ഭരണഭാഷാ പുരസ്‌കാരങ്ങൾ: അപേക്ഷകൾ ഒക്ടോബർ 12 വരെ സമർപ്പിക്കാം

സംസ്ഥാന സർക്കാരിന്റെ ഉദ്യോഗസ്ഥ-ഭരണപരിഷ്‌കാര വകുപ്പ് ഏർപ്പെടുത്തിയ ഭരണഭാഷാ പുരസ്‌കാരങ്ങൾക്ക് അപേക്ഷകൾ ഒക്ടോബർ 12 വരെ സമർപ്പിക്കാം. ഭരണരംഗത്ത് മലയാള ഭാഷയുടെ ഉപയോഗം വർധിപ്പിക്കുന്നതിനും പൂർണമായി ഭാഷാമാറ്റം കൈവരിക്കുന്നതിനും ലക്ഷ്യമിട്ടാണ് വിവിധ വിഭാഗങ്ങളിലായി അവാർഡുകൾ നൽകുന്നത്.  

ഭരണഭാഷാമാറ്റത്തിൽ ഏറ്റവും മികച്ച പുരോഗതി കൈവരിക്കുന്ന വകുപ്പിന് 25,000 രൂപയും ഫലകവും പ്രശസ്തിപത്രവും, മികച്ച രീതിയിൽ മാതൃഭാഷാപ്രചാരണം നടത്തുന്ന ജില്ലയ്ക്ക് 20,000 രൂപയും ഫലകവും പ്രശസ്തിപത്രവും നൽകും.  

ഔദ്യോഗിക ഭാഷ മലയാളം ആക്കുന്നതിനു സഹായകമാകുന്ന സ്വതന്ത്ര കൃതികൾ രചിക്കുന്ന ജീവനക്കാർക്ക് ഗ്രന്ഥരചനാ പുരസ്‌കാരം നൽകും. ഒന്നാം സമ്മാനം 20,000 രൂപയും രണ്ടാം സമ്മാനം 10,000 രൂപയും ഫലകവും സത്‌സേവനരേഖയുമാണ് ലഭിക്കുക.  

സംസ്ഥാനതലത്തിൽ 'ഗ്രൂപ്പ് എ', 'ഗ്രൂപ്പ് ബി', 'ഗ്രൂപ്പ് സി'  ഉദ്യോഗസ്ഥർക്കും ടൈപ്പിസ്റ്റ്/ കമ്പ്യൂട്ടർ അസിസ്റ്റന്റ്/ സ്റ്റെനോഗ്രാഫർ/ കോൺഫിഡൻഷ്യൽ അസിസ്റ്റന്റ് ജീവനക്കാർക്കുമായി ഭരണഭാഷ സേവന പുരസ്‌കാരങ്ങൾ നൽകും.  ഓരോ വിഭാഗത്തിനും ഒന്നാം സമ്മാനം 20,000 രൂപയും രണ്ടാം സമ്മാനം 10,000 രൂപയും വീതം നൽകും. 

ജില്ലാതലത്തിൽ 'ഗ്രൂപ്പ് സി' ജീവനക്കാർക്കായി നൽകുന്ന ജില്ലാതലഭരണ ഭാഷ പുരസ്‌കാരത്തിന്റെ അവാർഡ് തുക 10,000 രൂപയും സത് സേവനരേഖയുമാണ്.  

സ്‌കൂൾ വിദ്യാർഥികൾക്കായി 1 മുതൽ 4, 5 മുതൽ 7, 8 മുതൽ 10 വരെ ക്ലാസുകളിലായി പുതിയ സാഹിത്യപുരസ്‌കാരം ഏർപ്പെടുത്തിയിട്ടുണ്ട്. ഒന്നാം സമ്മാനം 5,000 രൂപയും രണ്ടാം സമ്മാനം 3,000 രൂപയുമാണ്.  2025 കലണ്ടർ വർഷത്തിൽ മലയാളത്തിൽ ചെയ്ത പ്രവൃത്തികളാണ് അവാർഡിനായി പരിഗണിക്കുന്നത്. അപേക്ഷകൾ നിശ്ചിത ഫാറത്തിൽ ഒക്ടോബർ 12 വൈകിട്ട് 5 മണിക്ക് മുമ്പായി സമർപ്പിക്കണം. 

സംസ്ഥാനതല പുരസ്‌കാരങ്ങൾക്കുള്ള അപേക്ഷകൾ ഡെപ്യൂട്ടി സെക്രട്ടറി, ഉദ്യോഗസ്ഥ-ഭരണപരിഷ്‌കാര (ഔദ്യോഗികഭാഷ) വകുപ്പ്, അനക്‌സ് 1, ഗവ. സെക്രട്ടേറിയറ്റ്, തിരുവനന്തപുരം - 695001 (ഇ-മെയിൽ: pardold@gmail.com) എന്ന വിലാസത്തിലും, ജില്ലാതല അപേക്ഷകൾ അതത് ജില്ലാ കളക്ടർമാർക്കും ലഭ്യമാക്കേണ്ടതാണ്.