കേരള സംസ്ഥാന പിന്നോക്ക വിഭാഗ വികസന കോർപ്പറേഷൻ (KSBCDC) ക്ഷേമപദ്ധതികളുടെ സംസ്ഥാനതല ഉദ്ഘാടനം 'സമഗ്ര - 2026' ജൂലൈ 23-ന് കൊച്ചിയിൽ; മുഖ്യമന്ത്രി വി.ഡി. സതീശൻ ഉദ്ഘാടനം ചെയ്യും

കേരള സംസ്ഥാന പിന്നോക്ക വിഭാഗ വികസന കോർപ്പറേഷൻ (KSBCDC) ക്ഷേമപദ്ധതികളുടെ സംസ്ഥാനതല ഉദ്ഘാടനം 'സമഗ്ര - 2026' ജൂലൈ 23-ന് കൊച്ചിയിൽ; മുഖ്യമന്ത്രി വി.ഡി. സതീശൻ ഉദ്ഘാടനം ചെയ്യും

കേരള സംസ്ഥാന പിന്നോക്ക വിഭാഗ വികസന കോർപ്പറേഷൻ (KSBCDC) സംസ്ഥാന സർക്കാരിന്റെ നൂറുദിന കർമ്മപരിപാടിയുടെ ഭാഗമായി നടപ്പിലാക്കുന്ന വിവിധ ക്ഷേമപദ്ധതികളുടെ സംസ്ഥാനതല ഉദ്ഘാടനം 'സമഗ്ര - 2026' എന്ന പേരിൽ നടക്കും. ജൂലൈ 23 -ന് കൊച്ചി പള്ളുരുത്തി എസ്.എൻ ഓഡിറ്റോറിയത്തിൽ വെച്ചാണ് ചടങ്ങ് സംഘടിപ്പിച്ചിരിക്കുന്നത്. കേരള മുഖ്യമന്ത്രി വി. ഡി. സതീശൻ പരിപാടിയുടെ ഔദ്യോഗിക ഉദ്ഘാടനം നിർവ്വഹിക്കും. പട്ടികജാതി പട്ടികവർഗ പിന്നാക്ക ക്ഷേമ വകുപ്പ് മന്ത്രി കെ. എ. തുളസി ചടങ്ങിൽ അദ്ധ്യക്ഷത വഹിക്കും. വിവിധ വകുപ്പ് മന്ത്രിമാർ, എം.പിമാർ, എം.എൽ.എമാർ, തദ്ദേശ സ്വയംഭരണ ജനപ്രതിനിധികൾ, മത-സാംസ്‌കാരിക രംഗത്തെ പ്രമുഖർ തുടങ്ങിയവർ ചടങ്ങിൽ പങ്കെടുക്കും.

'സമഗ്ര 2026' വിജയകരമായി നടത്തുന്നതിനുള്ള ഒരുക്കങ്ങൾ വിലയിരുത്തുന്നതിനായി കഴിഞ്ഞ ദിവസം സെക്രട്ടറിയേറ്റിൽ വെച്ച് മന്ത്രി കെ. എ. തുളസിയുടെ അദ്ധ്യക്ഷതയിൽ പ്രത്യേക അവലോകന യോഗം ചേർന്നു. പരിപാടിയുടെ സുഗമമായ നടത്തിപ്പിനാവശ്യമായ നിർദ്ദേശങ്ങൾ യോഗം വിലയിരുത്തി. ഇതോടൊപ്പം, ലഹരിവിരുദ്ധ ബോധവൽക്കരണത്തിന്റെ ഭാഗമായി സംഘടിപ്പിക്കുന്ന വാക്കത്തോണിന്റെ ഔദ്യോഗിക സ്‌കാനർ (Scanner) പ്രകാശനവും ചടങ്ങിൽ നിർവ്വഹിച്ചു.

15,000-ത്തോളം ഗുണഭോക്താക്കൾക്കായി 100 കോടി രൂപയുടെ വായ്പാ വിതരണം ചടങ്ങിൽ നടക്കും. പുതിയ ക്ഷേമ പദ്ധതികളുടെ പ്രഖ്യാപനവും കോർപ്പറേഷന്റെ ഔദ്യോഗിക ന്യൂസ്ലെറ്റർ പ്രകാശനവും ഇതോടൊപ്പം നിർവ്വഹിക്കും. വിവിധ സർക്കാർ വകുപ്പുകളുടെ ഇൻഫർമേഷൻ കിയോസ്‌കുകൾ, വിജ്ഞാനപ്രദമായ ബോധവൽക്കരണ ക്ലാസ്സുകൾ എന്നിവ പരിപാടിയുടെ പ്രധാന ആകർഷണമായിരിക്കും.

വിവിധ സർക്കാർ വകുപ്പുകൾ, വികസന ഏജൻസികൾ, ധനകാര്യ-വിദ്യാഭ്യാസ സ്ഥാപനങ്ങൾ, വ്യവസായ മേഖലകൾ, സാമൂഹിക സംഘടനകൾ എന്നിവയെല്ലാം ഒരൊറ്റ പ്ലാറ്റ്ഫോമിൽ അണിനിരക്കുന്ന ഒരു ബൃഹദ് സംരംഭമായാണ് 'സമഗ്ര - 2026' വിഭാവനം ചെയ്തിരിക്കുന്നത്. ലഹരി വിരുദ്ധ പോരാട്ടത്തിന് പിന്തുണയേകി 'വാക്കത്തോൺ' (Walkathon) ലഹരിമുക്തവും ആരോഗ്യപൂർണ്ണവുമായ ഒരു യുവതലമുറയെ വാർത്തെടുക്കുന്നതിനായി കേരള സർക്കാർ നടപ്പിലാക്കുന്ന 'ഓപ്പറേഷൻ തുഫാൻ, ദ നാർക്കോ ഹണ്ട്' എന്ന ദൗത്യത്തിന് പൂർണ്ണ പിന്തുണ പ്രഖ്യാപിച്ചുകൊണ്ടാണ് 'സമഗ്ര 2026' സംഘടിപ്പിക്കുന്നത്. ഇതിന്റെ ഭാഗമായി പൊതുസമൂഹത്തിലും പ്രത്യേകിച്ച് വിദ്യാർത്ഥികൾക്കിടയിലും ബോധവൽക്കരണം സൃഷ്ടിക്കുന്നതിനായി ജൂലൈ 19-ന് വിപുലമായ ഒരു 'വാക്കത്തോൺ' (Walkathon) സംഘടിപ്പിക്കും. എറണാകുളം BOT പാലം മുതൽ പള്ളുരുത്തി എസ്.എൻ ഹാൾ വരെയാണ് വാക്കത്തോൺ നടക്കുക.

പി.എൻ.എക്‌സ്. 2598/2026