അക്ഷരോന്നതി' മഹത്തായ പദ്ധതി: ജില്ലാ പഞ്ചായത്ത്‌ പ്രസിഡന്റ്‌ എ മഹേന്ദ്രൻ

*വായനാശീലം വളര്‍ത്താനുള്ള പദ്ധതിക്ക് തുടക്കമായി 

പട്ടികജാതി-പട്ടികവർഗ വിദ്യാർഥികളിൽ വായനാശീലം വർധിപ്പിക്കുകയെന്ന ലക്ഷ്യത്തോടെ തദ്ദേശ സ്വയംഭരണ വകുപ്പിന്റെ നേതൃത്വത്തിൽ നടപ്പിലാക്കുന്ന അക്ഷരോന്നതി പദ്ധതിക്ക് ജില്ലയിൽ തുടക്കം. ജില്ലാ പഞ്ചായത്ത്‌ പ്രസിഡന്റ്‌ എ മഹേന്ദ്രൻ പദ്ധതിയുടെ ജില്ലാതല ഉദ്ഘാടനം നിർവഹിച്ചു. വായനയുടെ പ്രാധാന്യവും പ്രസക്തിയും ഉൾക്കൊണ്ട് ആവിഷ്കരിച്ച 'അക്ഷരോന്നതി' മഹത്തായ പദ്ധതിയാണെന്ന് ജില്ലാ പഞ്ചായത്ത് പ്രസിഡന്റ് പറഞ്ഞു.  വിദ്യാഭ്യാസ നിലവാരം മെച്ചപ്പെടുത്തുന്നതിന്റെ ഭാഗമായി പ്രൈമറിതലം മുതൽ വായന നിർബന്ധിത ശീലമാക്കണം. വായന കേവലം അക്കാദമിക് ആവശ്യത്തിന് മാത്രമാകുന്ന  പ്രവണത ഏറി വരുകയാണ്. അതുകൊണ്ടുതന്നെ ശാസ്ത്ര-സാങ്കേതിക പഠന മേഖലകളിലുൾപ്പെടെ വായനയ്ക്കുവേണ്ടി പ്രത്യേക സിലബസ് തന്നെ ഉണ്ടാക്കണമെന്നും അദ്ദേഹം പറഞ്ഞു.   

ജില്ലാ പഞ്ചായത്ത് ഹാളിൽ നടന്ന പരിപാടിയിൽ  ജില്ലാ പഞ്ചായത്ത് വൈസ് പ്രസിഡന്റ്  അഡ്വ. ഷീന സനൽകുമാർ അധ്യക്ഷയായി. എൽ എസ് ജി ഡി ജോയിൻ ഡയറക്ടർ ഇൻ ചാർജ് സി അലക്സ്  മുഖ്യപ്രഭാഷണം നടത്തി. എൽ എസ് ഡി ജൂനിയർ സൂപ്രണ്ട് എസ്.സുജാത, ആർജിഎസ്എ കമ്മ്യൂണിറ്റി ഡെവലപ്മെന്റ് വിദഗ്ധ നൈസി ഫ്രാൻസിസ്, ജില്ലാ പഞ്ചായത്ത് സ്ഥിരംസമിതി അധ്യക്ഷരായ  ജ്യോതിമോൾ, അംബുജാക്ഷി ടീച്ചർ, എസ് രാധാകൃഷ്ണൻ, ജില്ലാ ജില്ലാ പഞ്ചായത്ത് അംഗം അനില രാജു, സാക്ഷരതാ മിഷൻ സെക്രട്ടറി കെ.വി രതീഷ്, ആർജിഎസ്എ ബ്ലോക്ക് കോഡിനേറ്റർ ടി രാഹുൽ തുടങ്ങിയവർ പങ്കെടുത്തു.

പഠനമുറികള്‍ ഒരുക്കൽ, ഹോസ്റ്റലുകളില്‍ വായന സൗകര്യമൊരുക്കല്‍, പുസ്തകങ്ങളുടെ ലഭ്യതക്കുറവ് പരിഹരിക്കല്‍, വിദ്യാർഥികളില്‍ വായനാശീലം വളര്‍ത്തല്‍, പൊതുജനങ്ങളില്‍ പുസ്തകദാനം പ്രോത്സാഹിപ്പിക്കല്‍ എന്നിവയാണ് പദ്ധതിയുടെ ലക്ഷ്യം. തദ്ദേശ സ്വയംഭരണ സ്ഥാപനങ്ങള്‍, കോളേജുകള്‍, സ്‌കൂള്‍ എന്‍എസ്എസ് യൂണിറ്റുകള്‍, ലൈബ്രറികള്‍, പ്രാദേശികതല കൂട്ടായ്മകള്‍ എന്നിവ കേന്ദ്രീകരിച്ച് പുസ്തകങ്ങള്‍ ശേഖരിച്ച് എസ്‌ സി, എസ് ടി വിദ്യാർഥികൾക്ക് വായനയ്ക്ക് സൗകര്യമൊരുക്കുന്ന രീതിയിലാണ് പദ്ധതി ആവിഷ്കരിച്ചിരിക്കുന്നത്. പദ്ധതിയുടെ ഭാഗമായി വരും ദിവസങ്ങളിൽ ജില്ലയിൽ പുസ്തക ശേഖരണ പ്രവർത്തനങ്ങൾ ആരംഭിക്കും.