്ങി കുറ്റകൃത്യങ്ങള്‍ കണ്ടെത്തുന്നവ എന്നിങ്ങനെ മൂന്ന് വിഭാഗത്തില്‍ നിന്നുള്ള ഡോഗുകളാണ് മേളയുടെ ഭാഗമാവുക. രണ്ട് സ്‌ക്വാഡിലായി ലാബ്രഡോര്‍ റിട്രീവര്‍ ബ്രീഡിലെ ബെറ്റിയും ലൂസിയും ചിപ്പിപ്പാറ ബ്രീഡിലെ നിക്കി, കന്നി ബ്രീഡിലെ റോസി, ജി.എസ്.ഡി ബ്രീഡിലെ ടെസ്സ്, മാലിനോയിസ് വിഭാഗത്തില്‍പ്പെട്ട ഹാര്‍ലി, ബ്ലൂമി, ലിന്റ, ആസ്ത്ര എന്നീ പേരുകളുളള ഡോഗുകളാണ് പങ്കെടുക്കുക.
മേള നടക്കുന്ന ഏഴ് ദിവസം ഒരോ ഡോഗുകള്‍ വീതം അവരുടെ ട്രേഡിലെ മികവുകള്‍ പൊതുജനങ്ങള്‍ക്കായി അവതരിപ്പിക്കും. പൊലീസിന്റെ ഉത്തരവാദിത്തങ്ങള്‍ സംബന്ധിച്ച് പൊതുജനങ്ങളില്‍ ബോധവത്ക്കരണമുണ്ടാക്കുക ലക്ഷ്യമിട്ടാണ് പൊലീസ് ഡോഗ് ഷോ മേളയില്‍ നടത്തുന്നത്.
വിവിധ വകുപ്പുകളുടെ തീം-സര്‍വീസ് സ്റ്റാളുകളും കൊമേഴ്ഷ്യല്‍ സ്റ്റാളുകളും ഉള്‍പ്പെടെ ശീതീകരിച്ച 250 ഓളം സ്റ്റാളുകള്‍ മേളയുടെ ഭാഗമാകും. മേളയില്‍ പ്രവേശനം സൗജന്യമായിരിക്കും. പാര്‍ക്കിംഗ് സൗകര്യമുണ്ടായിരിക്കും.
- Log in to post comments