ഏപ്രില് 22നും 23 നുമുള്ള അച്ചടി മാധ്യമങ്ങളിലെ രാഷ്ട്രീയ പരസ്യങ്ങള്ക്ക് മുന്കൂര് അനുമതി വാങ്ങണം
ലോക്സഭാ തെരഞ്ഞെടുപ്പ് ദിവസവും തൊട്ടുമുന് ദിവസവുമുള്ള അച്ചടി മാധ്യമങ്ങളിലെ രാഷ്ട്രീയ പരസ്യങ്ങള്ക്ക് മീഡിയാ സര്ട്ടിഫിക്കേഷന് ആന്ഡ് മോണിറ്ററിങ് കമ്മിറ്റി(എം.സി.എം.സി)യുടെ മുന്കൂര് അനുമതി വാങ്ങണമെന്ന് ഇലക്ഷന് കമ്മീഷന് നിര്ദ്ദേശിച്ചു. ഇത് പ്രകാരം കേരളത്തില് തെരഞ്ഞെടുപ്പ് നടക്കുന്ന ഏപ്രില് 23 നും തലേദിവസമായ 22 നും അച്ചടി മാധ്യമങ്ങളില് രാഷ്ട്രീയ പരസ്യം നല്കാന് പരസ്യ ഉള്ളടക്കത്തിന് സംസ്ഥാന/ജില്ലാതല എം.സി.എം.സിയുടെ മുന്കൂര് അനുമതി വാങ്ങിയിരിക്കണം. രാഷ്ട്രീയ പാര്ട്ടികള്, സ്ഥാനാര്ഥികള്, മറ്റ് സംഘടനകള്, വ്യക്തികള് എന്നിവര്ക്കെല്ലാം ഉത്തരവ് ബാധകമാണ്.
എതിര് സ്ഥാനാര്ഥികള്ക്കും രാഷ്ട്രീയ പാര്ട്ടികള്ക്കും മറുപടിയും വിശദീകരണവും നല്കാന് അവസരമില്ലാതാത്ത വിധം തെരഞ്ഞെടുപ്പിന്റെ അവസാനഘട്ടത്തില് അച്ചടി മാധ്യമങ്ങളില് പരസ്യം വരുന്നത് തടയാനാണിത്. നിലവില് ഇലക്ട്രോണിക് മാധ്യമങ്ങളില് വരുന്ന രാഷ്ട്രീയ പരസ്യങ്ങള്ക്കാണ് എം.സി.എം.സിയുടെ മുന്കൂര് അനുമതി ആവശ്യമുള്ളത്. ജില്ലാ തെരഞ്ഞെടുപ്പ് ഉദ്യോഗസ്ഥനായ ജില്ലാ കലക്ടര് ചെയര്മാനായാണ് ജില്ലാതലത്തില് മീഡിയാ സര്ട്ടിഫിക്കേഷന് ആന്ഡ് മോണിറ്ററിങ് കമ്മിറ്റി പ്രവര്ത്തിക്കുന്നത്.
- Log in to post comments