എന്റെ കേരളം: ജനശ്രദ്ധയാകര്‍ഷിച്ച് കൃഷിവകുപ്പിന്റെ സ്റ്റാളുകള്‍
രണ്ടാം പിണറായി സര്‍ക്കാറിന്റെ നാലാം വാര്‍ഷിക ആഘോഷത്തിന്റെ ഭാഗമായി കണ്ണൂര്‍ പോലീസ് മൈതാനിയില്‍ നടക്കുന്ന എന്റെ കേരളം പ്രദര്‍ശന വിപണന മേളയില്‍ ഒരുക്കിയ കൃഷിവകുപ്പിന്റെ സ്റ്റാളുകള്‍ ശ്രദ്ധേയമായി. തീം പവലിയനില്‍ ഒരുക്കിയിരിക്കുന്ന കൃഷി വകുപ്പിന്റെ സ്റ്റാള്‍ ഡിജിറ്റല്‍ അഗ്രികള്‍ച്ചര്‍ മേഖലയിലെ പ്രവര്‍ത്തനങ്ങള്‍ പൊതുജനങ്ങള്‍ക്ക് അനുഭവഭേദ്യമാകുന്ന തരത്തിലാണ് സജ്ജീകരിച്ചിരിക്കുന്നത്.
ഡ്രോണുകളുടെ കൃഷിയിടത്തിലെ സാധ്യതകളെക്കുറിച്ച് കര്‍ഷകര്‍ക്കും പൊതുജനങ്ങള്‍ക്കുമിടയില്‍ അവബോധം സൃഷ്ടിക്കുന്നതിനും ഡ്രോണ്‍ പ്രവര്‍ത്തനങ്ങള്‍ അടുത്തറിയുന്നതിന് ലൈവ് ഡെമോണ്‍സ്ട്രഷനും സ്റ്റാളിലുണ്ട്.
കൃഷി വകുപ്പിന്റെ കേരള ഗ്രോ ഉല്‍പ്പന്നങ്ങളുടെയും മില്ലറ്റ് ഉല്‍പ്പന്നങ്ങളുടെയും പ്രദര്‍ശനവും സ്റ്റാളില്‍ ഒരുക്കിയിട്ടുണ്ട്. കാര്‍ഷിക സേവനങ്ങള്‍ ഒരു കുടക്കീഴില്‍ ലഭിക്കുന്ന കതിര്‍ ആപ്പ് രജിസ്‌ട്രേഷന്റെ ഹെല്‍പ് ഡെസ്‌ക്കും കൃഷി വകുപ്പ് നടപ്പിലാക്കുന്ന വിവിധ ഫ്‌ളാഗ്ഷിപ്പ് പദ്ധതികളെ സംബന്ധിച്ച വിവരങ്ങള്‍ ലഭ്യമാക്കുന്ന ഹെല്‍പ്പ് ഡസ്‌ക്കുകളും തീം പവലിയനില്‍ ഒരുക്കിയത് സന്ദര്‍ശകര്‍ക്ക് ഗുണപ്രദമായി. വിളകളിലെ രോഗ കീട നിയന്ത്രണം സംബന്ധിച്ച സമഗ്രമായ വിവരങ്ങള്‍ ലഭ്യമാക്കുന്ന ക്രോപ്പ് ഹെല്‍ത്ത് ക്ലിനിക്കും പ്ലാന്റ് ഡോക്ടര്‍ സേവനവും സ്റ്റാളില്‍ ലഭിക്കും.
ഇതിനുപുറമെ 1500 സ്‌ക്വയര്‍ ഫീറ്റില്‍ ഒരുക്കിയിരിക്കുന്ന നടീല്‍ വസ്തുക്കളുടെയും കാര്‍ഷിക മൂല്യ വര്‍ധിത ഉല്‍പന്നങ്ങളുടെയും പ്രദര്‍ശന വിപണന മേളയും പൊതുജന പങ്കാളിത്തം കൊണ്ട് സജീവമാണ്. വിവിധ കാര്‍ഷിക ഉല്‍പ്പന്നങ്ങള്‍ വാങ്ങുന്നതിനുള്ള സൗകര്യവും ഇവിടെയുണ്ട്. മേള മെയ് 14 ന് അവസാനിക്കും.
- Log in to post comments