റിപ്പബ്ലിക് ദിനാഘോഷം; മന്ത്രി രാമചന്ദ്രന്‍ കടന്നപ്പള്ളി സല്യൂട്ട് സ്വീകരിക്കും
ജില്ലാതല റിപ്പബ്ലിക് ദിനോഘാഷത്തിന്റെ ഭാഗമായി കണ്ണൂര്‍ പോലീസ് മൈതാനിയില്‍ നടക്കുന്ന പരേഡില്‍ മന്ത്രി രാമചന്ദ്രന്‍ കടന്നപ്പള്ളി സല്യൂട്ട് സ്വീകരിക്കും.
രാവിലെ എട്ട് മണിക്ക് ആരംഭിക്കുന്ന സെറിമോണിയല്‍ പരേഡില്‍ കെ എ പി നാലാം ബറ്റാലിയന്‍, സായുധ പൊലീസ്, ലോക്കല്‍ പൊലീസ് (പുരുഷന്‍-വനിത), എക്സൈസ്, ഫോറസ്റ്റ്, ജയില്‍, ഫയര്‍ ആന്റ് റെസ്‌ക്യൂ വിഭാഗങ്ങളുടെ ഓരോ പ്ലാറ്റൂണുകള്‍, എന്‍.സി.സി, സ്‌കൗട്ട്സ്&ഗൈഡ്സ്, ജൂനിയര്‍ റെഡ്ക്രോസ് എന്നിവയുടെ ഏഴ് വീതം പ്ലാറ്റൂണുകള്‍, സ്റ്റുഡന്റ്സ് പൊലീസ് കേഡറ്റിന്റെ രണ്ട് പ്ലാറ്റൂണുകള്‍ എന്നിവ അണിനിരക്കും.
പരേഡിന്റെ ഭാഗമായി വിവിധ വകുപ്പുകളുടെ നേതൃത്വത്തില്‍ വര്‍ണശബളമായ ഫ്ളോട്ടുകള്‍ അവതരിപ്പിക്കും. ദേശീയോദ്ഗ്രഥനം പ്രമേയമാക്കി അവതരിപ്പിക്കുന്ന ഫ്ളോട്ടുകളില്‍ സിവില്‍ വിഭാഗത്തിനും സ്‌കൂള്‍ വിദ്യാര്‍ഥികള്‍ക്കും പ്രത്യേക സമ്മാനങ്ങള്‍ നല്‍കും. ഓരോ വിഭാഗത്തിലെയും മികച്ച ടീമിന് കലക്ടേഴ്സ് ട്രോഫി എന്ന പേരില്‍ എവര്‍ റോളിംഗ് ട്രോഫി ഉള്‍പ്പടെ സമ്മാനങ്ങള്‍ നല്‍കുന്നുണ്ട്. ആദ്യ മൂന്ന് സ്ഥാനങ്ങള്‍ക്ക് 10000, 5000, 3000 രൂപ എന്നിങ്ങനെയാണ് സമ്മാനം. 2019ല്‍ ജനോപകാരപ്രദമായ നൂതന പദ്ധതികള്‍ നടപ്പിലാക്കിയ വകുപ്പിനുള്ള പ്രശസ്തി പത്രവും മെഡലും ചടങ്ങില്‍ സമ്മാനിക്കും. പരേഡില്‍ പങ്കെടുക്കുന്നവര്‍ക്കും ദേശീയഗാനം ദേശഭക്തിഗാനം എന്നിവ ആലപിക്കുന്നവര്‍ക്കും ആവശ്യമായ യാത്രാ സൗകര്യം ഒരുക്കുന്നതാണ്.പൂര്‍ണമായും ഹരിത പെരുമാറ്റച്ചട്ടം പാലിച്ചാവും ദിനാഘോഷം.
ആഘോഷച്ചടങ്ങ് വീക്ഷിക്കാന്‍ പൊതുജനങ്ങള്‍ക്ക് പ്രത്യേക സൗകര്യം ഒരുക്കും. ജില്ലയിലെ മുഴുവന്‍ സര്‍ക്കാര്‍ ജീവനക്കാരും കണ്ണൂര്‍ പൊലീസ് പരേഡ് ഗ്രൗണ്ടിലോ അവരവരുടെ ഓഫീസുകളിലോ നടക്കുന്ന റിപ്പബ്ലിക് ദിന പരിപാടികളില്‍ പങ്കെടുക്കണമെന്ന് ജില്ലാ കലക്ടര്‍ ടി വി സുഭാഷ് അറിയിച്ചു.
- Log in to post comments