കലായിടം;ദൃശ്യകലാരംഗത്ത് നൂതന പദ്ധതിയുമായി ജില്ലാ പഞ്ചായത്ത്

ആലപ്പുഴ ജില്ലാപഞ്ചായത്ത് ആര്യാട് ഡിവിഷനിൽ കുട്ടികളുടെ ദൃശ്യകലാപരമായ കഴിവുകൾ പരിപോഷിപ്പിക്കുന്നതിനുള്ള പദ്ധതി ആരംഭിച്ചു. കലായിടം പദ്ധതിയുടെ ഉദ്ഘാടനം പ്രശസ്ത കുറേറ്റർ ബോസ് കൃഷ്ണമാചാരി നിർവഹിച്ചു. 

കുട്ടികളുടെ ദൃശ്യകലാശേഷിയെ മുഖ്യമായി കാണുന്ന ജില്ലാ പഞ്ചായത്ത് നടപടി അഭിനന്ദനാർഹമാണെന്ന് ബോസ് കൃഷ്ണമാചാരി പറഞ്ഞു. കൊച്ചി ബിനാലെ ഫൗണ്ടേഷന്റെ പിന്തുണ കലായിടം പദ്ധതിയ്ക്കുണ്ടാകുമെന്ന് അദ്ദേഹം പറഞ്ഞു.

കലവൂർ ഗവ. ഹയർ സെക്കൻഡറി സ്കൂളിൽ നടന്ന ചടങ്ങിൽ ജില്ലാ പഞ്ചായത്ത് വൈസ് പ്രസിഡന്റ് എൻ എസ് ശിവപ്രസാദ് അധ്യക്ഷനായി. ജില്ലാ പഞ്ചായത്ത് അംഗം അഡ്വ.  ആർ.റിയാസ്, ഗ്രാമ പഞ്ചായത്ത് വൈസ് പ്രസിഡന്റ് പി എ ജുമൈലത്ത്, ബ്ലോക്ക് പഞ്ചായത്ത് അംഗം തിലകമ്മ വാസുദേവൻ, ഗ്രാമ പഞ്ചായത്ത് അംഗം ഉദയമ്മ, ജില്ലാ പഞ്ചായത്ത് സെക്രട്ടറി കെ ആർ ദേവദാസ്, ആർട്ടിസ്റ്റുമാരായ ബിന്ദി രാജഗോപാൽ, സുരാജ് രവീന്ദ്രനാഥ്, അമീൻ ഖലീൽ, ബ്ലോഡ്സോ, സാക്ഷരതാമിഷൻ ജില്ലാ കോർഡിനേറ്റർ കെ വി രതീഷ്, സ്കൂൾ  പ്രിൻസിപ്പൽ  എൻ മഞ്ജു, പ്രധാന അധ്യാപിക മേരി ആഗ്നസ്, സുമയ്യ ബീവി എന്നിവർ സംസാരിച്ചു.

 ആര്യാട് ഡിവിഷനിൽ രൂപീകരിച്ചിട്ടുള്ള ആർട്ട് അക്കാദമിയാണ് കലായിടം പദ്ധതിയ്ക്ക് നേതൃത്വം നൽകുക. അവധിക്കാലത്ത് ആഴ്ചയിൽ മൂന്ന് ദിവസം വീതം കലവൂർ  ജി എച്ച് എസ് എസിൽ  പരിശിലനം നൽകും. ഇതിൻ്റെ തുടർച്ചയായി എല്ലാ സ്കൂളുകളിലും ആർട്ട് ക്ലബ്ബ് രൂപീകരിക്കുന്നതാണ്. പുതിയ അധ്യയന വർഷത്തിൽ സ്കൂൾ തലത്തിലും പരിശീലനം നൽകും.

ആർട്ട് അക്കാദമിയുടെ നേതൃത്വത്തിൽ കലവൂർ  ജി എച്ച് എസ് എസിൽ  ആർട്ട് ഗ്യാലറിയും നിർമ്മിക്കും. കുട്ടികൾക്കും മറ്റുള്ളവർക്കും ചിത്രപ്രദർശനം നടത്താൻ കഴിയുന്ന ആർട്ട് ഗാലറി മികച്ച സാങ്കേതിക വിദ്യയിലാണ് നിർമ്മിക്കുക.

രക്ഷിതാക്കൾ അടക്കമുള്ളവരുടെ ദൃശ്യകലാപരമായ കഴിവുകൾ പരിപോഷിപ്പിക്കുന്നതിന് വില്ലേജ് ആർട്ട്ക്ലബ്ബുകളും രൂപീകരിക്കുന്നതാണ്.

ആർട്ട് അക്കാദമി, ആർട്ട് ഗാലറി, സ്കൂൾ ആർട്ട് ക്ലബ്ബ്, വില്ലേജ് ആർട്ട് ക്ലബ്ബ് എന്നിങ്ങനെയുള്ള ഒരു മികച്ച സംവിധാനമാണ് ജില്ലാ പഞ്ചായത്ത് ആര്യാട് ഡിവിഷനിൽ നടപ്പിലാക്കുകയെന്ന് ജില്ലാ പഞ്ചായത്ത് അംഗം ആർ റിയാസ് പറഞ്ഞു. സ്പോൺസർഷിപ്പിലൂടെയാണ് ഇതിനാവശ്യമായ പണം കണ്ടെത്തുന്നത്. 

ആർട്ടിസ്റ്റുമാരായ ബിന്ദി രാജഗോപാൽ, സുരാജ് രവീന്ദ്രനാഥ്, അമീൻ ഖലീൽ, അനിൽ തുടങ്ങിയവരുടെ നേതൃത്വത്തിലാണ് വിദ്യാർത്ഥികൾക്ക് പിന്തുണ നൽകുന്നത്.
 
(പിആര്‍/എഎല്‍പി/1207)