മോഡല്‍ റസിഡന്‍ഷ്യല്‍ സ്‌കൂള്‍ പ്രവേശനം

പട്ടിക വര്‍ഗ വികസന വകുപ്പിന് കീഴില്‍ വിവിധ സ്ഥലങ്ങളില്‍ പട്ടികജാതി പട്ടികവര്‍ഗ വിദ്യാര്‍ത്ഥികള്‍ക്കായി പ്രവര്‍ത്തിക്കുന്ന കേരളത്തിലെ 11 മോഡല്‍ റസിഡന്‍ഷ്യല്‍ സ്‌കൂളുകളില്‍ അഞ്ചാം ക്ലാസിലേക്കും വയനാട് ജില്ലയിലെ പൂക്കോട്, ഇടുക്കി ജില്ലയിലെ പൈനാവ്, പാലക്കാട് ജില്ലയിലെ അട്ടപ്പാടി, കാസര്‍കോട് ജില്ലയിലെ കരിന്തളം എന്നീ ഏകലവ്യ മോഡല്‍ റസിഡന്‍ഷ്യല്‍ സ്‌കൂളുകളിലേക്ക് ആറാം ക്ലാസിലേക്കും പ്രവേശനത്തിനായി അപേക്ഷകള്‍ ക്ഷണിച്ചു. ഈ വിദ്യാലയങ്ങളിലേക്ക് അഡ്മിഷനായുള്ള പ്രവേശന പരീക്ഷ 2026 മാര്‍ച്ച് 14, ശനി രാവിലെ 10 മുതല്‍ 12 വരെ വിവിധ കേന്ദ്രങ്ങളില്‍ നടത്തും. രക്ഷിതാക്കളുടെ കുടുംബ വാര്‍ഷിക വരുമാനം 2,00,000/ (രണ്ടു ലക്ഷം രൂപ) രൂപയോ, അതില്‍ കുറവുള്ളതോ ആയ വിദ്യാര്‍ത്ഥികള്‍ക്ക് പരീക്ഷ എഴുതാന്‍ അപേക്ഷ സമര്‍പ്പിക്കാം. പ്രത്യേക ദുര്‍ബല ഗോത്ര വിഭാഗക്കാര്‍ക്ക് വരുമാന പരിധി ബാധകമല്ല.

പ്രവേശനത്തിനുള്ള അപേക്ഷ www.tsmrs.in എന്ന വെബ്സൈറ്റ് മുഖേന ഓണ്‍ലൈനായാണ് സമര്‍പ്പിക്കേണ്ടത്. അപേക്ഷ സമര്‍പ്പിക്കുന്നതിന് വേണ്ട സാങ്കേതിക സഹായങ്ങള്‍ ഇടുക്കി ഐ.റ്റി.ഡി പ്രോജക്ട് ഓഫീസ്, അടിമാലി ട്രൈബല്‍ ഡെവലപ്‌മെന്റ് ഓഫീസ്, പൂമാല/ പീരുമേട്/ കട്ടപ്പന/ ഇടുക്കി/അടിമാലി/ മൂന്നാര്‍/ മറയൂര്‍ ട്രൈബല്‍ എക്സ്റ്റന്‍ഷന്‍ ഓഫീസുകളിലും ലഭിക്കുന്നതാണ്. ഓണ്‍ലൈന്‍ അപേക്ഷ സമര്‍പ്പിക്കുന്നതിനുള്ള അവസാന തീയതി 2026 ഫെബ്രുവരി 21 ആണ്.