കരകുളം ഗ്രാമപഞ്ചായത്തിലെ നവീകരിച്ച കുരിശ്ശടി- പേഴുംമൂട്-നമ്പാട്- മുല്ലശ്ശേരി റോഡിന്റെ ഉദ്ഘാടനം ഭക്ഷ്യ പൊതുവിതരണ വകുപ്പ് മന്ത്രി ജി ആർ അനിൽ നിർവഹിച്ചു.

ഗ്രാമപഞ്ചായത്തിലെ പ്രധാനപ്പെട്ട ഒരു റോഡാണ് നവീകരിച്ച് നാടിന് സമർപ്പിക്കുന്നതെന്ന് മന്ത്രി പറഞ്ഞു. റോഡ് നവീകരിച്ചതോടെ ബസ് സർവീസ് ഉടൻ പുനരാരംഭിക്കാൻ കഴിയും.
പഞ്ചായത്ത് പരിധിയിലെ 17 ഓളം റോഡുകളുടെ  നവീകരണത്തിനുള്ള ഉത്തരവ് ലഭിച്ചു കഴിഞ്ഞു. ടെൻഡർ നടപടികളിലേയ്ക്ക് കടക്കുകയാണെന്നും മന്ത്രി അറിയിച്ചു.  

മാലിന്യമുക്ത നവകേരളം പ്രചാരണത്തിന്റെ ഭാഗമായി  ഏഴോം ഗ്രാമപഞ്ചായത്തിലെ നെരുവമ്പ്രം ഐ.എച്ച്.ആർ.ഡി കോളേജ് ഓഫ് അപ്ലൈഡ് സയൻസ് ഹരിതകലാലയമായി പ്രഖ്യാപിച്ചു. എം വിജിൻ എം.എൽ.എ ഹരിത കലാലയ പ്രഖ്യാപനം നടത്തി സർട്ടിഫിക്കറ്റ് കൈമാറി. ഏഴോം ഗ്രാമപഞ്ചായത്ത് പ്രസിഡന്റ് പി ഗോവിന്ദൻ അധ്യക്ഷനായി. ഹരിതകർമസേന അംഗങ്ങളായ ടി. ജിൻഷ, റൂബ എന്നിവരെ ആദരിച്ചു. വിദ്യാർഥികൾ ശുചിത്വ പ്രതിജ്ഞ എടുത്തു.

കാർഷിക മേഖലയിലെ സ്റ്റാർട്ടപ്പുകളും സംരംഭകത്വവും പ്രോത്സാഹിപ്പിക്കുന്നതിനായി, കാർഷിക സർവ്വകലാശാലയും നബാർഡും വെസ്റ്റേൺ സിഡ്നി യൂണിവേഴ്സിറ്റിയും സംയുക്തമായി വെള്ളായണി കാർഷിക കോളേജിൽ ആരംഭിക്കുന്ന "കെ-അഗ്രിടെക് ലോഞ്ച്പാഡ്" പദ്ധതിയുടെ  ലോഗോ അനാച്ഛാദനവും ഉദ്ഘാടനവും കാർഷിക വികസന കർഷക ക്ഷേമ വകുപ്പ് മന്ത്രി പി. പ്രസാദ് നിർവഹിച്ചു. വിളവെടുപ്പിന് ശേഷമുള്ള ഭീമമായ നഷ്ടം നികത്തിക്കൊണ്ട് കാർഷിക മേഖലയുടെ വികസനത്തിനായി നൂതനാശയങ്ങൾ ഉൾകൊള്ളുന്ന സ്റ്റാർട്ടപ്പുകളെയും കർഷക സംരംഭകരെയും പ്രോത്സാഹിപ്പിക്കുന്നതിലൂടെ കർഷകരുമായി ആത്മബന്ധം സ്ഥാപിക്കുന്നതിനുള്ള ചുവടുവെപ്പായി ഈ പദ്ധതി മാറുമെന്ന് കൃഷിമന്ത്രി പറഞ്ഞു.

ചമ്പക്കുളം ബ്ലോക്ക് പഞ്ചായത്ത് നിർമ്മിച്ച വഴിയോര വിശ്രമ കേന്ദ്രം  'ടേക്ക് എ ബ്രേക്ക് ' പദ്ധതിയുടെ ഉദ്ഘാടനം ബ്ലോക്ക് പഞ്ചായത്ത് പ്രസിഡന്റ് ജിൻസി ജോളി നിർവ്വഹിച്ചു. ചമ്പക്കുളം ബസ് സ്റ്റാൻഡിന് സമീപം സിഎച്ച്സിയുടെ സ്ഥലത്താണ് കെട്ടിടം നിർമ്മിച്ചത്. 8,12,648 രൂപയാണ് ചെലവ്. ഭിന്നശേഷിക്കാർ, സ്ത്രീകൾ, പുരുഷന്മാർ എന്നിവർക്കായി പ്രത്യേകം ശുചിമുറി സൗകര്യവും ഒരുക്കിയിട്ടുണ്ട്. കുടുംബശ്രീ പ്രവർത്തകർക്കാണ്  പരിപാലന ചുമതല. ചടങ്ങിൽ പഞ്ചായത്ത് വൈസ് പ്രസിഡന്റ് എം എസ് ശ്രീകാന്ത് അധ്യക്ഷനായി.

#നേമം കൃഷി ഭവനെ കൃഷിസമൃദ്ധി പദ്ധതിയില്‍ ഉള്‍പ്പെടുത്തി

യുവ തലമുറയ്ക്കായുള്ള പദ്ധതിയാണ് 'കൃഷി സമൃദ്ധി'യെന്ന് കൃഷി വകുപ്പ് മന്ത്രി പി. പ്രസാദ്. കാര്‍ഷിക മേഖലയിലെ സമഗ്രവികസനം ലക്ഷ്യമിട്ട് കൃഷിവകുപ്പ് നടപ്പിലാക്കുന്ന കൃഷിസമൃദ്ധി പദ്ധതിയിൽ നേമം കൃഷി ഭവനെ ഉൾപ്പെടുത്തുന്നതിന്റെ ഉദ്ഘാടനം നിർവഹിച്ചു സംസാരിക്കുകയായിരുന്നു അദ്ദേഹം.

നാഷണല്‍ സര്‍വീസ് സ്‌കീം മുന്‍കൈയെടുത്ത് പദ്ധതിയ്ക്കായി വിവരശേഖരണം നടത്തുന്നത് മാതൃകാപരമാണെന്ന് മന്ത്രി പറഞ്ഞു. കൃഷിയുടെ ആനുകൂല്യം കൈപ്പറ്റുന്നവരാണ് എല്ലാവരും. നമ്മള്‍ കഴിക്കുന്ന ഭക്ഷണത്തിന്റെ 95% കൃഷി ചെയ്ത് ഉണ്ടാക്കുന്നതാണ്.

നെടുമുടി - ചമ്പക്കുളം ഗ്രാമപഞ്ചായത്തുകളെ തമ്മിൽ ബന്ധിപ്പിക്കുന്ന കോതറത്തോട് പാലം നിർമ്മാണത്തിന് 26.3 കോടി രൂപയുടെ ഭരണാനുമതി ലഭിച്ചതായി തോമസ് കെ തോമസ് എംഎൽഎ അറിയിച്ചു. 265 മീറ്ററാണ് പാലത്തിൻ്റെ നീളം. 26 മീറ്റർ നീളമുള്ള മൂന്ന് സ്പാനുകളും 12.50 മീറ്റർ നീളമുള്ള 15 പാനുകളും 7.50 മീറ്റർ ക്യാരേജ് വേയും പാലത്തിനുണ്ടാകും. 1.50 മീറ്റർ വീതിയിൽ ഇരുവശത്തും നടപ്പാത ഉൾപ്പെടെ 11 മീറ്റർ വീതിയിലാണ് പാലം നിർമ്മിക്കുക. പൊതുമരാമത്ത് പാലം വിഭാഗത്തിനാണ് മേൽനോട്ട ചുമതല. സ്ഥലം ഏറ്റെടുക്കൽ പൂർത്തിയാക്കി ടെൻഡർ നടപടികൾ വേഗത്തിലാക്കാൻ ബന്ധപ്പെട്ടവർക്ക് നിർദ്ദേശം നൽകിയതായും എംഎൽഎ അറിയിച്ചു.
 

#ജൈവ കൃഷിക്ക് പ്രചാരമേറുന്നു

കാര്‍ഷിക വികസന കര്‍ഷക ക്ഷേമ വകുപ്പ് ആത്മ മുഖേന ജൈവ കൃഷി പ്രോത്സാഹിപ്പിക്കുന്നതിന്റെ ഭാഗമായി നല്‍കുന്ന ജൈവ സര്‍ട്ടിഫിക്കേഷന്‍ നേടി ജില്ലയിലെ 3359 കര്‍ഷകര്‍. പാര്‍ട്ടിസിപ്പേറ്ററി ഗ്യാരണ്ടി സിസ്റ്റം എന്ന പദ്ധതി അനുസരിച്ചാണ് ജൈവ കാര്‍ഷിക ഉത്പന്നങ്ങള്‍ക്ക് സൗജന്യമായി സാക്ഷ്യപത്രം നല്‍കുന്നത്.

ജില്ലയില്‍ 3359 കര്‍ഷകര്‍ സാക്ഷ്യപത്രം നേടിയതോടെ ആയിരത്തോളം ഹെക്ടറില്‍ ജൈവകൃഷി ആരംഭിക്കുകയും ചെയ്തു. പിജിഎസ് മാനദണ്ഡങ്ങള്‍ അനുസരിച്ച് ജൈവകൃഷി ചെയ്യുന്ന കര്‍ഷകര്‍ /കര്‍ഷക ഗ്രൂപ്പുകള്‍ എന്നിവരാണ് ഇതിനായി അപേക്ഷിക്കേണ്ടത്.

അടിസ്ഥാന സൗകര്യങ്ങള്‍ മെച്ചപ്പെടുത്തുന്നതിനായി കേരള പ്രിസണ്‍സ് ആന്റ് കറക്ഷണല്‍ സര്‍വ്വീസസ്, 'ജയിലുകളുടെ നവീകരണം' വാര്‍ഷിക പദ്ധതിയില്‍ ഉള്‍പ്പെടുത്തി നിർമ്മിച്ച ആറ്റിങ്ങൽ സബ് ജയിൽ അഡ്മിനിസ്ട്രേറ്റീവ് ബ്ലോക്ക് ഉ​ദ്ഘാടനം ചെയ്തു. ഒ.എസ് അംബിക എംഎൽഎ, പ്രിസണ്‍സ് ആന്റ് കറക്ഷണല്‍ സര്‍വ്വീസസ് ഡയറക്ടര്‍ ജനറല്‍ ബല്‍റാം കുമാര്‍ ഉപാദ്ധ്യായ, ആറ്റിങ്ങൽ സബ് ജയിൽ സൂപ്രണ്ട് സച്ചിൻ.സി എന്നിവർ പങ്കെടുത്തു,

കേരള സ്റ്റേറ്റ് എയ്ഡ്‌സ് കൺട്രോൾ സൊസൈറ്റിയുടെ കീഴിൽ പ്രവർത്തിക്കുന്ന സ്‌നേഹതീരം എം.എസ്.എം സുരക്ഷ പ്രൊജക്ടിൽ പ്രൊജക്ട് മാനേജരുടെയും കൗൺസിലറുടെയും ഒഴിവുകളിലേക്ക് അപേക്ഷ ക്ഷണിച്ചു. എംഎസ്ഡബ്ല്യു/ എംഎ സോഷ്യോളജിയും മൂന്ന് വർഷത്തെ പ്രവൃത്തി പരിചയവും ഉള്ളവർക്ക് പ്രൊജക്ട് മാനേജർ തസ്തികയിലേക്ക് അപേക്ഷിക്കാം. എംഎസ്ഡബ്യു ബിരുദധാരികൾക്ക് കൗൺസിലർ തസ്തികയിലേക്ക് അപേക്ഷിക്കാം. താൽപര്യമുള്ളവർ മാർച്ച് 19 നകം snehatheeramkannur@gmail.com എന്ന ഇ-മെയിലിൽ അപേക്ഷ സമർപ്പിക്കണം. ഫോൺ: 9847381696

ധനുവച്ചപുരം ഗവ. ഐ.ടി.ഐയില്‍ ടര്‍ണര്‍ ട്രേഡില്‍ ജൂനിയർ ഇന്‍സ്ട്രക്ടറുടെ ഒഴിവിലേക്കായി ഗസ്റ്റ് ഇന്‍സ്ട്രക്ടറെ നിയമിക്കുന്നു. ഈഴവ/ ബില്ല/ തിയ്യ വിഭാഗത്തില്‍പ്പെട്ടവർക്ക് സംവരണം ചെയ്തിരിക്കുന്ന ഒഴിവിലേക്കാണ് നിയമനം.

ബന്ധപ്പെട്ട വിഷയത്തില്‍ ഡിഗ്രി/ഡിപ്ലോമ അല്ലെങ്കില്‍ ബന്ധപ്പെട്ട ട്രേഡില്‍ എന്‍എസിയും ഒരുവര്‍ഷത്തെ പ്രവര്‍ത്തിപരിചയവും / എന്‍ടിസിയും മൂന്നുവര്‍ഷത്തെ പ്രവര്‍ത്തിപരിചയവുമാണ് യോഗ്യത.