കൈത്തറി മേഖലയില്‍ സംരംഭങ്ങള്‍ തുടങ്ങുന്നതിന് എസ്.എസ്.എല്‍.സി യോഗ്യതയുളള കൈത്തറി മേഖലയില്‍ അഭിരുചിയുളളവരില്‍ നിന്ന് അപേക്ഷ ക്ഷണിച്ചു. കൈത്തറി , നെയ്ത്തില്‍ 10 വര്‍ഷത്തെ പരിചയമോ, കൈത്തറി/ടെക്സ്റ്റയില്‍ ടെക്നോളജിയില്‍ ഡിപ്ളൊമയോ ബിരുദമോ, കണ്ണൂര്‍ ഐ.ഐ.എച്ച്.റ്റി.യില്‍ നിന്ന് രണ്ട് വര്‍ഷത്തെ സര്‍ട്ടിഫിക്കറ്റ് കോഴ്സോ ഉളളവര്‍ക്ക് മുന്‍ഗണന ലഭിക്കും. സംരംഭം തുടങ്ങുന്നതിന് സ്വന്തമായി സ്ഥലമോ  അല്ലെങ്കില്‍ 15 വര്‍ഷത്തില്‍ കുറയാത്ത കാലാവധിയുള്ള പാട്ട സ്ഥലമോ ഉണ്ടായിരിക്കണം. ചുരുങ്ങിയത് 10 തറികളെങ്കിലും സ്ഥാപിക്കണം.

കുഴല്‍മന്ദം ഗവ.പ്രീ-എക്സാമിനേഷന്‍ ട്രെയിനിങ്ങ് സെന്‍ററില്‍ പട്ടികജാതി-വര്‍ഗ-ഒ.ബി.സി വിഭാഗത്തില്‍പ്പെട്ടവര്‍ക്ക് സൗജന്യ  പി.എസ്.സി. പരീക്ഷാ പരിശീലനം നല്‍കും. ബിരുദ യോഗ്യതയുള്ളവര്‍ ജാതി,  വരുമാനം (ഒ.ബി.സിക്കാര്‍ക്ക് മാത്രം), വിദ്യാഭ്യാസ യോഗ്യത എന്നിവയുടെ സ്വയം സാക്ഷ്യപ്പെടുത്തിയ പകര്‍പ്പുകള്‍, പാസ്പോര്‍ട്ട് സൈസ്     ഫോട്ടോ  സഹിതമുള്ള അപേക്ഷ ഡിസംബര്‍ 16 വൈകീട്ട്   അഞ്ചിനകം നല്‍കണം. 

കുഴല്‍മന്ദം ഗവ. മോഡല്‍ റസിഡന്‍ഷല്‍ പോളിടെക്നിക് കോളേജില്‍ കെമിസ്ട്രി  അധ്യാപകന്‍റെ താത്കാലിക ഒഴിവുണ്ട്. ഒന്നാം ക്ലാസ്സോടെയുള്ള എം.എസ്.സി. കെമിസ്ട്രി  ബിരുദമാണ് യോഗ്യത. താത്പര്യമുളളവര്‍ അസ്സല്‍ രേഖകള്‍ സഹിതം ഡിസംബര്‍ 11ന് രാവിലെ 10ന് കൂടികാഴ്ച്ചക്കെത്തണമെന്ന് പ്രിന്‍സിപ്പല്‍ അറിയിച്ചു. ഫോണ്‍ : 04922-272900

കേരള സംസ്ഥാന പരിവര്‍ത്തിത ക്രൈസ്തവ ശുപാര്‍ശിത  വിഭാഗ വികസന കോര്‍പ്പറേഷന്‍, ജില്ലയിലെ പട്ടികജാതി വിഭാഗത്തില്‍ നിന്നും ക്രിസ്തുമതത്തിലേയ്ക്ക് പരിവര്‍ത്തനം ചെയ്തവര്‍ക്കും പട്ടിക ജാതിയിലേയ്ക്ക് ശുപാര്‍ശ ചെയ്ത വിഭാഗക്കാര്‍ക്കുമായി (ഒ.ഇ.സി മാത്രം, മുന്നോക്ക/പിന്നോക്ക വിഭാഗങ്ങളിലെ മറ്റു ജാതിക്കാര്‍ അര്‍ഹരല്ല ) തൊഴില്‍ സംരംഭങ്ങള്‍ തുടങ്ങുന്നതിന് ദ്വിദിന സൗജന്യ പരിശീലനം നടത്തും. 18 നും 45നും ഇടയിലാണ് പ്രായപരിധി. എസ്.എസ്.എല്‍.എസിയാണ് അടിസ്ഥാന യോഗ്യത. നാഷണല്‍ ബാക്ക്വേര്‍ഡ് ക്ലാസ്സസ് ഫിനാന്‍ഷ്യല്‍ ഡെവലപ്പ്മെന്‍റ് കോര്‍പ്പറേഷന്‍റെ ധനസഹായത്തോടെയാണ് പരിശീലനം നടത്തുന്നത്.

കഞ്ചിക്കോട് ന്യൂ ഇന്‍ഡസ്ട്രിയല്‍ ഡെവലപ്മെന്‍റ് ഏരിയയിലെ സോഫ്റ്റ്വെയര്‍ ടെക്നോളജി പാര്‍ക്കില്‍ ചെറുകിട സംരംഭങ്ങള്‍ തുടങ്ങുന്നതിന് മുറികള്‍ പ്രതിമാസ വാടകയ്ക്ക് നല്‍കും. വിവരസാങ്കേതികം, കംപ്യൂട്ടര്‍, ഇലക്ട്രോണിക്സ് മേഖലകളില്‍ സംരംഭം തുടങ്ങാന്‍ താത്പര്യമുള്ളവര്‍ ഡിസംബര്‍ 20-ന് വൈകിട്ട് അഞ്ചിനകം ജില്ലാ വ്യവസായിക കേന്ദ്രത്തില്‍ അപേക്ഷ നല്‍കണം. വെള്ള പേപ്പറില്‍ തയാറാക്കിയ അപേക്ഷയില്‍ പദ്ധതി രൂപരേഖയും തിരിച്ചറിയല്‍ രേഖയും ഉള്‍പ്പെടുത്തണം. ഫോണ്‍: 0491 2505408.

മലബാര്‍ ദേവസ്വം ബോര്‍ഡ് മലപ്പുറം അസി.കമ്മീഷനറുടെ കീഴിലുള്ള ക്ഷേത്ര ജീവനക്കാര്‍ക്ക് 2016 വരെയുള്ള ശമ്പള കുടിശ്ശികയും 2017ലെ ശമ്പള അഡ്വാന്‍സും ലഭിക്കുന്നതിന് അപേക്ഷ നല്‍കണം. ക്ഷേത്രഭരണാധികാരികള്‍ ഡിസംബര്‍ 15നകം രേഖകള്‍ സഹിതം ഡിവിഷന്‍ ഇന്‍സ്പെക്റ്റര്‍ വഴി അസി.കമ്മീഷനര്‍ക്ക് അപേക്ഷ നല്‍കണം.
 

മലമ്പുഴ പ്രാദേശിക കാര്‍ഷിക സങ്കേതിക പരിശീലന കേന്ദ്രത്തില്‍ ഡിസംബര്‍ 14,15,16 തീയതികളില്‍ കര്‍ഷകര്‍ക്ക് പരിശീലനം നല്‍കും. 'നല്ല കൃഷിരീതിയിലൂടെ സുരക്ഷിത പച്ചക്കറി ഉത്പാദനം' വിഷയത്തില്‍ കുഴല്‍മന്ദം ബ്ലോക്കിലെ 20 കര്‍ഷകര്‍ക്കും, പട്ടാമ്പി ബ്ലോക്കിലെ 10 കര്‍ഷകര്‍ക്കും 'പഴം, പച്ചക്കറി, പയറുവര്‍ഗങ്ങള്‍, ചെറുധാന്യങ്ങള്‍ എന്നിവയുടെ സംസ്കരണവും മൂല്യവര്‍ധനവും' വിഷയത്തില്‍ ചിറ്റൂര്‍, കൊല്ലങ്കോട് ബ്ലോക്കുകളിലെ 30 കര്‍ഷകര്‍ക്കുമാണ് പരിശീലനം നല്‍കുക. താത്പര്യമുള്ളവര്‍ അതത് കൃഷി അസി. ഡയറക്റ്ററുടെ ഓഫീസില്‍ രജിസ്റ്റര്‍ ചെയ്യണമെന്ന് കൃഷി ഡെപ്യൂട്ടി ഡയറക്റ്റര്‍ അറിയിച്ചു. ഫോണ്‍: 0491-2815912 

അന്താരാഷ്ട്ര അഴിമതി വിരുദ്ധ ദിനാചരണത്തോടനുബന്ധിച്ച് 'വിശ്വാസ്'ന്‍റെ  നേതൃത്വത്തില്‍ ഇന്ന് (ഡിസംബര്‍ എട്ട് ) ഉദ്യോഗസ്ഥര്‍ക്ക് ബോധവത്ക്കരണ പരിപാടി നടത്തും. വൈകിട്ട് നാലിന് ജില്ലാ കലക്റ്ററേറ്റ് സമ്മേളനഹാളില്‍ നടക്കുന്ന പരിപാടി എം.ബി. രാജേഷ് എം.പി. ഉദ്ഘാടനം ചെയ്യും. ജില്ലാ കലക്റ്റര്‍ ഡോ: പി. സുരേഷ് ബാബു അധ്യക്ഷനാകും. ജസ്റ്റിസ് എം.എന്‍. കൃഷ്ണന്‍ മുഖ്യാതിഥിയാകും. മികച്ച ഡോക്റ്റര്‍ക്കുള്ള സംസ്ഥാന അവാര്‍ഡ് നേടിയ പൊലീസ് സര്‍ജന്‍ ഡോ: പി.ബി. ഗുജ്റാള്‍നെ പരിപാടിയില്‍ ആദരിക്കും. വിജിലന്‍സ് ഉദ്യോഗസ്ഥര്‍, സര്‍വീസ് സംഘടനാ നേതാക്കള്‍, എന്‍.എസ്.എസ്.വൊളന്‍റിയര്‍മാര്‍ പരിപാടിയില്‍ പങ്കെടുക്കും. 

സൈനികക്ഷേമ വകുപ്പ് മരണമടഞ്ഞ സൈനികരോടുള്ള കൃതജ്ഞത രേഖപ്പെടുത്തുന്നതിനായി സായുധസേനാ പതാകദിനാചരണം നടത്തി. ജില്ലാ പഞ്ചായത്ത് ഹാളില്‍ നടന്ന പരിപാടി  എം.ബി രാജേഷ് എം.പി  ഉദ്ഘാടനം ചെയ്ത് സ്മരണിക പ്രകാശനം നടത്തി. യുദ്ധത്തില്‍ വീരമൃത്യു വരിച്ച ജവാന്മാരുടെ ആശ്രിതരുടേയും അംഗവൈകല്യം സംഭവിച്ച ജവാന്മാരുടേയും അവരുടെ ആശ്രിതരുടേയും ക്ഷേമപുനരധിവാസ പ്രവര്‍ത്തനങ്ങള്‍ക്കാണ് പതാകദിനനിധി ഉപയോഗിക്കുക. ജില്ലാ പഞ്ചായത്ത് പ്രസിഡന്‍റ്  കെ.ശാന്തകുമാരി  അധ്യക്ഷയായ പരിപാടിയില്‍ എ.ഡി.എം.എസ്.വിജയന്‍ ,  അസി.ജില്ലാ സൈനികക്ഷേമ ഓഫീസര്‍ എസ്.

ജില്ലയില്‍ പൊലീസ് വകുപ്പില്‍ സിവില്‍ പൊലീസ് ഓഫീസര്‍(കാറ്റഗറി നമ്പര്‍ 064/17), വനിതാ സിവില്‍ പൊലീസ് ~ഓഫീസര്‍(066/17), എക്സൈസ് വകുപ്പില്‍ സിവില്‍ എക്സൈസ്     ഓഫീസര്‍(065/17),തസ്തികകളിലേയ്ക്ക് അട്ടപ്പാടി ബ്ലോക്കിലെ പട്ടികവര്‍ഗ വിദ്യാര്‍ഥികളുടെ തെരഞ്ഞെടുപ്പിനുള്ള കായികക്ഷമതാ പരീക്ഷയും ശാരീരിക അളവെടുപ്പും ഡിസംബര്‍ 11 മുതല്‍ 16 വരെ കോട്ടത്തറ ആരോഗ്യമാതാ ഹൈസ്കൂളില്‍ നടക്കും. അര്‍ഹരായവര്‍ക്ക്  പ്രവേശന ടിക്കറ്റുകള്‍ ഐ.റ്റി.ഡി.പി. പ്രൊജക്ട് ഓഫീസര്‍ ട്രൈബല്‍ പ്രമോട്ടര്‍മാര്‍ വഴി ലഭ്യമാക്കിയിട്ടുണ്ട്.