ലൈഫ്: ജില്ലാതല കുടുംബ സംഗമവും മെഗാ അദാലത്തും 22ന് മുഖ്യമന്ത്രി ഉദ്ഘാടനം ചെയ്യും

സ്വപ്‌നഭവനങ്ങളൊരുങ്ങിയത് പതിനായിരത്തിലേറെ പേര്‍ക്ക്
മൂവായിരത്തോളം കുടുംബങ്ങള്‍ക്ക് 36 കേന്ദ്രങ്ങളില്‍ ഭവന സമുച്ചയം വരുന്നു
ലൈഫ് ഭവന പദ്ധതിയില്‍ വീടുകള്‍ ലഭിച്ചവരുടെ ജില്ലാതല കുടുംബ സംഗമവും മെഗാ അദാലത്തും ജനുവരി 22ന് കലക്ടറേറ്റ് മൈതാനിയില്‍ നടക്കും. ഉച്ചയ്ക്കു ശേഷം രണ്ട് മണിക്ക് മുഖ്യമന്ത്രി പിണറായി വിജയന്‍ പരിപാടി ഉദ്ഘാടനം ചെയ്യും. ചടങ്ങില്‍ വ്യവസായ വകുപ്പ് മന്ത്രി ഇ പി ജയരാജന്‍ അധ്യക്ഷത വഹിക്കും. മന്ത്രിമാരായ രാമചന്ദ്രന്‍ കടന്നപ്പള്ളി, കെ കെ ശൈലജ ടീച്ചര്‍ എന്നിവര്‍ മുഖ്യാതിഥികളാവും. മേയര്‍, എംപിമാര്‍, എംഎല്‍എമാര്‍ തുടങ്ങിയവര്‍ പങ്കെടുക്കും. അത്താഴക്കുന്ന് സൗപര്‍ണികയുടെ നാടന്‍ പാട്ടുകളോടെയാണ് പരിപാടി ആരംഭിക്കുക.
സംസ്ഥാന സര്‍ക്കാരിന്റെ സുപ്രധാന മിഷനുകളിലൊന്നായ ലൈഫ് പദ്ധതിയില്‍ രണ്ട് ഘട്ടങ്ങളിലായി ഇതിനകം 7934 കുടുംബങ്ങള്‍ക്ക് ജില്ലയില്‍ വീടുകള്‍ ലഭിച്ചതായി ജില്ലാ പഞ്ചായത്ത് പ്രസിഡന്റ് കെ വി സുമേഷും ജില്ലാ കലക്ടര്‍ ടി വി സുഭാഷും വാര്‍ത്താസമ്മേളനത്തില്‍ അറിയിച്ചു. ബാക്കിയുള്ള 2164 വീടുകള്‍ മാര്‍ച്ച് മാസത്തോടെ പൂര്‍ത്തിയാവും. വിവിധ സര്‍ക്കാര്‍ പദ്ധതികളില്‍ ആരംഭിച്ച് നിര്‍മാണം പാതിവഴിയിലായ 2675 വീടുകളാണ് ഒന്നാംഘട്ട ലൈഫ് പദ്ധതിയില്‍ തെരഞ്ഞെടുക്കപ്പെട്ടത്. ഇതില്‍ 2589 വീടുകളുടെ നിര്‍മാണം ഇതിനകം പൂര്‍ത്തിയായി. ഭൂമിയുള്ള ഭവനരഹിതര്‍ക്ക് വീട് ലഭ്യമാക്കുന്ന രണ്ടാംഘട്ടത്തില്‍ തെരഞ്ഞെടുക്കപ്പെട്ട 2338ല്‍ 2097 വീടുകളും കുടുംബങ്ങള്‍ക്ക് കൈമാറി. നഗരസഭകള്‍ വഴി നടപ്പിലാക്കുന്ന പിഎംഎവൈ അര്‍ബന്‍ പദ്ധതിയില്‍ 2571 ഉം ബ്ലോക്ക് പഞ്ചായത്ത് വഴിയുള്ള പിഎംഎവൈ ഗ്രാമീണ്‍ പദ്ധതിയില്‍ 677ഉം വീടുകള്‍ പൂര്‍ത്തിയായി.
ഭൂരഹിതരും ഭവനരഹിതരുമായ കുടുംബങ്ങള്‍ക്ക് വീടൊരുക്കുന്ന ലൈഫ് മിഷന്റെ മൂന്നാംഘട്ടത്തിലേക്ക് ജില്ലയില്‍ നിന്ന് 2822 പേരാണ് അര്‍ഹരായിട്ടുള്ളത്. ഇവര്‍ക്കായി പാര്‍പ്പിട സമുച്ചയമൊരുക്കുന്നതിന് ജില്ലയില്‍ 36 സ്ഥലങ്ങള്‍ ഇതിനകം കണ്ടെത്തിക്കഴിഞ്ഞു. കടമ്പൂര്‍ പഞ്ചായത്ത് വിട്ടുനല്‍കിയ സ്ഥലത്താണ് ജില്ലയില്‍ ആദ്യത്തെ ലൈഫ് പാര്‍പ്പിട സമുച്ചയം ഒരുങ്ങുക. ഇതിനുള്ള ടെണ്ടര്‍ നടപടികള്‍ പൂര്‍ത്തിയായി. ഹൈദരാബാദിലെ പെന്നാര്‍ ഇന്‍ഡസ്ട്രീസിനാണ് പ്രീഫാബ് സാങ്കേതികവിദ്യയില്‍ ഒരുക്കുന്ന ഭവനസമുച്ചയത്തിന്റെ നിര്‍മാണച്ചുമതല. ചിറക്കല്‍, കണ്ണപുരം, പട്ടുവം പഞ്ചായത്തുകളിലും ആന്തൂര്‍, പയ്യന്നൂര്‍ നഗരസഭകളിലും മെയ് മാസത്തോടെ നിര്‍മാണ പ്രവൃത്തികള്‍ ആരംഭിക്കും.
കേവലം വീടുകള്‍ നിര്‍മിച്ചുനല്‍കുന്നതിലുപരി താമസക്കാര്‍ക്ക് ആവശ്യമായ അടിസ്ഥാന സൗകര്യങ്ങളും ജീവനോപാധികളും കൂടി ഒരുക്കിക്കൊടുക്കുകയെന്ന ലക്ഷ്യത്തോടെയാണ് കുടുംബസംഗമങ്ങള്‍ക്കൊപ്പം അദാലത്തുകളും സംഘടിപ്പിക്കുന്നതെന്ന് ജില്ലാ പഞ്ചായത്ത് പ്രസിഡന്റ് പറഞ്ഞു. ജില്ലയില്‍ എല്ലാ ബ്ലോക്ക്-നഗരസഭാ തലങ്ങളിലും ലൈഫ് കുടുംബസംഗമങ്ങളും അദാലത്തുകളും ഇതിനകം നടന്നു. റേഷന്‍ കാര്‍ഡുകള്‍, വൈദ്യുതി കണക്ഷന്‍, തൊഴില്‍ സംരംഭങ്ങള്‍, ബാങ്ക് വായ്പകള്‍, ജീവനോപാധികള്‍ തുടങ്ങിയവ അദാലത്തുകളിലൂടെ ഗുണഭോക്താക്കള്‍ക്ക് നല്‍കാന്‍ സാധിച്ചതായും അദ്ദേഹം അറിയിച്ചു. ജില്ലയില്‍ മികച്ച രീതിയില്‍ ലൈഫ് മിഷന്‍ പ്രവര്‍ത്തനങ്ങള്‍ക്ക് നേതൃത്വം നല്‍കിയ തദ്ദേശ സ്ഥാപനങ്ങളെയും ഉദ്യോഗസ്ഥരെയും പദ്ധതിയുമായി സഹകരിച്ച വ്യക്തികളെയും സംഘടനകളെയും ജില്ലാതല കുടുംബ സംഗമത്തില്‍ ആദരിക്കും.
പിആര്‍ഡി ചേംബറില്‍ നടന്ന വാര്‍ത്താസമ്മേളനത്തില്‍ ജില്ലാ പഞ്ചായത്ത് പ്രസിഡണ്ട്് കെ വി സുമേഷ്, ജില്ലാ കലക്ടര്‍ ടി വി സുഭാഷ്, പഞ്ചായത്ത് ഡെപ്യൂട്ടി ഡയറക്ടര്‍ ടി ജെ അരുണ്‍, ലൈഫ് മിഷന്‍ ജില്ലാ കോ-ഓര്‍ഡിനേറ്റര്‍ കെ എന്‍ അനില്‍ എന്നിവര്‍ പങ്കെടുത്തു.