തുടര്‍വിദ്യാഭ്യാസ കലോത്സവം ഒക്ടോബറില്‍ തിക്കോടിയില്‍

ജില്ലാതല സാക്ഷരത തുടര്‍ വിദ്യാഭ്യാസ കലോത്സവം ഒക്ടോബര്‍ അവസാന വാരം തിക്കോടി പഞ്ചായത്തിലെ പയ്യോളി ജി.വി.എച്ച്.എസ്.എസില്‍ നടക്കും. ജില്ലാപഞ്ചായത്ത് പ്രസിഡന്റിന്റെ ചേമ്പറില്‍ ചേര്‍ന്ന സാക്ഷരതാ സമിതി യോഗത്തിലാണ് തീരുമാനം. ജില്ലാതല പരിപാടിക്ക് മുന്നോടിയായി ഗ്രാമ ബ്ലോക്ക് നഗരസഭ കലോത്സവങ്ങള്‍ നടത്തി വരികയാണ്. നവംബറില്‍ തിരുവനന്തപുരമാണ് ഒമ്പതാമത് സംസ്ഥാന തുടര്‍വിഭ്യാസ കലോത്സവത്തിന് വേദിയാകുന്നത്. പഠനത്തോടൊപ്പം ഭാഷാ നൈപുണ്യത്തിന് ശ്രദ്ധിക്കണമെന്നും ഇതിനായുള്ള പദ്ധതികള്‍ വര്‍ദ്ധിപ്പിക്കണമെന്നും യോഗത്തില്‍ ജില്ലാ പഞ്ചായത്ത് പ്രസിഡന്റ് അറിയിച്ചു. ഭാഷാ സര്‍ട്ടിഫിക്കറ്റ് കോഴ്സുകളായ ഗുഡ് ഇംഗ്ലീഷ്, അച്ഛി ഹിന്ദി, പച്ചമലയാളം കോഴ്സുകള്‍ വിജയകരമായി നടത്തുന്നുണ്ട്. ഭാഷാ മികവ് വര്‍ദ്ധിപ്പിക്കുന്ന കോഴ്സുകള്‍ക്ക്  കൂടുതല്‍ പ്രാധാന്യം നല്‍കി പ്രചാരം വര്‍ദ്ധിപ്പിക്കണമെന്ന് പ്രസിഡന്റ് അറിയിച്ചു. 

സാക്ഷരത മിഷന് കീഴില്‍ ജില്ലയില്‍ 187 വിദ്യാകേന്ദ്രങ്ങളാണുള്ളത്. ഇതില്‍ 31 എണ്ണം വികസന വിദ്യാകേന്ദ്രങ്ങളും 156 തുടര്‍ വിദ്യാകേന്ദ്രങ്ങളുമാണ്. നിരക്ഷരത നിര്‍മാര്‍ജനം ചെയ്യുക എന്ന ലക്ഷ്യവുമായി നടപ്പാക്കിയ അക്ഷരലക്ഷം സാക്ഷരത പരിപാടിയില്‍ കഴിഞ്ഞ ബാച്ചില്‍ 1521 സ്ത്രീകളും 233 പുരുഷന്മാരുമുള്‍പ്പെടെ 1754 പേര്‍ പരീക്ഷ എഴുതി. ഇതില്‍ 419 പട്ടികജാതിക്കാരും 55 പട്ടിക വര്‍ഗക്കാരും ഉള്‍പ്പെടുന്നു. നിലവില്‍ നടപ്പാക്കി വരുന്ന കോളനികളിലെ സാക്ഷരത പരിപാടിയില്‍ 177കോളനികളില്‍ നിന്നായി 2745 പഠിതാക്കളാണ് അക്ഷരമധുരം ലഭ്യമാക്കുന്നത്. നാലാംതരം തുല്യത ക്ലാസില്‍ 1847 പേരും ഏഴാംതരം തുല്യതയ്ക്ക് 1561 പേരും പത്താംതരം തുല്യത പഠനത്തിനായി 3243 പേരുമാണ് പുതിയ ബാച്ചിലുളളത്. ഹയര്‍സെക്കന്ററി വിഭാഗത്തില്‍ 1648 പേര്‍ ഇത്തവണ ഒന്നാംവര്‍ഷ പരീക്ഷ എഴുതി. 

നവചേതന പദ്ധതിയില്‍ തെരഞ്ഞെടുത്ത 9 പട്ടികജാതി കോളനിയില്‍ 144 പഠിതാക്കളുണ്ട്. ഇതരസംസ്ഥാന തൊഴിലാളികള്‍ക്കായുള്ള  ചങ്ങാതി പദ്ധതി  നടപ്പാക്കുന്നതിനായി ഒളവണ്ണ പഞ്ചായത്തില്‍ സര്‍വ്വെ പൂര്‍ത്തിയാക്കിക്കഴിഞ്ഞു. പദ്ധതിയില്‍ 589 പഠിതാക്കളാണുള്ളത്. ആദിവാസി ഊരുകളില്‍ നടപ്പാക്കുന്ന സമഗ്ര പദ്ധതിയില്‍ നാലാംതരം തുല്യതയ്ക്ക് 92 പഠിതാക്കളും ട്രാന്‍സ്ജന്‍ഡര്‍മാര്‍ക്കായുള്ള സമന്വയ പദ്ധതിയില്‍ മൂന്ന് പഠിതാക്കളുമുണ്ട്.  

അന്തരിച്ച സാക്ഷരതാ പ്രവര്‍ത്തകരായിരുന്ന കൊടക്കാട് ശ്രീധരന്‍ മാസ്റ്റര്‍, ബാലന്‍മാസ്റ്റര്‍ എന്നിവരെ  അനുസ്മരിച്ചു കൊണ്ടാണ് യോഗം ആരംഭിച്ചത്. സാക്ഷരത മിഷന്‍ ജില്ലാ കോ ഓര്‍ഡിനേറ്റര്‍ സി.അബ്ദുല്‍ റഷീദ് റിപ്പോര്‍ട്ട് അവതരിപ്പിച്ചു. ജില്ലാ പഞ്ചായത്ത് സെക്രട്ടറി (ഇന്‍ ചാര്‍ജ്) വി.ബാബു,  പ്രൊഫ.കെ.ശ്രീധരന്‍, ജാനമ്മ കുഞ്ഞുണ്ണി, കെ.വിജയന്‍, എം.ഡി വത്സല, എം.രാമദാസന്‍, കെ.എം.സോഫിയ, വി.എം രാധാകൃഷ്ണന്‍ (അസി. കോ ഓര്‍ഡിനേറ്റര്‍ സാക്ഷരത മിഷന്‍) എന്നിവര്‍ സംസാരിച്ചു.

 വെണ്ണക്കാട് ജിഎംയുപി സ്‌ക്കൂളില്‍
സ്റ്റേജ് ഉദ്ഘാടനം ചെയ്തു

വെണ്ണക്കാട് ജിഎംയുപി സ്‌ക്കൂളില്‍ കൊടുവള്ളി നഗരസഭ 2018-19 വാര്‍ഷിക പദ്ധതിയില്‍ ഉള്‍പ്പെടുത്തി നിര്‍മ്മിച്ച സ്റ്റേജിന്റെ ഉദ്ഘാടനം നഗരസഭ ചെയര്‍പെഴ്‌സണ്‍ ഷരീഫ കണ്ണാടിപ്പൊയില്‍ നിര്‍വഹിച്ചു. ഡിവിഷന്‍ കൗണ്‍സിലര്‍ പി.പി.മൊയ്തീന്‍കുട്ടി അധ്യക്ഷത വഹിച്ചു. 

നഗരസഭ വൈസ്‌ചെയര്‍മാന്‍ എ.പി.മജീദ് മാസ്റ്റര്‍ മുഖ്യാതിഥിയായി. സ്ഥിരം സമിതി അധ്യക്ഷന്മാരായ ബിന്ദു അനില്‍കുമാര്‍, ഹാജറ ഉസ്മാന്‍, കൗണ്‍സിലര്‍ കോഴിശ്ശേരി മജീദ്, ടി.മൊയ്തീന്‍ കോയ, ടി.പി.സൈനുല്‍ ആബിദ്, എ.പി.പ്രശോഭ്, ധന്യ, സി.കെ.ബഷീര്‍, യു. സുബൈര്‍ എന്നിവര്‍ സംസാരിച്ചു. ഹെഡ്മാസ്റ്റര്‍ കെ.യു. അഹമ്മദ് സ്വാഗതവും പി.അബ്ദുല്‍ അലി നന്ദിയും പറഞ്ഞു.
[4:45 PM, 9/27/2019] rem: എംഎല്‍എ ഫണ്ട് അവലോകന യോഗം ചേര്‍ന്നു

എലത്തൂര്‍ നിയോജക മണ്ഡലത്തില്‍ ഇറിഗേഷന്‍ വകുപ്പ് നടത്തിയ വിവിധ പദ്ധതി പ്രവര്‍ത്തനങ്ങളുടെ അവലോകന യോഗം ചേര്‍ന്നു. ഗതാഗത വകുപ്പ് മന്ത്രി എ.കെ ശശീന്ദ്രന്റെ അധ്യക്ഷതയില്‍ ഗവ. ഗസ്റ്റ് ഹൗസില്‍ ചേര്‍ന്ന യോഗത്തില്‍ സ്‌റ്റേറ്റ് ഡിസാസ്റ്റര്‍ മാനേജ്‌മെന്റ്, എം.എല്‍.എ ആസ്തി വികസന ഫണ്ട്, എം.എല്‍.എ പ്രാദേശിക വികസന ഫണ്ട് തുടങ്ങി വിവിധ ഫണ്ടുകള്‍ ചെലവഴിച്ച്  വകുപ്പ് നടത്തുന്ന പ്രവര്‍ത്തനങ്ങള്‍ വിലയിരുത്തി. ചേളന്നൂര്‍, കക്കോടി, കാക്കൂര്‍, തലക്കുളത്തൂര്‍, നന്‍മണ്ട, കുരുവട്ടൂര്‍ തുടങ്ങിയ പഞ്ചായത്തുകളില്‍ നടക്കുന്ന പ്രവര്‍ത്തനങ്ങള്‍ വിലയിരുത്തി. മണ്ഡലത്തിലെ പൂര്‍ത്തീകരിക്കാത്ത പ്രവൃത്തികള്‍ വേഗത്തില്‍ പൂര്‍ത്തിയാക്കാന്‍ മന്ത്രി ബന്ധപ്പെട്ട ഉദ്യോഗസ്ഥര്‍ക്ക് നിര്‍ദേശം നല്‍കി. പേരാമ്പ്ര ഡിവിഷന്‍ എക്‌സിക്യൂട്ടീവ് എഞ്ചിനീയര്‍ മനോജ് എം.കെ, വടകര അസിസ്റ്റന്റ് എക്‌സിക്യുട്ടീവ് എഞ്ചീനിയര്‍ യു കെ ഗിരീഷ് കുമാര്‍, പെരുവണ്ണാമൂഴി അസിസ്റ്റന്റ്  എക്‌സിക്യൂട്ടിവ് എഞ്ചീനിയര്‍ കെ കെ വിശ്വന്‍നായര്‍, കക്കോടി അസിസറ്റന്റ് എഞ്ചിനിയര്‍മാരായ കെ ടി സുജാത, എ കെ സജീവ് വിവിധ പഞ്ചായത്ത് പ്രസിഡന്റുമാര്‍ തുടങ്ങിയവര്‍ പങ്കെടുത്തു.

ഹിന്ദി അധ്യാപക തസ്തിക :  കൂടിക്കാഴ്ച ഒന്നിന്

മൂലങ്കാവ് ഗവ. ഹയര്‍ സെക്കണ്ടറി സ്‌കൂളില്‍ ഹയര്‍ സെക്കന്ററി വിഭാഗത്തില്‍ ഹിന്ദി (ജൂനിയര്‍) അധ്യാപക തസ്തികയിലേക്കുളള കൂടിക്കാഴ്ച ഒക്‌ടോബര്‍ ഒന്നിന് രാവിലെ 11 ന് ഓഫീസില്‍ നടക്കും. താല്പര്യമുളളവര്‍  അസല്‍ സര്‍ട്ടിഫിക്കറ്റുകളുമായി കൃത്യസമയത്ത് എത്തണമെന്ന് പ്രിന്‍സിപ്പാള്‍ അറിയിച്ചു. ഫോണ്‍ 04936225050.