ഹജ്ജ് അപേക്ഷാ തീയതി ജൂലൈ 24 വരെ നീട്ടി; നറുക്കെടുപ്പ് ജൂലൈ 30-ന്

ഹജ്ജ് തീര്‍ത്ഥാടനത്തിന് ഓണ്‍ലൈനായി അപേക്ഷിക്കാനുള്ള തീയതി  ജൂലൈ 24 വരെ നീട്ടിയതായി സംസ്ഥാന ഹജ്ജ് കമ്മിറ്റി അസിസ്റ്റന്റ് സെക്രട്ടറി അറിയിച്ചു. തീര്‍ത്ഥാടകരെ തെരഞ്ഞെടുക്കുന്നതിനുള്ള കമ്പ്യൂട്ടറൈസ്ഡ് നറുക്കെടുപ്പ് 2026 ജൂലൈ 30 ന് രാവിലെ 11 ന് മുംബൈ ഹജ്ജ് ഹൗസില്‍ നടക്കും. പൊതുജനങ്ങള്‍ക്ക് ഇത് www.hajcommittee.gov.in ല്‍  തത്സമയം കാണാം. തെരഞ്ഞെടുക്കപ്പെട്ടവരുടെയും വെയിറ്റ്ലിസ്റ്റില്‍ ഉള്‍പ്പെട്ടവരുടെയും ലിസ്റ്റ് ഹജ്ജ് കമ്മിറ്റി വെബ്സൈറ്റില്‍ ലഭ്യമാക്കും. അപേക്ഷകര്‍ക്ക് എസ്.എം.എസ് വഴിയും സന്ദേശം ലഭിക്കും. താല്‍ക്കാലികമായി തെരഞ്ഞെടുക്കപ്പെടുന്ന തീര്‍ത്ഥാടകര്‍ ആദ്യ ഗഡുവായ 1,52,300/ രൂപ 2026 ആഗസ്റ്റ് 10-നകം അടക്കണം. കേരളത്തില്‍ ഓണ്‍ലൈന്‍ ആയി ജൂലൈ 12 വരെ അപേക്ഷിച്ചവര്‍ക്ക് ഇതിനകം കവര്‍ നമ്പര്‍ നല്കിയിട്ടുണ്ട് . എസ്.എം.എസ് വഴി കവര്‍ നമ്പര്‍ കിട്ടാത്തവര്‍ക്ക് www.hajcommittee.gov.in ല്‍ പാസ്‌പോര്‍ട്ട് നമ്പര്‍ നല്‍കി കവര്‍ നമ്പര്‍ വിവരം പരിശോധിക്കാവുന്നതാണ്.