റിമോട്ട് സെന്‍സിംഗ് സെന്ററിന്റെ നേതൃത്വത്തില്‍ ഹൈറെസല്യൂഷന്‍ പ്രോജക്ടിന്റെ ഭാഗമായി പഞ്ചായത്ത് തലത്തില്‍ ജി.ഐ.എസ് ഏകദിന പരിശീലന പരിപാടി സെപ്റ്റംബര്‍ 23 മുതല്‍ 28 വരെ തിരുവനന്തപുരം ഇന്‍സ്റ്റിറ്റ്യൂട്ട് ഓഫ് മാനേജ്‌മെന്റ് ഇന്‍ ഗവണ്‍മെന്റ് സെന്ററില്‍ സംഘടിപ്പിച്ചു. തിരുവനന്തപുരം, കൊല്ലം, പത്തനംതിട്ട, ഇടുക്കി, ആലപ്പുഴ ജില്ലകളിലെ പഞ്ചായത്ത് ഉദ്യോഗസ്ഥര്‍ക്ക് വേണ്ടിയായിരുന്നു പരിശീലനം. സംസ്ഥാനത്തെ വിവിധ വികസന പ്രവര്‍ത്തനങ്ങള്‍ക്ക് സഹായകമാകത്തക്കവിധം സൂക്ഷ്മമായ വിശദാംശങ്ങള്‍ വരെ ഉള്‍പ്പെടുത്തി വിവിധ ജില്ലകളുടെ ജിയോഡാറ്റാബേസ് ഹൈറെസല്യൂഷന്‍ പ്രോജക്ടിന്റെ ഭാഗമായി തയ്യാറാക്കിയിട്ടുണ്ട്.

വനം, വന്യജീവി വകുപ്പിന്റെ ആഭിമുഖ്യത്തില്‍ നടത്തുന്ന വന്യജീവി വാരാഘോഷത്തിന് തുടക്കമായി. തെന്മല ശെന്തുരുണിയില്‍ നടന്ന സംസ്ഥാനതല ഉദ്ഘാടനം വനം വകുപ്പ് മന്ത്രി കെ. രാജു നിര്‍വഹിച്ചു. ഭൂമിയില്‍ ജീവന്റെ നിലനില്‍പ്പിന് വനത്തിന്റെയും വന്യജീവികളുടെയും സംരക്ഷണം അനിവാര്യമാണെന്നും അവയുടെ സംരക്ഷണം ഭൂമുഖത്തുള്ള എല്ലാ മനുഷ്യരുടെയും കടമയാണെന്നും വനം മന്ത്രി പറഞ്ഞു. എല്ലാ ജീവജാലങ്ങള്‍ക്കും അവരുടേതായ ധര്‍മ്മം നിര്‍വഹിക്കാനുണ്ട്. ഒരു തവളയെ കൊല്ലുന്നതിനുപോലും ഏഴു വര്‍ഷവരെ തടവു ലഭിക്കാവുന്ന ശിക്ഷയാക്കിയതിന് പിന്നില്‍ പ്രകൃതിയോടുള്ള നമ്മുടെ കടമ നിര്‍വഹിക്കലാണുള്ളത്.

ഗാന്ധിമത ചിന്തകള്‍ക്കനുസരിച്ച് പട്ടികജാതി-പട്ടികവര്‍ഗ വിഭാഗങ്ങള്‍ അണിചേര്‍ന്ന് പ്രവര്‍ത്തിക്കണമെന്ന് നിയമ സാംസ്‌കാരിക പിന്നാക്ക ക്ഷേമ വകുപ്പ് മന്ത്രി എ.കെ. ബാലന്‍ പറഞ്ഞു. സാമൂഹ്യ ഐക്യദാര്‍ഢ്യ പക്ഷാചരണത്തിന്റെ സംസ്ഥാനതല ഉദ്ഘാടനം ഗവണ്‍മെന്റ് വിമെന്‍സ് കോളേജ് ആഡിറ്റോറിയത്തില്‍ നിര്‍വഹിച്ച് സംസാരിക്കുകയായിരുന്നു അദ്ദേഹം. സംസ്ഥാനത്തെ മുഴുവന്‍ ഭൂരഹിതരായ പട്ടിക വിഭാഗങ്ങള്‍ക്ക് ഭൂമി നല്‍കുന്ന പദ്ധതി അഞ്ചുവര്‍ഷത്തിനുള്ളില്‍ പൂര്‍ത്തിയാക്കും.

ഗാന്ധിജി ഉയര്‍ത്തിപ്പിടിച്ച ത്യാഗത്തിന്റെയും സത്യത്തിന്റെയും സമഭാവനയുടേയും വെള്ളിവെളിച്ചം പ്രസരിപ്പിക്കുംവിധം പെരുമാറാന്‍ നമുക്ക് കഴിയണമെന്ന് സഹകരണ-ടൂറിസം മന്ത്രി കടകംപള്ളി സുരേന്ദ്രന്‍ പറഞ്ഞു. ഗാന്ധിജയന്തി വാരാഘോഷത്തിന്റെ സംസ്ഥാനതല ഉദ്ഘാടനം ടാഗോര്‍ തീയറ്ററില്‍ നിര്‍വഹിച്ചു സംസാരിക്കുകയായിരുന്നു മന്ത്രി. ലോകത്ത് സമാധാനവും ശാന്തിയും സാഹോദര്യവും നഷ്ടപ്പെടുത്താന്‍ വലിയ ശക്തികള്‍ ലോകത്താകെ ശ്രമിക്കുന്നതിന്റെ ആശങ്കയിലാണ് നാം. മഹാത്മജിയുടെ ഇന്ത്യ ലോകത്തിന്റെ നെറുകയില്‍ ഉയര്‍ന്നുനിന്നത് സ്വാതന്ത്ര്യാനന്തരം സ്വീകരിച്ച മതേതര, മാനവിക നിലപാടുകളിലൂടെയാണ്.

രാജ്യം എല്ലാക്കാലത്തും ഉയര്‍ത്തിപ്പിടിച്ച സമഭാവനയും മതേതരബോധവും സാഹോദര്യവും ഊട്ടിയുറപ്പിക്കാനും രാജ്യത്തിന്റെ യശസ്സിന് കളങ്കം വരാതെ കാക്കാന്‍ പ്രാപ്തമാകുംവിധം ഓരോ മനസ്സും നവീകരിക്കാനുമുള്ള അവസരമായി ഗാന്ധിജയന്തി ആചരണവേളയെ ഉപയോഗപ്പെടുത്തണമെന്ന് സഹകരണ, ദേവസ്വം മന്ത്രി കടകംപള്ളി സുരേന്ദ്രന്‍ പറഞ്ഞു. സംസ്ഥാന സര്‍ക്കാരിന്റെ ഗാന്ധിജയന്തി വാരാഘോഷങ്ങളുടെ ഭാഗമായി കിഴക്കേകോട്ട ഗാന്ധി പാര്‍ക്കിലെ ഗാന്ധിപ്രതിമയില്‍ ഹാരാര്‍പ്പണം നടത്തി സംസാരിക്കുകയായിരുന്നു അദ്ദേഹം. സ്‌നേഹത്തിന്റെയും സാഹോദര്യത്തിന്റെയും വഴിയാണ് മഹാത്മജി ലോകത്തിനു കാണിച്ചുകൊടുത്തത്. ഗാന്ധിജിയെ അനുകരിക്കുക ക്ഷിപ്രസാധ്യമായ കാര്യമല്ല.

1997 ജനുവരി ഒന്നു മുതല്‍ 2017 ജൂലൈ 31 വരെ എംപ്ലോയ്‌മെന്റ് രജിസ്‌ട്രേഷന്‍ പുതുക്കാനാവാതെ സീനിയോറിറ്റി നഷ്ടപ്പെട്ട ഉദ്യോഗാര്‍ത്ഥികള്‍ക്ക് സീനിയോറിറ്റി നിലനിര്‍ത്തി സെപ്റ്റംബര്‍ രണ്ടു മുതല്‍ ഒക്ടോബര്‍ 31 വരെ രജിസ്‌ട്രേഷന്‍ പുതുക്കാന്‍ സമയം അനുവദിച്ച് ഉത്തരവായി.

പി.എന്‍.എക്‌സ്.3508/17

സാംസ്‌കാരിക വകുപ്പ് മന്ത്രി എ.കെ. ബാലന്‍ ചെയര്‍മാനായും സെക്രട്ടറി റാണി ജോര്‍ജ് വൈസ് ചെയര്‍മാനുമായി തൃപ്പൂണിത്തറ പൈതൃക പഠനകേന്ദ്രം സൊസൈറ്റി പുന:സംഘടിപ്പിച്ച് സര്‍ക്കാര്‍ ഉത്തരവായി. സൊസൈറ്റിയില്‍ 16 അംഗങ്ങളുണ്ട്.

പി.എന്‍.എക്‌സ്.3507/17

തിരു-കൊച്ചി മെഡിക്കല്‍ കൗണ്‍സിലില്‍ 2016 ഡിസംബര്‍ 31 വരെ ഇന്ത്യന്‍ സിസ്റ്റംസ് ഓഫ് മെഡിസിനില്‍ (ആയുര്‍വേദ, സിദ്ധ, യുനാനി) രജിസ്റ്റര്‍ ചെയ്തിട്ടുള്ളവരില്‍ നിന്നും കേന്ദ്ര കൗണ്‍സിലിലേക്ക് കേരളത്തില്‍ നിന്ന് പ്രതിനിധികളെ തെരഞ്ഞെടുക്കുന്നതിനുള്ള കരട് ലിസ്റ്റ് പ്രസിദ്ധീകരിച്ചു. ഗവ. സെക്രട്ടേറിയറ്റിലെ അനക്‌സ്-2 അഞ്ചാംനിലയിലെ റൂം നമ്പര്‍ 450 ലെ റിട്ടേണിംഗ് ഓഫീസറുടെ കാര്യാലയത്തില്‍ പ്രവൃത്തിദിവസങ്ങളില്‍ ഓഫീസ് സമയത്ത് പരിശോധിക്കാം. സര്‍ക്കാര്‍ വെബ്‌സൈറ്റായ www.kerala.gov.in ലും ലിസ്റ്റ് പ്രസിദ്ധീകരിച്ചിട്ടുണ്ട്. ആക്ഷേപങ്ങളും അഭിപ്രായങ്ങളും വിജ്ഞാപന തീയതി മുതല്‍ 30 ദിവസത്തിനകം ആര്‍.

പട്ടികവര്‍ഗ വികസന വകുപ്പിന്റെ കീഴില്‍ പ്രവര്‍ത്തിക്കുന്ന എട്ട് മോഡല്‍ റസിഡന്‍ഷ്യല്‍ സ്‌കൂളുകളിലേക്ക് സോളാര്‍ പവര്‍ പ്ലാന്റ് സ്ഥാപിക്കുന്നതിന് സര്‍ക്കാര്‍ അക്രഡിറ്റേഷന്‍ ഉള്ളതും മിനിസ്ട്രി ഓഫ് ന്യൂ ആന്റ് റിന്യൂവബിള്‍ എനര്‍ജി (എം.എന്‍.ആര്‍.ഇ) യുടെ അംഗീകാരം ലഭിച്ചിട്ടുള്ളതുമായ സ്ഥാപനങ്ങളില്‍ നിന്നും പ്രൊപ്പോസലുകള്‍ ക്ഷണിച്ചു. പ്രൊപ്പോസലുകള്‍ സ്വീകരിക്കുന്ന അവസാന തീയതി ആഗസ്റ്റ് 14 ഉച്ചയ്ക്ക് രണ്ട് മണി. ആഗസ്റ്റ് 14 ന് വൈകിട്ട് മൂന്നിന് ഹാജരുള്ള സ്ഥാപനങ്ങള്‍/പ്രതിനിധികളുടെ സാന്നിധ്യത്തില്‍ പ്രൊപ്പോസലുകള്‍ പരിഗണിക്കും.

സംസ്ഥാന വികലാംഗക്ഷേമ കോര്‍പ്പറേഷനില്‍ സ്റ്റേറ്റ് പ്രോജക്ട് കോ- ഓര്‍ഡിനേറ്റര്‍ തസ്തികയില്‍ കരാര്‍ അടിസ്ഥാനത്തില്‍ ഒരു വര്‍ഷത്തേക്ക് നിയമിക്കുന്നതിന് അപേക്ഷ ക്ഷണിച്ചു. എം.എസ്.ഡബ്‌ളിയു (റീഹാബിലിറ്റേഷന്‍) ബിരുദവും, റീഹാബിലിറ്റേഷന്‍ മേഖലയില്‍ കുറഞ്ഞത് മൂന്ന് വര്‍ഷത്തെ പ്രവൃത്തി പരിചയവും വേണം. പ്രതിമാസം 25,200 രൂപയാണ് വേതനം. പ്രായപരിധി 25നും 40നും മധ്യേ. അപേക്ഷകള്‍ മാനേജിംഗ് ഡയറക്ടര്‍, കേരള സംസ്ഥാന വികലാംഗക്ഷേമ കോര്‍പ്പറേഷന്‍, പൂജപ്പുര, തിരുവനന്തപുരം -12 എന്ന വിലാസത്തില്‍ 16നകം ലഭിക്കണം. (ഫോണ്‍ 0471 2347768)

പി.എന്‍.എക്‌സ്.3504/17