ഹയര്‍സെക്കണ്ടറി ഏകജാലക പ്രവേശനം
ഏകജാലക സംവിധാനത്തിലൂടെയുള്ള പ്ലസ് വണ്‍ പ്രവേശനത്തിനായുള്ള അപേക്ഷകള്‍ ഓണ്‍ലൈനായി സമര്‍പ്പിക്കാനുള്ള സൗകര്യം അഡ്മിഷന്‍ വെബ്‌സൈറ്റില്‍ (www.hscap.kerala.gov.in) ലഭ്യമാണ്.
അപേക്ഷ ഓണ്‍ലൈനായി സമര്‍പ്പിക്കാന്‍ സ്‌കൂളുകളിലെ കമ്പ്യൂട്ടര്‍ ലാബ്/ഇന്റര്‍നെറ്റ് സൗകര്യം ലഭിക്കും. മറ്റു മാര്‍ഗ നിര്‍ദ്ദേശങ്ങള്‍ നല്‍കുന്നതിന് അധ്യാപകരുടെ സേവനവും സംസ്ഥാനത്തെ എല്ലാ സര്‍ക്കാര്‍ /എയ്ഡഡ് ഹയര്‍സെക്കണ്ടറി സ്‌കൂളുകളിലും അതത് പ്രിന്‍സിപ്പല്‍മാരുടെ നേതൃത്വത്തില്‍ പ്രവര്‍ത്തിക്കുന്ന ഹെല്‍പ്പ് ഡെസ്‌കുകള്‍ മുഖേന സജ്ജമാക്കിയിട്ടുണ്ട്. അപേക്ഷ ഓണ്‍ലൈനായി സമര്‍പ്പിക്കാനുള്ള അവസാന തീയതി ഈ മാസം 30 വരെ ദീര്‍ഘിപ്പിച്ചു.
ഓണ്‍ലൈനായി സമര്‍പ്പിക്കുന്ന അപേക്ഷയുടെ രണ്ട് പേജുള്ള പകര്‍പ്പും അനുബന്ധരേഖകളും ജില്ലയിലെ ഏതെങ്കിലും ഒരു സര്‍ക്കാര്‍ /എയ്ഡഡ് ഹയര്‍സെക്കണ്ടറി സ്‌കൂളില്‍ വെരിഫിക്കേഷനായി മെയ് 30 വൈകുന്നേരം അഞ്ചിന് മുന്‍പ് സമര്‍പ്പിക്കണം. ഓണ്‍ലൈനായി അപേക്ഷ അന്തിമമായി സമര്‍പ്പിച്ച ശേഷം ഏതെങ്കിലും തരത്തിലുള്ള തെറ്റുകള്‍ അപേക്ഷകര്‍ കണ്ടെത്തിയാല്‍ ആ വിവരം ഓണ്‍ലൈന്‍ അപേക്ഷയുടെ പകര്‍പ്പും അനുബന്ധ രേഖകളും വെരിഫിക്കേഷനായി സമര്‍പ്പിക്കുന്ന സ്‌കൂള്‍ പ്രിന്‍സിപ്പാളിനെ അറിയിച്ച് തിരുത്താവുന്നതാണ്.
പി.എന്‍.എക്‌സ്.1841/18
- Log in to post comments