ഇടുക്കി ബ്ലോക്ക് പഞ്ചായത്ത് ലൈഫ് കുടുംബ സംഗമവും അദാലത്തും നാളെ (13.01.2020)

ഇടുക്കി ബ്ലോക്ക് പഞ്ചായത്തിലെ ലൈഫ് മിഷന്‍ ഗുണഭോക്താക്കളുടെ കുടുംബ സംഗമവും അദാലത്തും നാളെ (13.01.2020, തിങ്കളാഴ്ച)  രാവിലെ 10 മുതല്‍ തടിയമ്പാട് ഫാത്തിമ മാതാ പാരീഷ്ഹാളില്‍  നടത്തും. കുടുംബ സംഗമത്തിന്റെയും അദാലത്തിന്റെയും ഉദ്ഘാടനം  ഡീന്‍ കുര്യാക്കോസ്  എം പി നിര്‍വഹിക്കും. റോഷി അഗസ്റ്റ്യന്‍ എം.എല്‍.എ അധ്യക്ഷത വഹിക്കും. ജില്ലാ പഞ്ചായത്ത് പ്രസിഡന്റ് കൊച്ചുത്രേസ്യ പൗലോസ് മുഖ്യപ്രഭാഷണം നടത്തും. ജില്ലാകളക്ടര്‍ എച്ച്.ദിനേശന്‍ വിശിഷ്ടാതിഥിയാകും.  ഇടുക്കി ബ്ലോക്ക് പഞ്ചായത്ത് പ്രസിഡന്റ് റെജി മുക്കാട്ട് സ്വാഗതവും ബ്ലോക്ക് പഞ്ചായത്ത് സെക്രട്ടറി എസ്.ഹര്‍ഷന്‍ നന്ദിയും പറയും. ലൈഫ് മിഷന്‍ ജില്ലാ കോ-ഓര്‍ഡിനേറ്റര്‍  കെ. പ്രവീണ്‍ പദ്ധതി വിശദീകരണം നടത്തും.

സംസ്ഥാന സര്‍ക്കാരിന്റെ സമ്പൂര്‍ണ പാര്‍പ്പിട സുരക്ഷാ പദ്ധതി ആണ് ലൈഫ് മിഷന്‍. കേരളത്തിലെ എല്ലാ ഭവനരഹിതര്‍ക്കും സുരക്ഷിതവും മാന്യവുമായ പാര്‍പ്പിട സംവിധാനം ഒരുക്കി നല്‍കുകയാണ് പദ്ധതിയുടെ ലക്ഷ്യം. ഇടുക്കി ബ്ലോക്ക് പഞ്ചായത്ത് പരിധിയിലുള്ള വാഴത്തോപ്പ്, കഞ്ഞിക്കുഴി, വാത്തിക്കുടി, മരിയാപുരം, കാമാക്ഷി, അറക്കുളം ഗ്രാമപഞ്ചായത്തുകളിലായി ആകെ 993 വീടുകളാണ് ലൈഫ് മിഷന്‍ പദ്ധതിയില്‍  നിര്‍മിച്ചിട്ടുള്ളത്. ലൈഫ് ഗുണഭോക്താക്കളുടെ കുടുംബസംഗമത്തില്‍  ആറു പഞ്ചായത്തുകളില്‍ നിന്നായി രണ്ടായിരത്തോളം പേര്‍ പങ്കെടുക്കും.  പതിനെട്ടോളം സര്‍ക്കാര്‍ വകുപ്പുകളുടെ സേവനവും അദാലത്തില്‍ ലഭ്യമാകും. തദ്ദേശ സ്വയംഭരണ സ്ഥാപനങ്ങള്‍, സിവില്‍ സപ്ലൈസ് വകുപ്പ്, കൃഷി വകുപ്പ്, സാമൂഹ്യനീതി വകുപ്പ്, കുടുംബശ്രീ, ഐ.ടി, ഫിഷറീസ്, മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതി, വ്യവസായ വകുപ്പ്, പട്ടികജാതി പട്ടികവര്‍ഗ വകുപ്പ്, ക്ഷീരവികസന വകുപ്പ്, ആരോഗ്യ വകുപ്പ്, റവന്യൂ, ശുചിത്വമിഷന്‍, വനിതാ ശിശു വികസനം, ഗ്രാമവികസന വകുപ്പ്, പബ്ലിക് റിലേഷന്‍സ് വകുപ്പ്, ലീഡ് ബാങ്ക് തുടങ്ങിയ വകുപ്പുകളുടെ സേവനം അദാലത്തില്‍ ലഭിക്കും. വീട്ടു നമ്പര്‍ ലഭ്യമാക്കല്‍, റേഷന്‍കാര്‍ഡിനുളള അപേക്ഷകള്‍, ആധാര്‍-റേഷന്‍കാര്‍ഡുകളിലെ തെറ്റു തിരുത്തല്‍, ബാങ്ക് അക്കൗണ്ട് ആരംഭിക്കല്‍, വിവിധ ക്ഷേമ പെന്‍ഷന്‍ അപേക്ഷകള്‍, ജീവിത ശൈലീ രോഗ നിര്‍ണ്ണയം, സ്ത്രീകള്‍ക്കും കുട്ടികള്‍ക്കും ആവശ്യമായ ബോധവത്ക്കരണം, കൃഷി വകുപ്പിന്റെ വിവിധ സേവനങ്ങള്‍ എന്നിവയാണ് പ്രധാനമായും സര്‍ക്കാര്‍ വകുപ്പുകളുടെ കൗണ്ടറുകള്‍ വഴി നല്‍കുന്നത്. ജില്ലാതല ലൈഫ് ഗുണഭോക്തൃ  സംഗമം ജനുവരി 19ന് നെടുങ്കണ്ടത്ത് വൈദ്യുതി വകുപ്പ് മന്ത്രി എം.എം.മണി ഉദ്ഘാടനം ചെയ്യും.