സൈബർ സുരക്ഷ ദേശീയ സുരക്ഷക്കും പൗരക്ഷേമത്തിനും അത്യന്താപേക്ഷിതം - മുഖ്യമന്ത്രി പിണറായി വിജയൻ

സൈബർ സുരക്ഷാ കോൺഫറൻസ് ‘കൊക്കൂൺ-2025’ സമാപിച്ചു

സാമ്പത്തിക സ്ഥിരത, പൗരന്മാരുടെ സുരക്ഷ, സംസ്ഥാന പരമാധികാരം എന്നിവയ്ക്ക് സൈബർ ഇടം സംരക്ഷിക്കേണ്ടത് അത്യന്താപേക്ഷിതമാണെന്ന് മുഖ്യമന്ത്രി പിണറായി വിജയൻ. കേരള പോലീസ് സംഘടിപ്പിച്ച സൈബർ സുരക്ഷാ കോൺഫറൻസ് ‘കൊക്കൂൺ-2025’ സമാപന സമ്മേളനത്തിൽ സംസാരിക്കുകയായിരുന്നു മുഖ്യമന്ത്രി. 

വർഷങ്ങളായി സൈബർ സുരക്ഷാ അവബോധം, നയരൂപീകരണം, നവീകരണം എന്നിവയ്ക്കുള്ള രാജ്യത്തെ മുൻനിര വേദിയായി കൊക്കൂൺ വളർന്നു കഴിഞ്ഞു. ഇത് കേരളത്തെ സൈബർ സുരക്ഷാ ഭരണത്തിൻ്റെ ദേശീയ കേന്ദ്രമായും, ഇന്ത്യയുടെ ഡിജിറ്റൽ സുരക്ഷാ സംവിധാനത്തിന് പ്രധാന സംഭാവന നൽകുന്ന സംസ്ഥാനമായും കേരളത്തെ അടയാളപ്പെടുത്തുന്നു.

ആരോഗ്യം മുതൽ ഗതാഗതം, പൗര സൗകര്യങ്ങൾ വരെ, ജീവിതത്തെയും ഭരണത്തെയും നിലനിർത്തുന്ന എല്ലാ അവശ്യ സംവിധാനങ്ങളിലേക്കും ഇന്ന് സൈബർ സുരക്ഷ വ്യാപിക്കുന്നുവെന്ന് അദ്ദേഹം പറഞ്ഞു. 

ആർട്ടിഫിഷ്യൽ ഇൻ്റലിജൻസ് (AI), ഡിജിറ്റൽ ഫോറൻസിക്സ്, പൊതുമേഖലാ സൈബർ പ്രതിരോധശേഷി എന്നിവയെക്കുറിച്ചുള്ള ആഗോള ചർച്ചകളുടെ മുൻനിരയിൽ കേരളം എത്തിച്ചേർന്നിരിക്കുന്നു. സൈബർ ശേഷി വർദ്ധിപ്പിക്കുന്നതിലും ബാല സംരക്ഷണ സാങ്കേതികവിദ്യയിലും കേരളം നടത്തിയ മുൻനിര ശ്രമങ്ങളെ 2025 പതിപ്പ് ശക്തിപ്പെടുത്തും.

പരിപാടിയിൽ ഇരുപതിലധികം രാജ്യങ്ങളിൽ നിന്നുള്ള പങ്കാളിത്തം കേരളത്തിൻ്റെ ദൃശ്യപരത വർദ്ധിപ്പിക്കും. പോലീസ്-ഇൻ്റലിജൻസ് ഏജൻസികളിലെ ഉദ്യോഗസ്ഥരുടെ അന്വേഷണപരവും സാങ്കേതികവുമായ കഴിവുകൾ ശക്തിപ്പെടുത്തുന്നതിനായി വിൻഡോസ് കേർണൽ ചൂഷണം, മൾട്ടി-ക്ലൗഡ് സുരക്ഷ, റെഡ് ടീം ഓപ്പറേഷൻസ് തുടങ്ങിയ വിഷയങ്ങളിൽ പരിശീലന സെഷനുകൾ ആസൂത്രണം ചെയ്തിട്ടുണ്ട്.

ഈ വർഷം റേഡിയോ കൺട്രോൾഡ് ( ആർ.സി) എഞ്ചിനീയറിംഗ് വില്ലേജ് എന്ന പേരിൽ ഒരു പുതിയ ഇന്നൊവേഷൻ സോൺ അവതരിപ്പിച്ചിട്ടുണ്ട്. റേഡിയോ ഫ്രീക്വൻസി ഡ്രോൺ, ടെലിമെട്രി അധിഷ്ഠിത എഞ്ചിനീയറിംഗ് ആപ്ലിക്കേഷനുകൾ എന്നിവയ്ക്കായി സമർപ്പിച്ചിട്ടുള്ളതാണിത്. ദേശീയ സുരക്ഷയുമായി ബന്ധപ്പെട്ട ഡ്രോൺ, കൗണ്ടർ-ഡ്രോൺ സാങ്കേതികവിദ്യകളിൽ എഞ്ചിനീയറിംഗ് വിദ്യാർത്ഥികളെ ഉൾപ്പെടുത്തി പ്രായോഗികമായ നവീകരണത്തിനും വൈദഗ്ധ്യ വികസനത്തിനും ആർ.സി വില്ലേജ് പ്രോത്സാഹനം നൽകും.

ഇ-ഗവേണൻസ് കൂടുതൽ ഡിജിറ്റലൈസ് ചെയ്യപ്പെടുന്ന സാഹചര്യത്തിൽ സൈബർ ആക്രമണങ്ങളെയും കുറ്റകൃത്യങ്ങളെയും നേരിടാൻ ഇലക്ട്രോണിക് സർക്കാരുകളും വേണ്ടത്ര തയ്യാറെടുക്കേണ്ടതുണ്ട്. സൈബർ-ഹൈടെക് കുറ്റകൃത്യങ്ങളിലെ ഏറ്റവും പുതിയ പ്രവണതകളെക്കുറിച്ച്, പ്രത്യേകിച്ച് സ്ത്രീകളെയും കുട്ടികളെയും കേന്ദ്രീകരിച്ച്, ചർച്ച ചെയ്യാനും വിദ്യാഭ്യാസം നൽകാനും അവബോധം പ്രചരിപ്പിക്കാനുമുള്ള വേദിയാണ് കൊക്കൂൺ സമ്മേളനം. സൈബർ ലോകത്തെ മെച്ചപ്പെട്ടതും സുരക്ഷിതവുമായ ഒരിടമാക്കി മാറ്റുന്നതിന് സർക്കാർ സ്ഥാപനങ്ങൾ, അന്വേഷണ ഏജൻസികൾ, അക്കാദമികൾ, വ്യവസായ പ്രമുഖർ എന്നിവർക്ക് മെച്ചപ്പെട്ട ഏകോപനത്തിനായി ഒരു സൗകര്യപ്രദമായ വേദി ഒരുക്കാനും ഇത് ലക്ഷ്യമിടുന്നു. കുട്ടികളും യുവാക്കളും സൈബർ ലോകത്ത് നിരന്തരമായ ഭീഷണിയിലായതിനാൽ, സോഷ്യൽ നെറ്റ്‌വർക്കിംഗ് സൈറ്റുകൾ ഉപയോഗിക്കുന്നതിന് മുമ്പുള്ള സുരക്ഷാ നടപടികളെക്കുറിച്ച് കുട്ടികൾക്കും രക്ഷിതാക്കൾക്കും വിദ്യാഭ്യാസം നൽകേണ്ടതുണ്ടെന്നും അദ്ദേഹം കൂട്ടിച്ചേർത്തു.

സൈബർഡോം, ഡ്രോൺ ഫോറൻസിക് ലാബ്, കൗണ്ടറിംഗ് ചൈൽഡ് സെക്ഷ്വൽ എക്സ്പ്ലോയിറ്റേഷൻ സെൽ തുടങ്ങിയ കേരള പോലീസിൻ്റെ അതുല്യമായ പദ്ധതികൾ ലോകമെമ്പാടും അംഗീകരിക്കപ്പെട്ടിട്ടുണ്ട്. കേരള പോലീസ് മികച്ച രീതികൾ ഉപയോഗിച്ച് സൈബർ സുരക്ഷ മെച്ചപ്പെടുത്താൻ നിരന്തരം പ്രവർത്തിക്കുന്നു. 

കൊക്കൂൺ സമ്മേളനം കേരളത്തിലെ പോലീസ് ഉദ്യോഗസ്ഥർക്കും സൈബർ വിദഗ്ധർക്കും മാത്രമല്ല, മറ്റ് സംസ്ഥാനങ്ങളിലെയും രാജ്യങ്ങളിലെയും എല്ലാ നിയമ നിർവ്വഹണ ഏജൻസികൾക്കും ഉദ്യോഗസ്ഥർക്കും സഹായകമാകും. സൈബർ കുറ്റകൃത്യങ്ങൾ ഇല്ലാത്ത ഒരു സുരക്ഷിത ഡിജിറ്റൽ ലോകം യാഥാർത്ഥ്യമാക്കാൻ ഒരുമിച്ചു പ്രവർത്തിക്കാമെന്നും മുഖ്യമന്ത്രി പറഞ്ഞു. 

സമാപന പരിപാടിയിൽ കുട്ടികളുടെ ഓൺലൈൻ സുരക്ഷ ഉറപ്പാക്കുന്നതിനുള്ള സുപ്രധാനമായ 'പ്രഖ്യാപനം' (Declaration on Online Safety of Children) മുഖ്യമന്ത്രി പിണറായി വിജയൻ പ്രകാശനം ചെയ്തു. 

വ്യവസായ വകുപ്പ് മന്ത്രി പി രാജീവ് പരിപാടിയിൽ അധ്യക്ഷനായി. സൈബർ സുരക്ഷാ രംഗത്ത് കേരളത്തെ ആഗോള ഹബ്ബാക്കി മാറ്റുമെന്നും, മനുഷ്യന്റെ അറിവിനെ ആർട്ടിഫിഷ്യൽ ഇന്റലിജൻസുമായി സമന്വയിപ്പിച്ച് സുരക്ഷിതമായ ഡിജിറ്റൽ ഭാവി കെട്ടിപ്പടുക്കുമെന്നും മന്ത്രി പറഞ്ഞു. സൈബർ സുരക്ഷ ഇനി പോലീസിൻ്റെ പ്രശ്നം മാത്രമല്ല, വ്യവസായത്തിന്റെയും സാമ്പത്തിക വളർച്ചയുടെയും അനിവാര്യതയാണ്. ആർട്ടിഫിഷൽ ഇന്റലിജൻസ്, റോബോട്ടിക്സ് എന്നിവയ്ക്കായുള്ള ഡിജിറ്റൽ സയൻസ് പാർക്ക് സ്ഥാപിച്ചതും, സൈബർ ഡോം മാതൃകയും കേരളത്തിന്റെ പുരോഗതിക്ക് തെളിവാണ്. ഡീപ്‌ഫേക്കുകൾ പോലുള്ള പുതിയ വെല്ലുവിളികളെ നേരിടുന്നതിനും യുവ സൈബർ പ്രതിഭകളെ വളർത്തുന്നതിനും കേരള പോലീസ് സജീവമായി ഇടപെടുന്നതായും അദ്ദേഹം കൂട്ടിച്ചേർത്തു. 

കൊക്കൂൺ സൈബർ സുരക്ഷ സമ്മേളനത്തോടനുബന്ധിച്ച് സംഘടിപ്പിച്ച ഡോം സി.ടി.എഫ് 2025, ലോ എൻഫോഴ്സ്മെന്റ് അവാർഡ് തുടങ്ങിയ വിവിധ ഇനങ്ങളിൽ വിജയികൾക്കുള്ള ബഹുമതികൾ മന്ത്രി പി രാജീവ് വിതരണം ചെയ്തു. 

കൊച്ചി കോർപ്പറേഷൻ മേയർ അഡ്വ. എം അനിൽകുമാർ, സംസ്ഥാന വിജിലൻസ് മേധാവിയും ഡിജിപിയുമായ മനോജ് എബ്രഹാം, ഡിജിപി & സംസ്ഥാന പൊലീസ് മേധാവിയുമായ റവാഡ ചന്ദ്രശേഖർ, എഡിജിപി എസ് ശ്രീജിത്, ഐ.ജി പി പ്രകാശ്, ചൈല്‍ഡ് ലൈറ്റ് ഉദ്യേഗസ്ഥരായ പോള്‍ സ്റ്റാൻ ഫീള്‍ഡ്, പ്രൊഫ. ഡെബോറ ഫ്രൈ, സൈബർ ഓപ്പറേഷൻസ് എസ്പ അങ്കിത് അശോകൻ തുടങ്ങിയവർ ചടങ്ങിൽ പങ്കെടുത്തു.