മലബാര്‍ ദേവസ്വം ബോര്‍ഡിന് കീഴിലുള്ള മലപ്പുറം ജില്ലയിലെ കൊണ്ടോട്ടി താലൂക്കിലെ തിരുവങ്ങാട്ട് ശിവക്ഷേത്രം, ഏറനാട് താലൂക്കിലെ തൃപ്പനച്ചി പെരുംതൃക്കോവില്‍ ദേവസ്വം, കരുമന്‍കാവ് ദേവസ്വം, ചെറുകുറ്റിശ്ശേരി ക്ഷേത്രം, ചങ്ങമംഗലം വിഷ്ണുക്ഷേത്രം, നിലമ്പൂര്‍ താലൂക്കിലെ നീലേമ്പ്ര കരിങ്കാളി ക്ഷേത്രം എന്നിവിടങ്ങളിലെ പാരമ്പര്യേതര ട്രസ്റ്റിമാരുടെ ഒഴിവിലേക്ക് ഹിന്ദുമത ധര്‍മസ്ഥാപന നിയമപ്രകാരം അര്‍ഹരായ തദ്ദേശവാസികളില്‍ നിന്നും അപേക്ഷ ക്ഷണിച്ചു.

'എല്ലാവര്‍ക്കും ഭൂമി, എല്ലാ ഭൂമിക്കും രേഖ, എല്ലാ രേഖകളും സ്മാര്‍ട്ട്' എന്ന ആപ്തവാക്യം യാഥാര്‍ത്ഥ്യമാക്കുന്നതിന്റെ ഭാഗമായി നിയോജക മണ്ഡലാടിസ്ഥാനത്തില്‍ പട്ടയ അസംബ്ലികള്‍ സംഘടിപ്പിക്കാന്‍ തീരുമാനിച്ചതിന്റെ ഭാഗമായി മഞ്ചേരി നിയോജക മണ്ഡലത്തിലെ പട്ടയ അസംബ്ലി മാര്‍ച്ച് 26ന് രാവിലെ 11ന് മഞ്ചേരി ടൗണ്‍ ഹാളില്‍ ചേരും. അഡ്വ. യു.എ ലത്തീഫ് എം.എല്‍.എ അധ്യക്ഷത വഹിക്കുന്ന അസംബ്ലിയില്‍ മണ്ഡലത്തിലെ വിവിധ പട്ടയ പ്രശ്നങ്ങള്‍ ചര്‍ച്ച ചെയ്യുകയും  ഉചിതമായ തീരുമാനം കൈക്കൊള്ളുകയും ചെയ്യും. പരിപാടിയില്‍ മണ്ഡലത്തിലെ രാഷ്ട്രീയ പ്രതിനിധികളും, ജീവനക്കാരും പങ്കെടുക്കും.

മാലിന്യ സംസ്‌കരണവുമായി ബന്ധപ്പെട്ട് തദ്ദേശ വകുപ്പിന്റെ കീഴിലുള്ള ജില്ലാ എൻഫോഴ്സ്‌മെന്റ് സ്‌ക്വാഡിന്റെ പരിശോധന ഊർജിതമായി തുടരുന്നു. ഇന്നലെ നിലമ്പൂർ നഗരസഭയിൽ നടത്തിയ പരിശോധനയിൽ സർക്കാർ നിരോധനമുള്ള  300 എം.എല്ലിന്റെ 11292 പ്ലാസ്റ്റിക് കുടിവെള്ള കുപ്പികൾ പിടിച്ചെടുത്തു. നിലമ്പൂർ നഗരസഭയിലെ കരിമ്പുഴയിൽ പ്രവർത്തിക്കുന്ന ഹിൽവ വാട്ടർ എന്ന സ്ഥാപനത്തിൽ നിന്നാണ് കുടിവെള്ള കുപ്പികൾ പിടിച്ചെടുത്തത്. സ്ഥാപനത്തിനെതിരെ 10,000 രൂപ പിഴ ചുമത്തുന്നതിന് നിലമ്പൂർ മുനിസിപ്പൽ സെക്രട്ടറിക്ക് ജില്ലാ എൻഫോഴ്സ്മെന്റ് സ്‌ക്വാഡ് നിർദേശം നൽകി.

സൂക്ഷ്മ ചെറുകിട ഇടത്തരം സാരംഭങ്ങളുടെ അഭിവൃദ്ധിയും ഉന്നമനവും ലക്ഷ്യംവെച്ച് കേന്ദ്ര-സംസ്ഥാന സർക്കാരുകളുടെ സംയുക്താഭിമുഖ്യത്തിൽ നടപ്പാക്കുന്ന ആർ.എ.എം.പി പദ്ധതിയുടെ ഭാഗമായി സംരംഭകർക്കായി ബാങ്കേഴ്‌സ് മീറ്റ് സംഘടിപ്പിച്ചു. ഏറനാട് താലൂക്ക് വ്യവസായ ഓഫീസിന്റെ നേതൃത്വത്തിൽ മഞ്ചേരി ഇന്ത്യൻ മാളിൽ നടന്ന പരിപാടി മഞ്ചേരി മുനിസിപ്പാലിറ്റി ചെയർപേഴ്‌സൺ വി.എം. സുബൈദ ഉദ്ഘാടനം ചെയ്തു. ഏറനാട് ഉപജില്ലാ വ്യവസായ ഓഫീസർ എം. ശ്രീരാജ് അധ്യക്ഷത വഹിച്ചു. മലപ്പുറം ജില്ലാ വ്യവസായ കേന്ദ്രം ജനറൽ മാനേജർ ആർ. ദിനേശ് മുഖ്യപ്രഭാഷണം നടത്തി. കെ.എസ്.എസ്.ഐ.എ ജില്ലാ സെക്രട്ടറി മുജീബ് റഹ്‌മാൻ സംസാരിച്ചു.

യുനെസ്കോയുടെ നിയന്ത്രണത്തിലുള്ള ഇന്റർഗവണ്മന്റൽ ഓഷ്യനോഗ്രാഫിക് കമ്മീഷൻ, ദേശീയ സമുദ്ര സ്ഥിതിപഠന ഗവേഷണ കേന്ദ്രം, കേരള ദുരന്ത നിവാരണ അതോറിറ്റി എന്നിവ സംയുക്‌തമായി കരുംകുളം ഗ്രാമ പഞ്ചായത്തിൽ നടപ്പിലാക്കുന്ന സുനാമി റെഡി പദ്ധതിയുടെ ഭാഗമായി മോക്ക് ഡ്രിൽ സംഘടിപ്പിക്കുന്നു. മാർച്ച് 15 ന് കരുംകുളം ഗ്രാമപഞ്ചായത്തിലെ ഏഴ് , എട്ട്  വാർഡുകളിലാണ് മോക്ക്ഡ്രിൽ നടത്തുന്നത്.

നെയ്യാറ്റിൻകര നിയോജക മണ്ഡലത്തിലെ പട്ടയ വിഷയങ്ങൾ ചർച്ച ചെയ്യാൻ പട്ടയ അസംബ്ലി ഇന്ന്  (മാർച്ച് 14 ) കൂടുന്നു. രാവിലെ 10.30ന് നെയ്യാറ്റിൻകര സ്വദേശാഭിമാനി ടൗൺ ഹാളിൽ നടക്കുന്ന പട്ടയ അസംബ്ലിയിൽ  കെ.ആൻസലൻ എം.എൽ.എ അധ്യക്ഷത വഹിക്കും.

പട്ടയ അസംബ്ലിയിൽ നെയ്യാറ്റിൻകര നിയോജക മണ്ഡലത്തിൽ ഉൾപ്പെടുന്ന എല്ലാ ജനപ്രതിനിധികളും പങ്കെടുക്കണമെന്ന് നെയ്യാറ്റിൻകര തഹസിൽദാർ അറിയിച്ചു.

ആറ്റുകാൽ പൊങ്കാലയോടനുബന്ധിച്ച് വിന്യസിച്ച മൊബൈൽ മെഡിക്കൽ യൂണിറ്റുകളുടെ ഫ്ലാഗ് ഓഫ് ഭക്ഷ്യ വകുപ്പ് മന്ത്രി ജി.ആർ അനിൽ നിർവഹിച്ചു.  6 ബൈക്ക് ഫസ്റ്റ് റെസ്‌പോണ്ടറുകളും 1 ബൈക്ക് ഫീഡർ ആംബുലൻസും ഒരു ഐ.സി. യു  ആംബുലൻസും ഒരു റെസ്ക്യൂ വാനും ആണ് ഇതിൻ്റെ ഭാഗമായി വിന്യസിച്ചിരിക്കുന്നത്.  6 ബൈക്ക് ഫസ്റ്റ് റെസ്‌പോണ്ടറുകളും ബൈക്ക് ഫീഡർ ആംബുലൻസും ഒരു നഴ്സ് ആയിരിക്കും പ്രവർത്തിപ്പിക്കുന്നത്.

ആറ്റുകാൽ പൊങ്കാല പൂർണമായും ഹരിത ചട്ടം പാലിച്ച് നടത്തുന്നതിന്റെ ഭാഗമായി ഫേസ് ടു ഫേസ് ക്യാമ്പയിൻ നടത്തി  ഗ്രീൻ ആർമി വോളന്റിയേഴ്‌സ്. ആറ്റുകാൽ ഉത്സവ മേഖലകളിൽ പല സ്ഥലത്തും 150 ഓളം ഗ്രീൻ ആർമി വോളന്റിയേഴ്‌സിനെ തിരുവനന്തപുരം കോർപറേഷനും  ജില്ലാ ശുചിത്വ മീഷനും ചേർന്ന് വിന്യസിച്ചിട്ടുണ്ട്.ഉത്സവ മേഖലയിലെ ഹരിത ചട്ടങ്ങൾ കാര്യക്ഷമമായി നടപ്പിലാക്കുന്നുണ്ടോ എന്ന് പരോശോധിക്കുകയാണ് അവരുടെ പ്രധാന ഉത്തരവാദിത്വം.  പൊങ്കാല ഇടാൻ എത്തുന്ന ഭക്തജനങ്ങളെ നേരിട്ട് കണ്ട് ബോധവത്കരണം  നടത്തുന്നുണ്ട്.

ഇടുക്കി ജില്ലയിലെ ദേവികുളം, പീരുമേട്, തൊടുപുഴ താലൂക്കുകളുടെ പരിധിയിലുള്ള ആദിവാസി ഊരുകളില്‍ റേഷന്‍ സാധനങ്ങള്‍ എത്തിക്കുന്നതിനായി പിക്കപ്പ് വാന്‍(4x4) ഡ്രൈവര്‍ അടക്കം പ്രതിമാസ വാടകയ്ക്ക് നല്‍കുന്നതിന് മത്സരാടിസ്ഥാനത്തിലുള്ള സീല്‍ ചെയ്ത ക്വട്ടേഷനുകള്‍ ക്ഷണിച്ചു.

മാലിന്യ മുക്തം നവകേരളം ജനകീയ ക്യാമ്പെയിനിന്റെ ഭാഗമായി ജില്ലയിലെ 10,819 (97%) കുടുംബശ്രീ അയല്‍ക്കൂട്ടങ്ങളെ ജില്ലാ പഞ്ചായത്ത് പ്രസിഡന്റ് രാരിച്ചന്‍ നീറണാകുന്നേല്‍ ഹരിതമായി പ്രഖ്യാപിച്ചു.ജില്ലയിലാകെ 11,153 അയല്‍ക്കൂട്ടങ്ങളാണുള്ളത്.കുടയത്തൂര്‍ പഞ്ചായത്തിലെ ശരംകുത്തി റസിഡന്‍സ് അസോസിയേഷനെ ജില്ലയിലെ ആദ്യ ഹരിത റസി. അസോസിയേഷനായും പ്രഖ്യാപിച്ചു.