വനിതകള്‍ക്കായി തൊഴില്‍ മേള സംഘടിപ്പിച്ചു.
അഭ്യസ്ഥവിദ്യരും തൊഴിലന്വേഷകരുമായ വനിതകള്‍ക്ക് തൊഴിലവസരം ഒരുക്കുകയെന്ന ലക്ഷ്യത്തോടെ നോളജ് എകണോമി മിഷനും കുടുംബശ്രീ ജില്ലാ മിഷനും വനിതകള്‍ക്കായി പ്രത്യേക തൊഴില്‍ മേള സംഘടിപ്പിച്ചു. പാലക്കാട് ഗവ വിക്ടോറിയ കോളേജില്‍ നടന്ന തൊഴില്‍ മേള ജില്ലാ പഞ്ചായത്ത് പ്രസിഡന്റ് ബിനുമോള്‍ കെ ഉദ്ഘാടനം ചെയ്തു. കുടുംബശ്രീ കമ്മ്യൂണിറ്റി ഡവലപ്പ്മെന്റ് സൊസൈറ്റികള്‍ കേന്ദ്രീകരിച്ച് സമര്‍ത്ഥരായ വനിതാ തൊഴില്‍ അന്വേഷകരെ കണ്ടെത്തി നോളജ് ജോബ് യൂണിറ്റുകള്‍ രൂപീകരിക്കുകയും വര്‍ക്ക് റെഡിനസ് പ്രോഗ്രാമുകള്‍, വ്യക്തിത വികസന പരിശീലനങ്ങള്‍, റോബോട്ടിക് ഇന്റര്‍വ്യൂ, ഇംഗ്ലീഷ് ഭാഷ പരിശോധന ഉള്‍പ്പെടെ നിരവധി ഗ്രൂമിംഗ് കോഴ്‌സുകളിലൂടെ പരിശീലനം നല്‍കിയ ഉദ്യോഗാര്‍ത്ഥികളെയാണ് തൊഴില്‍ മേളയില്‍ പങ്കെടുപ്പിച്ചത്. മേളയില്‍ 47 തൊഴില്‍ ദാതാക്കള്‍ നേരിട്ടും 20 തൊഴില്‍ ദാതാക്കള്‍ ഓണ്‍ലൈനായും പങ്കെടുത്തു. 1082 പേര്‍ തൊഴില്‍മേളയില്‍ പങ്കെടുത്തു. ഗവ വിക്ടോറിയ കോളേജ് പ്രിന്‍സിപ്പാള്‍ ഡോ. മായ.സി നായറുടെ അധ്യക്ഷയായി. കുടുംബശ്രീ സ്റ്റേറ്റ് അസിസ്റ്റന്റ് പ്രോഗ്രാം മാനേജര്‍ എ. ശ്രീജ, കേരള നോളജ് മിഷന്‍ റീജ്യണല്‍ പ്രോഗ്രാം മാനേജര്‍ എം.എ സുമി, ഐ.സി.ടി അക്കാദമി പ്രോഗ്രാം മേധാവി ബിജു സോമന്‍ കുടുംബശ്രീ ജില്ലാ പ്രോഗ്രാം മാനേജര്‍ എ.ജി ഫൈസല്‍ എന്നിവര്‍ സംസാരിച്ചു.
- Log in to post comments