കൃഷിയിടങ്ങളില്‍ കീടങ്ങളെ പരത്തി  കേരളത്തിലെ കാര്‍ഷിക സംസ്‌കൃതിക്ക് സര്‍വ്വനാശം വരുത്താനൊരുങ്ങിയ രോഗാസുരനെ വധിച്ച കഥയുമായി അവതരിപ്പിച്ച യക്ഷഗാനം പുതുമയുളളതായി. കാര്‍ഷികവികസന കര്‍ഷകക്ഷേമ വകുപ്പിന്റെ  ആഭിമുഖ്യത്തില്‍ കളക്ടറേറ്റ് കോണ്‍ഫറന്‍സ് ഹാളിലാണ് ബോധവല്‍ക്കരണത്തിനായി യക്ഷഗാനം അരങ്ങേറിയത്. ആഡൂര്‍ മാട്ടവയല്‍ ശ്രീ ചിന്മയെ യക്ഷഗാനകലാനിയമാണ് മലയാളത്തില്‍ യക്ഷഗാനം അവതരിപ്പിച്ചത്.

ഓഖി ചുഴലിക്കാറ്റുമൂലം  ദുരിതമനുഭവിക്കുന്ന ജില്ലയിലെ മത്സ്യത്തൊഴിലാളി കുടുംബങ്ങള്‍ക്ക് ഒരാഴ്ചക്കാലത്തേക്ക് സംസ്ഥാനസര്‍ക്കാര്‍ സൗജന്യമായി അനുവദിച്ച 15 കി.ഗ്രാം അരി  അതാത് റേഷന്‍ കടകളില്‍ നിന്നും  ഈ മാസം  31 വരെ ലഭിക്കുമെന്ന് ജില്ലാ സപ്ലൈ ഓഫീസര്‍  അറിയിച്ചു.  കൂടാതെ ഡിസംബര്‍ മാസത്തെ  റേഷന്‍ വിഹിതവും   മത്സ്യത്തൊഴിലാളികള്‍ക്ക്  സൗജന്യമായിട്ടായിരിക്കും വിതരണം ചെയ്യുക. റേഷന്‍കാര്‍ഡില്‍ മത്സ്യത്തൊഴിലാളി എന്ന് രേഖപ്പെടുത്തിയിട്ടുണ്ടെങ്കില്‍  അത്തരം കാര്‍ഡുകള്‍ക്കും ആനുകൂല്യം ലഭിക്കും.

കാസര്‍കോട് സബ് കോടതിയുടെ  വജ്രജൂബിലി ആഘോഷങ്ങളുടെ ഭാഗമായി ജനാധിപത്യത്തില്‍ മാധ്യമങ്ങളുടെ പങ്ക് എന്ന വിഷയത്തില്‍ സെമിനാര്‍ സംഘടിപ്പിക്കുന്നു.  ഈ മാസം  31 ന് ഉച്ചയ്ക്ക 1.30 വിദ്യാനഗര്‍ ജില്ലാ കോടതി കോംപ്ലക്‌സില്‍ നടക്കുന്ന സെമിനാര്‍ കേരള ഹൈക്കോടതി മുന്‍ ജഡ്ജിയും  രണ്ടാം ദേശീയജുഡീഷ്യല്‍ ശമ്പള കമ്മീഷന്‍ അംഗവുമായ ജസ്റ്റിസ് ആര്‍ ബസന്ത്  ഉദ്ഘാടനം ചെയ്യും.. ഡിസ്ട്രിക്ട് ആന്റ് സെഷന്‍സ് ജഡ്ജ്  എസ് മനോഹര്‍കിണി അധ്യക്ഷത വഹിക്കും. എന്‍എ നെല്ലിക്കുന്ന് എംഎല്‍എ മുഖ്യാതിഥിയായിരിക്കും.  അഡ്വ. സി കെ ശ്രീധരന്‍  മേഡറേറ്ററായിരിക്കും.

ഇന്ത്യന്‍ എയര്‍ഫോഴ്‌സിലേക്ക് എയര്‍മാന്‍ തസ്തികയിലേക്ക് അപേക്ഷ ക്ഷണിക്കുന്നു. ഈ മാസം 15 മുതല്‍ 2018 ജനുവരി 12 വരെ ഓണ്‍ലൈനായി അവിവാഹിതരായ യുവാക്കള്‍ക്ക് അപേക്ഷിക്കാം. 1998 ജനുവരി 13നും 2002 ജനുവരി രണ്ടിനും ഇടയില്‍ ജനിച്ചവരായിരിക്കണം. സെലക്ഷന്‍ ടെസ്റ്റ് നടക്കുന്നത് 2018 മാര്‍ച്ച് 10, 11 തീയതികളിലാണ്. 

ഈ സാമ്പത്തിക വര്‍ഷത്തിന്റെ അര്‍ദ്ധവാര്‍ഷികം അവസാനിച്ചപ്പോള്‍ ജില്ലയിലെ ബാങ്കുകള്‍ മൊത്തം 3073.85 കോടി രൂപ വായ്പയായി അനുവദിച്ചു. സാമ്പത്തിക വര്‍ഷം വായ്പയായി നല്‍കാന്‍ ലക്ഷ്യമിട്ടിരിക്കുന്നത് 6506.90 കോടിരൂപയാണ്. സെപ്തംബര്‍ 30 ന് അവസാനിച്ച അര്‍ദ്ധവാര്‍ഷികത്തില്‍ 47 ശതമാനം തുകയാണ് വായ്പയായി അനുവദിച്ചത്. കാര്‍ഷിക മേഖലയില്‍ 1341.27 കോടി രൂപയും(53 ശതമാനം), മുന്‍ഗണനാ മേഖലയില്‍ 1897.86 കോടി രൂപയും(49 ശതമാനം) വായ്പയായി അനുവദിച്ചിട്ടുണ്ട്.

ബാങ്കുകളുടെ പ്രവര്‍ത്തനം അഭിനന്ദനാര്‍ഹമാണെങ്കിലും വിവിധ തലത്തിലെ പ്രവര്‍ത്തനങ്ങള്‍ കൂടുതല്‍ മെച്ചപ്പെടുത്തേണ്ടിയിരിക്കുന്നുവെന്ന് പി.കരുണാകരന്‍ എം.പി പറഞ്ഞു. കലക്ടറേറ്റില്‍ ബാങ്കുകളുടെ അര്‍ദ്ധവാര്‍ഷിക ജില്ലാതല അവലോകയോഗം ഉദ്ഘാടനം ചെയ്യുകയായിരുന്നു അദ്ദേഹം. വായ്പകള്‍ കൊടുക്കാതിരിക്കാമെന്നാണ് ചില ബാങ്കുകള്‍ ശ്രമിക്കുന്നതെന്നും ഇതിന് മാറ്റം വരണമെന്നും എംപി പറഞ്ഞു.

ഹരിതകേരളം മിഷന്‍ രൂപീകരിച്ചതിന്റെ ഒന്നാം വാര്‍ഷികത്തോടനുബന്ധിച്ചുള്ള ജില്ലാതല പരിപാടിയുടെ ഭാഗമായി ജില്ലാ ഇന്‍ഫര്‍മേഷന്‍ ഓഫീസിന്റെ ആഭിമുഖ്യത്തില്‍ ഹരിതകേരളം ഫോട്ടോപ്രദര്‍ശനം നടത്തും. കഴിഞ്ഞ ഒരു വര്‍ഷം  നടത്തിയ പ്രവര്‍ത്തനങ്ങളുടെ ഫോട്ടോകള്‍ പ്രദര്‍ശിപ്പിക്കും. ഇന്ന്  (12്) ഉച്ചയ്ക്ക് രണ്ടിന് ബേഡഡുക്ക കുണ്ടംകുഴി   മാനസം  ഓഡിറ്റോറിയത്തില്‍ ഫോട്ടോപ്രദര്‍ശനം നടക്കും.
 

ഹരിതകേരളം മിഷന്‍ രൂപീകരിച്ചതിന്റെ ഒന്നാം വാര്‍ഷികത്തോടനുബന്ധിച്ചുള്ള ജില്ലാതല പരിപാടി  ഇന്ന്  (12്) ഉച്ചയ്ക്ക് രണ്ടിന് ബേഡഡുക്ക കുണ്ടംകുഴി   മാനസം  ഓഡിറ്റോറിയത്തില്‍ നടക്കും. പി.കരുണാകരന്‍ എം.പി ഉദ്ഘാടനം ചെയ്യും.  കെ.കുഞ്ഞിരാമന്‍ എം.എല്‍.എ അധ്യക്ഷത വഹിക്കും. വാര്‍ഷികത്തോടനുബന്ധിച്ച്  കഴിഞ്ഞ ഒരു വര്‍ഷം  നടന്ന പ്രവര്‍ത്തനങ്ങളുടെ ഫോട്ടോ പ്രദര്‍ശനം, വിവിധ ഉപമിഷനുകളില്‍ നടന്ന പ്രവര്‍ത്തനങ്ങളുടെ അവതരണം, ബേഡകം അരിയുടെ  വിപണനോദ്ഘാടനം എന്നിവ നടക്കും.     ബേഡകം അരിയുടെ വിപണനോദ്ഘാടനം ജില്ലാ പഞ്ചായത്ത് പ്രസിഡന്റ് എ.ജി.സി.ബഷീര്‍ നിര്‍വഹിക്കും.

കൊച്ചി: സ്വതന്ത്രവും ജനാധിപത്യമൂല്യങ്ങളില്‍ അടിയുറച്ചതുമായിരിക്കണം ഉന്നത വിദ്യാഭ്യാസ രംഗമെന്ന് മുഖ്യമന്ത്രി പിണറായി വിജയന്‍. കാലടി ശ്രീശങ്കര സംസ്‌കൃത സര്‍വകലാശാലയുടെ രജത ജൂബിലി ആഘോഷങ്ങള്‍ ഉദ്ഘാടനം ചെയ്യുകയായിരുന്നു അദ്ദേഹം.  

എന്നാല്‍ ഇതിന് അനുയോജ്യമായ സാഹചര്യമല്ല രാജ്യത്ത് നിലനില്‍ക്കുന്നത്. ഇന്ത്യയിലെ കലാലയങ്ങളില്‍ നിന്നുയരുന്ന പ്രതിഷേധങ്ങള്‍ ഇതു സൂചിപ്പിക്കുന്നു. ഭാഷയ്ക്കും മാനവിക വിഷയങ്ങള്‍ക്കും പ്രാധാന്യം കുറയ്ക്കുകയും കമ്പോള ശക്തികള്‍ക്ക് അനുയോജ്യമായ പൗരന്മാരെ സൃഷ്ടിക്കുന്നതാണ് കേന്ദ്ര സര്‍ക്കാരിന്റെ വിദ്യാഭ്യാസ നയം.