ഓണസമ്മാനമായി മാക്കേക്കടവ്–നേരേകടവ് പാലം ഉദ്ഘാടനം ചെയ്യണം-  കെ. സി. വേണുഗോപാൽ എം.പി.യും ഡെപ്യൂട്ടി സ്പീക്കർ ഷാനിമോൾ ഉസ്മാനും  ആവശ്യപ്പെട്ടു

ജനങ്ങൾക്കുള്ള ഓണസമ്മാനമായി മാക്കേക്കടവ് – നേരേകടവ് പാലം ഉദ്ഘാടനം ചെയ്യണമെന്ന് കെ. സി. വേണുഗോപാൽ എം.പി.യും ഡെപ്യൂട്ടി സ്പീക്കർ ഷാനിമോൾ ഉസ്മാനും ആവശ്യപ്പെട്ടു.

​തുറവൂർ - പമ്പാ പാതയുടെ ഭാഗമായുള്ള രണ്ടാമത്തെ പാലമായ മാക്കേക്കടവ് – നേരേകടവ് പാലത്തിന്റെ നിർമ്മാണ പുരോഗതി വിലയിരുത്തുന്നതിന്റെ ഭാഗമായി കെ. സി. വേണുഗോപാൽ എം.പി.യും ഡെപ്യൂട്ടി സ്പീക്കർ ഷാനിമോൾ ഉസ്മാനും പാലം സന്ദർശിക്കുകയും അവലോകന യോഗം ചേരുകയും ചെയ്തു.

​പാലത്തിന്റെ നിർമ്മാണത്തിന്റെ 80 ശതമാനത്തിലധികം പ്രവൃത്തികൾ പൂർത്തീകരിച്ചിട്ടുണ്ട്. നേരേകടവ് ഭാഗത്തെ അപ്രോച്ച് റോഡിന്റെ റീട്ടെയിനിംഗ് വാളിന്റെ പ്രവൃത്തി അവസാനഘട്ടത്തിലാണ്. പാലത്തിലെ നടപ്പാതയുടെ നിർമ്മാണം 60 ശതമാനത്തിലധികം പൂർത്തിയായിട്ടുണ്ട്. കാലാവസ്ഥ അനുകൂലമാണെങ്കിൽ പെയിന്റിംഗ്, ഇലക്ട്രിഫിക്കേഷൻ, ഉപരിതല ടാറിംഗ് ജോലികൾ പൂർത്തീകരിച്ച് ഓഗസ്റ്റ് മാസം പതിനഞ്ചാം തീയതിക്ക് മുമ്പ് നിർമ്മാണം പൂർത്തിയാക്കാൻ കഴിയുമെന്ന് യോഗം വിലയിരുത്തി.

​വൈക്കം എം.എൽ.എ. കെ. ബിനിമോൻ, ആലപ്പുഴ ജില്ലാ കളക്ടർ ഷാജി വി. നായർ, കോട്ടയം ജില്ലാ കളക്ടർ ചേതൻ കുമാർ മീണ, തദ്ദേശ സ്വയംഭരണ സ്ഥാപന അധ്യക്ഷന്മാർ, പൊതുമരാമത്ത് (ബ്രിഡ്ജസ്) വിഭാഗം ഉദ്യോഗസ്ഥർ, ജനപ്രതിനിധികൾ, മറ്റ് വകുപ്പുകളിലെ ഉദ്യോഗസ്ഥർ എന്നിവരും യോഗത്തിൽ പങ്കെടുത്തു.