രാജ്യാന്തര നാടകോത്സവം: ടിക്കറ്റുകൾ ഓൺ ലൈനിൽ ലഭ്യം

പന്ത്രണ്ടാമത് രാജ്യാന്തര നാടകോത്സവത്തിനുള്ള ടിക്കറ്റുകൾ ഓൺ ലൈനിൽ നിന്നു ലഭിക്കും. ഇറ്റ് ഫോക് ഔദ്യോഗിക വെബ് സൈറ്റായ http://thetarfestivalkerala.com ലൂടെ ഓൺലൈൻ ടിക്കറ്റുകൾ ലഭിക്കും. ഓരോ നാടകം ആരംഭിക്കുന്നതിനു അര മണിക്കൂർ മുമ്പ് ബോക്‌സ് ഓഫീസിലൂടെയും ടിക്കറ്റുകൾ ലഭിക്കും. ഇമാജിനിങ് കമ്യൂണിറ്റിസ് എന്നതാണ് ഇത്തവണത്തെ ഇറ്റ് ഫോക്കിന്റെ പ്രമേയം .
20 മുതൽ 29 വരെ പത്തു ദിവസങ്ങളിലായി നടക്കുന്ന ഇറ്റ് ഫോക് 2020ൽ പത്തൊമ്പതു നാടകങ്ങൾ അരങ്ങേറും. രാജ്യാന്തര വിഭാഗത്തിൽ ഓസ്‌ട്രേലിയ, യു.കെ ,ഇറാൻ, ബ്രസീൽ, നോർവെ, പോളണ്ട് എന്നീ രാജ്യങ്ങളിൽ നിന്നായി ഏഴു നാടകങ്ങളാണുള്ളത്. ദേശീയ വിഭാഗത്തിൽ ബംഗളൂരു, ഹൈദ്രബാദ്, ഭോപ്പാൽ, ഗോവാ ജയ്പ്പുർ, പുനെ എന്നിവിടങ്ങളിൽ നിന്നായി ആറു നാടകങ്ങളുണ്ട്. ആറു മലയാള നാടകങ്ങളും മേളയുടെ ഭാഗമാണ് .സംവിധായകനും പെർഫോമൻസ് മേക്കറും ഇന്റർമീഡിയ ആർട്ടിസ്റ്റുമായ അമിതേഷ് ഗ്രോവർ ആണ് ഇറ്റ്‌ഫോക് 2020 ന്റെ ഫെസ്റ്റിവൽ ഡയറക്ടർ .സെമിനാറുകൾ പെർഫോമൻസ് പോയട്രി, നാടകവുമായി ബന്ധപ്പെട്ട സിനിമകളുടെ പ്രദർശനവും എന്നിവയും ഉണ്ടാവും. നാടകോത്സവത്തിന്റെ ഭാഗമായി കേരള സംഗീത നാടക അക്കാദമി ഏർപ്പെടുത്തിയ അഞ്ചാമത് അമ്മന്നൂർ പുരസ്‌കാരം എഴുത്തുകാരിയും വിവർത്തകയും നാടക നിരൂപകയും മാധ്യമ പ്രവർത്തകയുമായ ശാന്ത ഗോഖലയ്ക്കു സമ്മാനിക്കും. മൂന്നു ലക്ഷം രൂപയും ശില്പവും പ്രശസ്തി പത്രവും അടങ്ങുന്നതാണ് അവാർഡ്.