രാജ്യത്താകമാനമുള്ള സമ്മതിദായകര്‍ക്ക് തെരഞ്ഞെടുപ്പ് സംബന്ധിച്ച എല്ലാ സേവനങ്ങളും വിവരങ്ങളും ലഭ്യമാക്കി തെരഞ്ഞെടുപ്പ് കമ്മീഷന്‍ വികസിപ്പിച്ച വോട്ടര്‍ ഹെല്‍പ്പ് ലൈന്‍ ആപ്പ് ജനശ്രദ്ധനേടുകയാണ്.  തെരഞ്ഞെടുപ്പ് കമ്മീഷന്റെ ഡൈനാമിക് പോര്‍ട്ടലില്‍ നിന്നും തത്സമയം ഡാറ്റ ഇതുവഴി ലഭ്യമാക്കുന്നുണ്ട്.

 പൊതുമരാമത്ത് വകുപ്പ് വെസ്റ്റ് എളേരി സെക്ഷന് കീഴിലുളള ചിറ്റാരിക്കല്‍-കുന്നുംകൈ റോഡില്‍ മണ്ഡപത്തിനും കോടങ്കല്ലിനും ഇടയില്‍ ടാറിംഗ് പ്രവൃത്തി നടക്കുന്നതിനാല്‍  ഏപ്രില്‍ ഒന്നുമുതല്‍ ഇനി ഒരു അറിയിപ്പുണ്ടാകുന്നതു വരെ ഈ റോഡില്‍ (മണ്ഡപം ക്ഷീരോല്‍പാദക സംഘത്തിനും കോടങ്കല്ലിനും       ഇടയില്‍) ഗതാഗതം പൂര്‍ണ്ണമായും നിരോധിച്ചു. കുന്നുംകൈയില്‍ നിന്നും ചിറ്റാരിക്കല്‍ ഭാഗത്തേക്കുപോകേണ്ട വാഹനങ്ങള്‍ ഭീമനടി-  നര്‍ക്കിലക്കാട് വഴിയോ, മൗക്കോട് - കടുമേനി നല്ലോംപുഴ വഴിയോ    പോകണം. 

പേരില്‍ തന്നെ കൗതുകമുണര്‍ത്തി കുഞ്ഞിമാവിന്റടിയിലെ വെളിച്ചത്തിന്റെ കഥപറയുകയാണ് ചുണ്ടൊപ്പ് മാഗസിനിലൂടെ കാസര്‍കോട്ടെ സര്‍ക്കാര്‍ അന്ധവിദ്യാലയം. സ്‌കൂള്‍  എഴുപതാം വര്‍ഷത്തിലേക്ക് പ്രവേശിച്ചിരിക്കുന്നു. ഈ സാഹചര്യത്തില്‍ സ്‌കൂളിന്റെ ചരിത്രം അടയാളപ്പെടുത്തുന്ന ഒരു മാഗസിന്‍ പുറത്തിറക്കിക്കൂടെയെന്ന ആശയം അധ്യാപകനും പാലക്കാട് സ്വദേശിയുമായ എം രാജേഷിന്റെ മനസില്‍ ഉദിച്ചത്. വ്യത്യസ്തമാര്‍ന്ന  പേരു തന്നെ മാഗസിന് വേണമെന്ന ദിവസങ്ങള്‍ നീണ്ട അന്വേഷണത്തിനൊടുവിലാണ്  പ്രാദേശികമായി സുപരിചിതമായ  ചുണ്ടൊപ്പ് എന്ന് പദത്തെക്കുറിച്ച് അദ്ദേഹം കേള്‍ക്കുന്നത്.

കാസര്‍കോട് സര്‍ക്കാര്‍ അന്ധവിദ്യാലയത്തിലെ വിദ്യാര്‍ഥികളും അധ്യാപകരും തയ്യാറാക്കിയ ചുണ്ടൊപ്പ് മാഗസിന്‍ ജില്ലാകളക്ടര്‍ ഡോ.ഡി സജിത്ത് ബാബു പ്രകാശനം ചെയ്തു. സ്‌കൂള്‍ അങ്കണത്തില്‍ നടന്ന ചടങ്ങില്‍ വിദ്യാഭ്യാസ ഉപഡയറക്ടര്‍ ഡോ.ഗിരീഷ്ചോലയില്‍ മാഗസിന്‍ ഏറ്റുവാങ്ങി. പുസ്തകത്തിന്റെ ഓഡിയോ പതിപ്പ് സബ്ജഡ്ജ് ഫിലിപ്പ്തോമസ് എഴുത്തുകാരന്‍ ശിഹാബുദ്ധീന്‍ പൊയ്ത്തുംകടവിന് നല്‍കി പ്രകാശനം ചെയ്തു.

ജില്ലയിലെ കുടിവെളള പദ്ധതികളുടെ സ്രോതസ്സുകളായിട്ടുളള പുഴകളില്‍ നിന്നും കുടിവെളളത്തിനായി പമ്പ് ചെയ്യുന്ന സര്‍ക്കാര്‍ പമ്പിംഗ് സ്റ്റേഷനുകളില്‍ നിന്ന് ഇരുഭാഗത്തും 100 മീറ്റര്‍ വരെ കുടിവെളേളതര ആവശ്യത്തിനായുളള സ്വകാര്യ പമ്പിംഗ് മെയ് 31 വരെ നിരോധിച്ചു.  കൂടാതെ പയസ്വിനി പുഴയിലെ പാണ്ടിക്കണ്ടം റിസര്‍വോയര്‍ മുതല്‍ ആലൂര്‍ തടയണ വരെയുളള ഭാഗത്തെ എല്ലാ സ്വകാര്യ പമ്പിംഗുകളും കര്‍ശനമായി നിരോധിച്ചു.  

ലോക്‌സഭാ തെരഞ്ഞെടുപ്പില്‍ മത്സരിക്കുന്ന സ്ഥാനാര്‍ത്ഥികള്‍ ഓരോ മണ്ഡലത്തിലും ചെലവാക്കുന്ന പണത്തിന്റെ കൃത്യമായ കണക്കുകള്‍  നിരീക്ഷിക്കാന്‍  തെരഞ്ഞടുപ്പ് ഉദ്യോഗസ്ഥര്‍ ഒരുങ്ങിക്കഴിഞ്ഞു. സ്ഥാനാര്‍ഥികളുടെ ചെലവു നിരീക്ഷണവുമായി ബന്ധപ്പെട്ട് പ്രചാരണത്തിന് ഉപയോഗിക്കുന്ന വിവിധ സാധന സേവനങ്ങളുടെ കൃത്യമായ കണക്കുകള്‍ രേഖപ്പെടുത്തണം. ഇതിനായി 90ഓളം ഇനങ്ങളുടെ നിരക്ക് പട്ടിക പ്രസിദ്ധീകരിച്ചിട്ടുണ്ട്. 

ജില്ലയില്‍ ഏറ്റവും കൂടുതല്‍ വോട്ടര്‍മാരുള്ളത് പൈവളികെ ഗ്രാമ പഞ്ചായത്തിലെ 105 -ാം നമ്പര്‍ പോളിംഗ് ബൂത്തില്‍. പൈവളികെ ഗവ. ഹൈസ്‌കൂളിലെ ഈ ബൂത്തില്‍ ഇതുവരെ 1385 വോട്ടര്‍മാരാണ് പേര് ചേര്‍ത്തിട്ടുള്ളത്. ഇതില്‍ 696 പുരുഷന്മാരും 689 സ്ത്രീകളുമാണ്. 

ഏറ്റവും കുറവ് വോട്ടര്‍മാരുള്ളത് വലിയ പറമ്പ് ഗ്രാമ പഞ്ചായത്തിലെ 151-ാം നമ്പര്‍ പോളിങ് ബൂത്തിലാണ്. വലിയ പറമ്പ് അംഗണവാടി കെട്ടിടത്തില്‍ നിശ്ചയിച്ചിട്ടുള്ള ഈ ബൂത്തില്‍ 226 പേരാണ് ഇതുവരെ പേര് ചേര്‍ത്തിട്ടുള്ളത്. ഇതില്‍ 109 പുരുഷന്മാരും 117 സ്ത്രീകളുമാണ്. 

ലോക്‌സഭാ തെരഞ്ഞെടുപ്പില്‍ നാമനിര്‍ദേശ പത്രിക സമര്‍പ്പിക്കാനുള്ള രണ്ടാം ദിനമായ ഇന്നലെയും (മാര്‍ച്ച് 29) കാസര്‍കോട് ലോക്‌സഭാ മണ്ഡലത്തില്‍ ആരും പത്രിക നല്‍കിയില്ല.

ലോക്‌സഭാ തെരഞ്ഞെടുപ്പിന് ഉപയോഗിക്കുന്ന ഇലക്‌ട്രോണിക് വോട്ടിംഗ് യന്ത്രങ്ങള്‍(ഇവിഎം) ജില്ലാ കളക്ടര്‍ ഡോ.ഡി സജിത് ബാബുവിന്റെ നേതൃത്വത്തില്‍ റാന്‍ഡമൈസേഷന്‍ പ്രകാരം ക്രമീകരിച്ച് അഞ്ച് നിയമസഭാ മണ്ഡലങ്ങളിലെയും ഉപവരണാധികാരികള്‍ക്ക് കൈമാറി.