ദേശീയ ആയുര്‍വേദ ദിനാചരണം നവംബര്‍ അഞ്ചിന്
ഭാരതീയ ചികിത്സാ വകുപ്പിന്റെയും നാഷണല്‍ ആയുഷ് മിഷന്റെയും സംയുക്താഭിമുഖ്യത്തില്‍ നവംബര്‍ അഞ്ചിന് ആയുര്‍വേദ ദിനാചരണം സംഘടിപ്പിക്കും. ജില്ലാതല ഉദ്ഘാടനം ജില്ലാ ആയുര്‍വേദാശുപത്രിയില്‍ ജില്ലാ പഞ്ചായത്ത് പ്രസിഡന്റ് സണ്ണി പാമ്പാടി നിര്‍വഹിക്കും. പരിപാടിയുടെ ഭാഗമായി ജീവിതശൈലി രോഗങ്ങള്‍ക്കും പ്രമേഹത്തിനും പ്രത്യേക മെഡിക്കല്‍ ക്യാമ്പും ആയുര്‍വേദവും പൊതുജനാരോഗ്യവും എന്ന വിഷയത്തില്‍ ബോധവത്കരണ ക്ലാസും നടത്തും. പ്രമേഹരോഗനിര്‍ണ്ണയത്തിനും അസ്ഥിരോഗനിര്‍ണ്ണയത്തിനുമാവശ്യമായ രക്ത പരിശോധന നടത്തും. അന്നേ ദിവസം രജിസ്റ്റര്‍ ചെയ്യുന്നവര്‍ക്ക് ജീവിത ശൈലി രോഗങ്ങള്‍ക്കും പ്രമേഹത്തിനും ആവശ്യമായ പ്രത്യേകയോഗ പരിശീലനം ഒരാഴ്ചയ്ക്ക് തുടര്‍ച്ചയായി നല്‍കും.
ആയുഷ് ഗ്രാമം പദ്ധതിയുടെ ഭാഗമായി പള്ളം ബ്ലോക്കിലെ തെരഞ്ഞെടുക്കപ്പെട്ട സ്‌കൂളുകളില്‍ ആയുര്‍വേദ പ്രശ്‌നോത്തരി, പോസ്റ്റര്‍ ഡിസൈനിംഗ് മത്സരം, ബോധവത്ക്കരണ ക്ലാസുകള്‍, ഔഷധ സസ്യപ്രദര്‍ശനം തുടങ്ങിയ പരിപാടികള്‍ സംഘടിപ്പിക്കും. ചടങ്ങില്‍ മുതിര്‍ന്ന ഡോക്ടര്‍മാരെ ആദരിക്കും. പാലാ ആയുര്‍വേദ ആശുപത്രിയില്‍ കൗമാരഭൃത്യം പദ്ധതിയമായ് ബന്ധപ്പെട്ട് കുട്ടികളിലെ പ്രമേഹത്തെ പറ്റി ബോധവത്ക്കരണ ക്ലാസുകള്‍ സംഘടിപ്പിക്കും.
- Log in to post comments