ഹരിതകേരളം മിഷന്‍ രൂപീകരിച്ചിതിന്റെ ഒന്നാം വാര്‍ഷികത്തോടനുബന്ധിച്ചുള്ള ജില്ലാതല പരിപാടി ഈ മാസം 12ന് ഉച്ചയ്ക്ക് രണ്ടിന് ബേഡഡുക്ക കുണ്ടംകുഴി   മാനസം  ഓഡിറ്റോറിയത്തില്‍ നടക്കും. പി.കരുണാകരന്‍ എം.പി ഉദ്ഘാടനം ചെയ്യും.  കെ.കുഞ്ഞിരാമന്‍ എം.എല്‍.എ അധ്യക്ഷത വഹിക്കും. വാര്‍ഷികത്തോടനുബന്ധിച്ച്  കഴിഞ്ഞ ഒരു വര്‍ഷം  നടന്ന പ്രവര്‍ത്തനങ്ങളുടെ ഫോട്ടോ പ്രദര്‍ശനം, വിവിധ ഉപമിഷനുകളില്‍ നടന്ന പ്രവര്‍ത്തനങ്ങളുടെ അവതരണം, ബേഡകം അരിയുടെ  വിപണനോദ്ഘാടനം എന്നിവ നടക്കും.     ബേഡകം അരിയുടെ വിപണനോദ്ഘാടനം ജില്ലാ പഞ്ചായത്ത് പ്രസിഡന്റ് എ.ജി.സി.ബഷീര്‍ നിര്‍വഹിക്കും.

    പരിസരശുചിത്വം, മെച്ചപ്പെട്ട സേവനങ്ങള്‍, അടിസ്ഥാനസൗകര്യങ്ങള്‍ എന്നിവ ഉറപ്പാക്കി വിനോദസഞ്ചാരികള്‍ക്കും തദ്ദേശീയര്‍ക്കും  പ്രിയപ്പെട്ട പ്രദേശങ്ങളായി ടൂറിസം കേന്ദ്രങ്ങളെ ഉയര്‍ത്തുന്നതിന് ടൂറിസം വകുപ്പ് ആവിഷ്‌കരിച്ച നടപ്പാക്കുന്ന ഗ്രീന്‍ കാര്‍പ്പറ്റ് പദ്ധതി ജില്ലയില്‍  ബേക്കല്‍, റാണിപുരം  കേന്ദ്രങ്ങളെ തെരഞ്ഞെടുത്തു. കളക്ടറേറ്റ് കോണ്‍ഫറന്‍സ് ഹാളില്‍ നടന്ന ഗ്രീന്‍കാര്‍പ്പറ്റ് അവലോകനയോഗത്തില്‍ ജില്ലാകളക്ടര്‍ ജീവന്‍ബാബു കെ അധ്യക്ഷത വഹിച്ചു.

   ഗെയ്ല്‍ പൈപ്പ്‌ലൈന്‍ സ്ഥാപിക്കുന്നതിന്  ഭൂമി വിട്ടുനല്‍കിയവര്‍ക്ക് നഷ്ടപരിഹാരം നല്‍കി തുടങ്ങി. കാര്‍ഷികവിളകളുടെ നഷ്ടത്തിനാണ്  നഷ്ടപരിഹാരം നല്‍കിയത്.

   കൊച്ചി-കൂറ്റനാട്-മംഗലാപുരം ഗ്യാസ് പൈപ്പ്‌ലൈന്‍ പ്രവര്‍ത്തികള്‍ സമയബന്ധിതമായി പൂര്‍ത്തിയാക്കാനും ഭൂവുടമകള്‍ക്ക് മതിയായ നഷ്ടപരിഹാരം നല്‍കുന്ന നടപടികള്‍ ത്വരിതപ്പെടുത്താനും തീരുമാനമായി. ജില്ലാകളക്ടര്‍ ജീവന്‍ബാബു കെയുടെ അധ്യക്ഷതയില്‍ കളക്ടറേറ്റ് കോണ്‍ഫറന്‍സ് ഹാളില്‍ ചേര്‍ന്ന അവലോകന യോഗത്തിലാണ് തീരുമാനം. എംഎല്‍എ മാരായ എന്‍എ നെല്ലിക്കുന്ന്്, എം രാജഗോപാലന്‍ എന്നിവരും  യോഗത്തില്‍ പങ്കെടുത്തു. ജനങ്ങളുടെ ആശങ്കകള്‍ പരിഹരിക്കണമെന്ന് എന്‍ എ നെല്ലിക്കുന്ന് യോഗത്തില്‍ പറഞ്ഞു.

രാജ്യത്തിന്റെ ഐക്യവും അഖണ്ഡതയും കാത്തു സൂക്ഷിക്കാന്‍  ജീവന്‍ ത്യജിക്കാന്‍ പോലും  സന്നദ്ധരായി നിലകൊള്ളുന്ന സൈനികര്‍ നാടിന്റെ അമൂല്യസമ്പത്താണെന്ന് എന്‍ എ നെല്ലിക്കുന്ന് എംഎല്‍എ പറഞ്ഞു. ജില്ലാസൈനികക്ഷേമ ഓഫീസ് കളക്ടറേറ്റ് കോണ്‍ഫറന്‍സ്ഹാളില്‍ സംഘടിപ്പിച്ച സായുധസേന പതാകദിനാചരണം ഉദ്ഘാടനം ചെയ്യുകയായിരുന്നു എംഎല്‍എ. 

സംസ്ഥാന വനം വകുപ്പ് നിയമനങ്ങളില്‍ സ്‌പോര്‍ട്‌സ് ക്വാട്ട വര്‍ധിപ്പിക്കുമെന്ന് വനം വകുപ്പ് മന്ത്രി അഡ്വ. കെ രാജു അറിയിച്ചു. ഇക്കാര്യം സര്‍ക്കാറിന്റെ സജീവ പരിഗണനയിലാണ്. വനം വകുപ്പ് വിവിധ മേഖലകളില്‍ സ്‌പോര്‍ട്‌സ്-ഗെയിംസ് ടീമുകളെ വാര്‍ത്തെടുക്കുന്ന കാര്യം ആലോചിക്കുമെന്നും മന്ത്രി പറഞ്ഞു. ഇരുപത്തിയഞ്ചായമത് സംസ്ഥാന വനം കായിക മേളയുടെ ഉദ്ഘാടനം മാങ്ങാട്ടുപറമ്പ് കെ.എ.പിയില്‍ നിര്‍വഹിച്ച് സംസാരിക്കുകയായിരുന്നു അദ്ദേഹം. 

സി-ഡിറ്റ് സൈബര്‍ശ്രീ സെന്ററില്‍ മാറ്റ്ലാബ് പരിശീലനത്തിന് പട്ടികജാതി വിഭാഗത്തില്‍പ്പെട്ടവരില്‍ നിന്നും അപേക്ഷ ക്ഷണിച്ചു. നാലു മാസത്തെ പരിശീലനത്തിന് ഇലക്ട്രോണിക്സ്, ഇലക്ട്രിക്കല്‍, കംപ്യൂട്ടര്‍ സയന്‍സ്, ഐ.ടി., അപ്ലൈഡ് ഇലക്ട്രോണിക്സ് എന്നിവയില്‍ എഞ്ചിനീയറിംഗ് ബിരുദം/ എം.സി.എ പാസ്സായവര്‍/പ്രസ്തുത കോഴ്സുകള്‍ പൂര്‍ത്തീകരിച്ചവര്‍ക്കും/ബി എസ് സി (കമ്പ്യൂട്ടര്‍ സയന്‍സ് & ഇലക്ട്രോണിക്സ്) പാസ്സായവര്‍ക്കും അപേക്ഷിക്കാം.  പ്രായപരിധി 20 നും  26 നും ഇടയില്‍. തിരുവനന്തപുരത്ത് നല്‍കുന്ന പരിശീലനത്തിന് പങ്കെടുക്കുന്നവര്‍ക്ക് പ്രതിമാസം 5000 രൂപ സ്‌റ്റൈപന്റ് ലഭിക്കും.

കേന്ദ്ര യുവജന കാര്യ-കായിക മന്ത്രാലയത്തിന്റെയും നെഹ്റു യുവ കേന്ദ്രയുടെയും നേതൃത്വത്തില്‍ 2018 ലെ റിപ്പബ്ലിക്ക് ദിനാഘോഷത്തിന്റെ ഭാഗമായി യുവജനങ്ങള്‍ക്കായി ജില്ലാ, സംസ്ഥാന, ദേശീയ തലങ്ങളില്‍ പ്രസംഗ മത്സരം സംഘടിപ്പിക്കുന്നു.  കണ്ണൂര്‍ ജില്ലയിലെ മത്സരം ഡിസംബര്‍ 7ന് നെഹ്റു യുവ കേന്ദ്ര ഹാളില്‍ നടക്കും. 2017 നവംബര്‍ 1 ന് 18 നും 29 നും ഇടയില്‍ പ്രായമുള്ള യുവതീ യുവാക്കള്‍ക്ക് പങ്കെടുക്കാം. 'ദേശ സ്നേഹവും രാഷ്ട്ര നിര്‍മാണവും' എന്ന വിഷയത്തില്‍ ഇംഗ്ലീഷിലോ ഹിന്ദിയിലോ ആയിരിക്കണം പ്രസംഗം. 2015-16, 2016-17 വര്‍ഷങ്ങളില്‍ നടന്ന ഇതേ മത്സരങ്ങളില്‍ പങ്കെടുത്തവര്‍ വീണ്ടും പങ്കെടുക്കാന്‍ പാടില്ല.

  കേന്ദ്രശാസ്ത്ര സാങ്കേതിക വകുപ്പും പൊതുമേഖല കണ്‍സള്‍ട്ടന്‍സി സ്ഥാപനമായ കിറ്റ്കോയും ചേര്‍ന്ന് അഹമ്മദാബാദിലെ എന്റര്‍പ്രണര്‍ഷിപ്പ് ഡവലപ്മെന്റ് ഇന്‍സ്റ്റിറ്റ്യൂട്ട് ഓഫ് ഇന്ത്യയുടെ സഹകരണത്തോടെ 4 ആഴ്ചത്തെ സൗജന്യ വ്യവസായ സംരംഭകത്വ വികസന പരിശീലനപരിപാടി നടത്തുന്നു.  കണ്ണൂര്‍ ക്യാപ്പിറ്റല്‍മാളിനടുത്തുള്ള കേരള സ്മോള്‍ സ്‌കെയില്‍ ഇന്‍ഡസ്ട്രീസ് അസോസിയേഷന്‍ വ്യവസായഭവന്‍ ഹാളില്‍ ഡിസംബര്‍-ജനുവരി മാസങ്ങളിലാണ് പരിശീലനം.  സ്വന്തമായി സംരംഭം ആരംഭിക്കാന്‍ ആഗ്രഹിക്കുന്ന സയന്‍സിലോ എഞ്ചിനീയറിങ്ങിലോ ബിരുദമോ ഡിപ്ലോമയോ ഉള്ളവര്‍ക്ക് അപേക്ഷിക്കാം.

ക്ഷീര വികസന വകുപ്പിന്റെ 2016-17 വര്‍ഷത്തെ കണ്ണൂര്‍ ജില്ലാതല ക്ഷീരകര്‍ഷക അവാര്‍ഡുകള്‍ പ്രഖ്യാപിച്ചു. മലപ്പട്ടം കോവല്‍ പുതിയപുരയില്‍ മൊയ്തീന്‍കുട്ടി ജില്ലയിലെ മികച്ച ക്ഷീരകര്‍ഷകനായി വീണ്ടും തെരഞ്ഞെടുക്കപ്പെട്ടു.