കലാലയങ്ങളിലെ വോളിബോളിന്റെ പ്രതാപകാലത്തിന് പുതിയൊരു തുടക്കം

* കേരള കോളേജ് സ്പോർട്സ് ലീഗ് ഉദ്ഘാടനം ഇന്ന് (ആഗസ്റ്റ് 19)

കേരളത്തിലെ കോളേജ് ക്യാമ്പസുകളിലേക്ക് വോളിബോളിന്റെ പ്രതാപകാലം തിരികെ കൊണ്ടുവരിക എന്ന ലക്ഷ്യത്തോടെ കായിക-യുവജനകാര്യ വകുപ്പും ഉന്നത വിദ്യാഭ്യാസ വകുപ്പ് ഖേലോ ഇന്ത്യ പദ്ധതിയുമായി കൈകോർത്തുകൊണ്ട് സംഘടിപ്പിക്കുന്ന കേരള കോളേജ് സ്‌പോർട്‌സ് ലീഗ് - വോളിബോൾ മത്സരങ്ങൾക്ക് ആഗസ്റ്റ് 19ന് തുടക്കമാകും.

        രാവിലെ 10ന് തിരുവനന്തപുരം വെള്ളയമ്പലം ജിമ്മി ജോർജ്ജ് ഇൻഡോർ സ്റ്റേഡിയത്തിൽ നടക്കുന്ന ചടങ്ങിൽ ഉന്നതവിദ്യാഭ്യാസ വകുപ്പ് മന്ത്രി റോജി എം ജോൺ ലീഗിന്റെ ഔദ്യോഗിക ഉദ്ഘാടനം നിർവഹിക്കും. കായിക- യുവജനകാര്യ വകുപ്പ് മന്ത്രി ഒ ജെ ജനീഷ് അധ്യക്ഷത വഹിക്കുന്ന ചടങ്ങിൽ ഗതാഗത വകുപ്പ് മന്ത്രി സി പി ജോൺ കോളേജ് സ്പോർട്സ് ലീഗ് ജേഴ്സി അനാവരണം ചെയ്യും.

അന്താരാഷ്ട്ര കായിക ലീഗുകളുടെ മാതൃകയിൽ കേരളത്തിലെ കലാലയങ്ങളിൽ സംഘടിപ്പിക്കുന്ന ഈ സംരംഭം,  കോളേജ് കായികരംഗത്തിന് പുതിയൊരു മത്സരസംസ്‌കാരം സൃഷ്ടിക്കുന്നതിനൊപ്പം സംസ്ഥാനത്തിന്റെ കായികമുന്നേറ്റങ്ങൾക്ക് നവീനമായ ആവേശവും പുതിയൊരു ദിശയും നൽകും.

യുവതാരങ്ങളിലെ കായികപ്രതിഭകളെ കണ്ടെത്തി വളർത്തുന്നതിനും അവർക്ക് മികച്ച പരിശീലനവും ഉയർന്ന നിലവാരത്തിലുള്ള മത്സരപരിചയവും ലഭ്യമാക്കുന്നതിനും ഖേലോ ഇന്ത്യ പദ്ധതിയിലൂടെ ലക്ഷ്യമിടുന്നു. കേരളത്തിലെ കോളേജ് ക്യാമ്പസുകളെ കൂടുതൽ സജീവമായ കായികവേദികളാക്കി മാറ്റുന്നതിനും മികച്ച താരങ്ങൾക്ക് ഭാവിയിൽ ദേശീയ-അന്തർദേശീയ തലങ്ങളിലേക്ക് ഉയരുന്നതിനുള്ള അവസരങ്ങൾ സൃഷ്ടിക്കുന്നതിനും കായിക ലീഗ് സഹായകരമാകും.

സംസ്ഥാനത്തെ പ്രമുഖ സർവകലാശാലകളിൽ നിന്ന് യോഗ്യത നേടിയ 16 മികച്ച ടീമുകളാണ് ജിമ്മി ജോർജ്ജ് സ്റ്റേഡിയത്തിലും മൈലം ജിവി രാജ സ്‌പോർട്സ് സ്‌കൂളിലുമായി സംഘടിപ്പിക്കപ്പെടുന്ന കേരള കോളേജ് സ്‌പോർട്‌സ് ലീഗ് - വോളിബോൾ കിരീടത്തിനായി മാറ്റുരയ്ക്കുന്നത്.

പി.എൻ.എക്‌സ്. 3294/2026