സംസ്ഥാനത്തെ വിവിധ സര്‍ക്കാര്‍/പൊതുമേഖലാ/സ്വകാര്യ സ്ഥാപനങ്ങളില്‍ നിലവിലുളള ഒഴിവുകളിലേക്ക് ഗ്രാജുവേറ്റ്/ടെക്‌നീഷ്യന്‍ അപ്രന്റീസുകളെ തെരഞ്ഞെടുക്കുന്നതിന് കേന്ദ്രസര്‍ക്കാരിന്റെ എം.എച്ച്.ആര്‍.ഡി കീഴിലുളള ചെന്നൈയിലെ ദക്ഷിണമേഖലാ ബോര്‍ഡ് ഓഫ് അപ്രന്റീസ്ഷിപ്പ് ട്രെയിനിംഗും സംസ്ഥാന സാങ്കേതിക വിദ്യാഭ്യാസ വകുപ്പിന് കീഴിലുളള കളമശ്ശേരിയിലെ സൂപ്പര്‍വൈസറി ഡെവലപമെന്റ് സെന്ററും സംയുക്തമായി, സെന്‍ട്രലൈസ്ഡ് വാക്- ഇന്‍-ഇന്റര്‍വ്യൂകള്‍ നടത്തും. ഏകദേശം 800 ഒഴിവുകള്‍ പ്രതീക്ഷിക്കുന്നു.

കോഴിക്കോട് ഇന്‍ഡസ്ട്രിയല്‍ ട്രൈബ്യൂണലും എംപ്ലോയീസ് കോമ്പന്‍സേഷന്‍ കമ്മീഷണറും എംപ്ലോയീസ് ഇന്‍ഷൂറന്‍സ് കോടതി ജഡ്ജിയുമായ കെ.വി. രാധാകൃഷ്ണന്‍ ഒക്ടോബര്‍ 10, 17 തീയതികളില്‍ കണ്ണൂര്‍ ലേബര്‍ കോടതിയിലും 24 ന് തലശ്ശേരി ബാര്‍ അസോസിയേഷന്‍ ബൈസെന്റിനറി ഹാളിലും 19, 20 തീയതികളില്‍ വയനാട് കല്‍പ്പറ്റ ബാര്‍ അസോസിയേഷന്‍ ഹാളിലും 27 ന് കാസര്‍ഗോഡ് ജില്ലാ ലേബര്‍ ഓഫീസിലും നാല്, അഞ്ച്, ആറ്, 11, 12, 13 തീയതികളില്‍ ആസ്ഥാനത്തും തൊഴില്‍തര്‍ക്ക കേസുകളും എംപ്ലോയീസ് കോമ്പന്‍സേഷന്‍ കേസുകളും എംപ്ലോയീസ് ഇന്‍ഷൂറന്‍സ് കേസുകളും വിചാരണ ചെയ്യും.

പി.എന്‍.എക്‌സ്.4223/17

നാഷണല്‍ എംപ്ലോയ്‌മെന്റ് സര്‍വ്വീസ് വകുപ്പിന്റെ കീഴില്‍ എറണാകുളത്തു പ്രവര്‍ത്തിക്കുന്ന റീജിയണല്‍ പ്രൊഫഷണല്‍ ആന്റ് എക്‌സിക്യൂട്ടീവ് എംപ്ലോയ്‌മെന്റ് എക്‌സ്‌ചേഞ്ചിന്റെ ആഭിമുഖ്യത്തില്‍ പ്രൊഫഷണല്‍ വിദ്യാഭ്യാസ യോഗ്യതയുള്ളവര്‍ക്കായി മൂന്ന് ദിവസത്തെ സോഫ്ട്‌സ്‌കില്‍ പരിശീലനം സംഘടിപ്പിക്കുന്നു. മികച്ച ഉദേ്യാഗം കരസ്ഥമാക്കുന്നതിനാവശ്യമായ മാര്‍ഗ്ഗ നിര്‍ദ്ദേശങ്ങള്‍, ആശയ വിനിമയം, ഗ്രൂപ്പ് ചര്‍ച്ച, ഇന്റര്‍വ്യൂ എന്നീ മേഖലകളില്‍ പരിശീലനവുമുണ്ടാകും.

തൃപ്പൂണിത്തുറ ഗവണ്‍മെന്റ് സംസ്‌കൃത കോളേജില്‍ സംസ്‌കൃതം വേദാന്തം വിഭാഗത്തില്‍ നിലവിലുള്ള ഒഴിവിലേക്ക് അതിഥി അദ്ധ്യാപകരെ നിയമിക്കുന്നതിന് കൂടികാഴ്ച നടത്തുന്നു. ഉദേ്യാഗാര്‍ത്ഥികള്‍ 55 ശതമാനം മാര്‍ക്കോടെ ബന്ധപ്പെട്ട വിഷയങ്ങളില്‍ ബിരുദാന്തര ബിരുദം നേടിയവരും, യു.ജി.സി യോഗ്യത ഉള്ളവരും, അതാത് മേഖലാ കോളേജ് വിദ്യാഭ്യാസ ഉപ മേധാവിയുടെ അതിഥി അദ്ധ്യാപക ലിസ്റ്റില്‍ ഉള്‍പ്പെട്ടവരുമായിരിക്കണം. യു.ജി.സി യോഗ്യതയുള്ളവരുടെ അഭാവത്തില്‍ മറ്റുള്ളവരെ പരിഗണിക്കും. താല്‍പര്യമുളളവര്‍ ഒക്ടോബര്‍ ആറിന് രാവിലെ 10 മണിക്ക് അസ്സല്‍ സര്‍ട്ടിഫിക്കറ്റുകള്‍ സഹിതം പ്രിന്‍സിപ്പാള്‍ മുമ്പാകെ ഹാജരാകണം.

സംസ്ഥാന കര്‍ഷക കടാശ്വാസ കമ്മീഷന്റെ കാര്യാലയത്തില്‍ ഓഫീസ് അസിസ്റ്റന്റ് തസ്തികയില്‍ ഡെപ്യൂട്ടേഷന്‍ വ്യവസ്ഥയില്‍ ഒരു വര്‍ഷത്തേക്ക് നിയമനത്തിന് സമാന തസ്തികയില്‍ ജോലിയില്‍ ജോലി ചെയ്യുന്ന സര്‍ക്കാര്‍ ജീവനക്കാരില്‍ നിന്നും അപേക്ഷ ക്ഷണിച്ചു. ഒരു ഒഴിവാണുള്ളത്. വകുപ്പുതലവന്‍ മുഖേന സമര്‍പ്പിക്കുന്ന അപേക്ഷകള്‍ സെക്രട്ടറി, കേരള സംസ്ഥാന കര്‍ഷക കടാശ്വാസ കമ്മീഷന്‍, അഗ്രികള്‍ച്ചറല്‍ ഹോള്‍സെയില്‍ മാര്‍ക്കറ്റ് കോമ്പൗണ്ട്, വെണ്‍പാലവട്ടം, ആനയറ പി.ഒ, തിരുവനന്തപുരം എന്ന വിലാസത്തില്‍ ഒക്ടോബര്‍ 10 നകം ലഭിക്കണം. ഫോണ്‍ : 0471 - 2743783.

പി.എന്‍.എക്‌സ്.4220/17

സി.ആര്‍.ഇസഡ് ലഭിക്കുന്നതിന് പൂര്‍ണരേഖകള്‍/വിവരങ്ങള്‍ അടങ്ങിയ അപേക്ഷകള്‍ അതോറിറ്റിയില്‍ ലഭിക്കുന്ന തീയതിക്രമത്തില്‍ മാത്രമേ പരിഗണിക്കൂവെന്ന് കേരള തീരദേശ പരിപാലന അതോറിറ്റി മെമ്പര്‍ സെക്രട്ടറി അറിയിച്ചു.

പി.എന്‍.എക്‌സ്.4219/17

കേരള ഹൈക്കോടതിയില്‍ ഇലക്ട്രീഷ്യന്‍ തസ്തികയില്‍ ഇന്ത്യന്‍ പൗരന്മാരായ യോഗ്യതയുളളവരില്‍ നിന്ന് ഓണ്‍ലൈന്‍ അപേക്ഷകള്‍ ക്ഷണിച്ചു. ഒരു ഒഴിവാണുളളത്. എസ്.എസ്.എല്‍.സി അല്ലെങ്കില്‍ തത്തുല്യ യോഗ്യതയും, ഇലക്ട്രീഷ്യന്‍ ട്രേഡില്‍ നാഷണല്‍ ട്രേഡ് സര്‍ട്ടിഫിക്കറ്റ് അല്ലെങ്കില്‍ തത്തുല്യ യോഗ്യതയും, ഇലക്ട്രീഷ്യനായി രണ്ട് വര്‍ഷത്തെ പ്രവൃത്തി പരിചയവും വേണം. ഉദ്യോഗാര്‍ത്ഥികള്‍ 1981 ജനുവരി രണ്ടിനും 1999 ജനുവരി ഒന്നിനും (രണ്ടു തീയതികളും ഉള്‍പ്പെടെ) ഇടയില്‍ ജനിച്ചവരായിരിക്കണം. പ്രായം സംബന്ധിച്ച് പട്ടികജാതി/പട്ടികവര്‍ഗം മറ്റു പിന്നാക്ക വിഭാഗങ്ങള്‍, എക്‌സ്‌സര്‍വീസ്‌മെന്‍ എന്നിവര്‍ക്ക് ഇളവുണ്ട്.

സര്‍ക്കാരിന്റെ എല്ലാ വകുപ്പുകളിലും ഭരണവകുപ്പുകളിലും സ്ഥാപനങ്ങളിലും കേരളപ്പിറവി ആചരണത്തോടനുബന്ധിച്ച് നവംബര്‍ മാസത്തിലെ ആദ്യ പ്രവൃത്തി ദിവസം മലയാള ദിനാഘോഷവും നവംബര്‍ ഒന്നു മുതല്‍ ഏഴുവരെ ഭരണഭാഷാവാരാഘോഷവും വിപുലമായി സംഘടിപ്പിക്കണമെന്ന് സര്‍ക്കാര്‍ സര്‍ക്കുലര്‍ പുറപ്പെടുവിച്ചു. നവംബര്‍ ഒന്നിന് എല്ലാ വകുപ്പുകളുടെയും സ്ഥാപനങ്ങളുടെയും ഓഫീസുകളില്‍ ഓഫീസ് തലവന്റെ അധ്യക്ഷതയില്‍ ഭരണഭാഷാ സമ്മേളനം സംഘടിപ്പിക്കണമെന്നും ഉദ്യോഗസ്ഥര്‍ക്ക് ഓഫീസ് തലവന്‍ ഭരണഭാഷാ പ്രതിജ്ഞ ചൊല്ലിക്കൊടുക്കണമെന്നും സര്‍ക്കുലറില്‍ നിര്‍ദേശമുണ്ട്.

പി.എന്‍.എക്‌സ്.4216/17

തിരുവനന്തപുരം തമ്പാനൂര്‍ കെ.എസ്.ആര്‍.ടി.സി ടെര്‍മിനലില്‍ ആരംഭിക്കുന്ന ഖാദി ഗ്രാമ വ്യവസായ ബോര്‍ഡിന്റെ പുതിയ ഖാദി ഗ്രാമസൗഭാഗ്യ വില്പനശാലയുടെ ഉദ്ഘാടനം ഒക്ടോബര്‍ അഞ്ചിന് ഉച്ചയ്ക്ക് രണ്ടു മണിക്ക് വ്യവസായ-കായിക-യുവജനക്ഷേമ വകുപ്പു മന്ത്രി എ.സി.മൊയ്തീന്‍ നിര്‍വഹിക്കും. ചടങ്ങില്‍ ഖാദി ബോര്‍ഡ് വൈസ് ചെയര്‍മാന്‍ എം.വി ബാലകൃഷ്ണന്‍ മാസ്റ്റര്‍ അധ്യക്ഷത വഹിക്കും. ഏതു തലമുറയ്ക്കും അനുയോജ്യമായതും വ്യത്യസ്തവുമായ ഖാദി ഗ്രാമ വ്യവസായ ഉല്‍പ്പന്നങ്ങള്‍ ഈ വില്പനശാലയില്‍ ലഭിക്കും. കൂടാതെ ഗാന്ധിജയന്തി പ്രമാണിച്ച് ഖാദി വസ്ത്രങ്ങള്‍ക്ക് 30 ശതമാനം റിബേറ്റും ലഭ്യമാണ്.

പി.എന്‍.എക്‌സ്.4215/17

കേരള സ്റ്റേറ്റ് സിനിമാ ഓപ്പറേറ്റേഴ്‌സ് പരീക്ഷാ ബോര്‍ഡ് 2017 ല്‍ നടത്തുന്ന പരീക്ഷയ്ക്ക് യോഗ്യതയുളളവരില്‍ നിന്നും അപേക്ഷ ക്ഷണിച്ചു. അപേക്ഷ ലഭിക്കേണ്ട അവസാന തീയതി ഒക്ടോബര്‍ 31 വൈകിട്ട് അഞ്ച് മണി. വിശദവിവരങ്ങള്‍ക്ക് ചീഫ് ഇലക്ട്രിക്കല്‍ ഇന്‍സ്‌പെക്ടറേറ്റുമായോ, ജില്ലാ ഇലക്ട്രിക്കല്‍ ഇസ്‌പെക്ടറേറ്റുകളുമായോ ബന്ധപ്പെടണം. വകുപ്പിന്റെ വെബ്‌സൈറ്റായ www.ceikerala.gov.in ലും വിവരങ്ങള്‍ ലഭ്യമാണ്. ഫോണ്‍: 0471 2331104, 2331159.

പി.എന്‍.എക്‌സ്.4217/17