മത്സ്യമേഖലയ്ക്ക് കേന്ദ്രസര്ക്കാര് ഇനിയും ന്യായമായ ആനുകൂല്യം നല്കണം : മന്ത്രി മേഴ്സിക്കുട്ടിയമ്മ
പ്രളയവും ഓഖി പോലുള്ള ദുരന്തങ്ങളും സംഭവിച്ച കേരളത്തിന്റെ മത്സ്യമേഖലക്ക് കേന്ദ്ര സര്ക്കാര് ഇനിയും ന്യായമായ ആനുകൂല്യങ്ങള് അനുവദിക്കണമെന്ന് ഫിഷറീസ് വകുപ്പ് മന്ത്രി ജെ.മേഴ്സിക്കുട്ടിയമ്മ. തൃശൂര് ടൗണ് ഹാളില് ജില്ലയിലെ ജല കര്ഷകര്ക്കും മത്സ്യത്തൊഴിലാളികള്ക്കുമുള്ള പ്രളയനഷ്ട പരിഹാര വിതരണം, ജലകൃഷി പ്രളയാനന്തര പുന:സ്ഥാപന പദ്ധതി ഉദ്ഘാടനം എന്നിവ നിര്വഹിച്ച് സംസാരിക്കുകയായിരുന്നു മന്ത്രി. പ്രളയത്തിലും ഓഖിയിലും തീരദേശ മേഖലയില് ഏറെ നാശനഷ്ടങ്ങളുണ്ടായി. മത്സ്യത്തൊഴിലാളികളുടെ വീടുകള് തകര്ന്നു, ജീവനോപാധികള് നഷ്ടപ്പെട്ടു. അവരുടെ പുനരധിവാസ സാധ്യതകള് പ്രതിസന്ധിയിലായി. ഇത്തരത്തിലുള്ള റിപ്പോര്ട്ട് കേന്ദ്രത്തിന് സമര്പ്പിച്ചപ്പോള് വളരെ ലാഘവത്തോടെയാണ് അവര് അതിനെ കണ്ടത്. എന്നാല് കേരളത്തിന്റെ കൂട്ടായ്മ ഇതിനെയെല്ലാം തരണം ചെയ്തെന്നും സംസ്ഥാന സര്ക്കാര് ഏവര്ക്കും ന്യായമായ സഹായങ്ങള് നല്കിയെന്നും മന്ത്രി പറഞ്ഞു. മത്സ്യകൃഷി മേഖലയില് സര്ക്കാര് കൂടുതല് ശ്രദ്ധ പതിപ്പിക്കും. കര്ഷക വളര്ത്തുന്ന മത്സ്യകുഞ്ഞുങ്ങളുടെ കൃത്യമായ ഗുണനിലവാരം പരിശോധിക്കും. സംസ്ഥാനത്തിനു പുറത്തു നിന്നും മത്സൃക്കുഞ്ഞുങ്ങളെ കൊണ്ടുവരും. ഉള്നാടന് മത്സ്യകൃഷിയുടെ സാധ്യതകള് പരിശോധിച്ച് നെല്കര്ഷകരുമായി സഹകരിച്ച് നെല് - മത്സ്യകൃഷിയെ സംയോജിത കൃഷിയാക്കി മാറ്റുമെന്നും മന്ത്രി വ്യക്തമാക്കി. ജില്ലയില് മത്സ്യത്തൊഴിലാളികള്ക്കുള്ള പ്രളയാനന്തര സഹായമായി അനുവദിച്ച രണ്ടു കോടി രൂപ ചടങ്ങില് മന്ത്രി വിതരണം ചെയ്തു. ബാക്കി തുക ഏപ്രിലിനും വിതരണം ചെയ്യുമെന്നും മന്ത്രി കൂട്ടിച്ചേര്ത്തു. ഗീതാ ഗോപി എം എല് എ അധ്യക്ഷത വഹിച്ചു. ഇ.ടി. ടൈസണ് മാസ്റ്റര് എംഎല് എ, മധ്യമേഖല ഫിഷറീസ് ജോയിന്റ് ഡയറക്ടര് എം എസ് സജു, അസി. ഡയറക്ടര് വി. പ്രശാന്തന്, തൃശൂര് ഫിഷറീസ് ഡെപ്യൂട്ടി ഡയറക്ടര് കെ. സുഹൈര് എന്നിവര് പങ്കെടുത്തു.
- Log in to post comments