കേരള ലളിതകലാ അക്കാദമിയുടെ 2016 - 17 വര്‍ഷത്തെ കലാ വിദ്യാര്‍ഥികള്‍ക്കുള്ള സ്‌കോളര്‍ഷിപ്പുകള്‍ പ്രഖ്യാപിച്ചു.  തിരുവനന്തപുരം ഗവ. കോളേജ് ഓഫ് ഫൈന്‍ ആര്‍ട്‌സിലെ  വിദ്യാര്‍ഥികളായ രമേഷ്. ആര്‍, വെങ്കിടേശ്വരന്‍. എസ്.ബി, സജിത്. എസ്, സാജ്. ആര്‍, തൃപ്പുണിത്തുറ ആര്‍.എല്‍.വിയിലെ അനൂപ്. പി.ജി, മാവേലിക്കരയിലെ ലെനിന്‍, കാലടിയിലെ അശ്വതി ടി.എസ്, ബിബിന്‍, ശരത് ചന്ദ്രന്‍, യദുകൃഷ്ണന്‍ എന്നിവര്‍ക്കാണ് സ്‌ക്കോളര്‍ഷിപ്പ് ലഭിച്ചത്.

    ഭവനരഹിതര്‍ക്ക് വീട് വയ്ക്കുന്നതിന് സഹായം നാല് ലക്ഷം രൂപയായി വര്‍ധിപ്പിക്കുമെന്ന് തദ്ദേശസ്വയംഭരണ വകുപ്പ് മന്ത്രി കെ.റ്റി. ജലീല്‍ പറഞ്ഞു.  നേരത്തേ മൂന്ന് ലക്ഷം രൂപയാണ് നല്‍കി വന്നിരുന്നത്.  തിരുവനന്തപുരം നഗരസഭയിലെ പി.എം.എ.വൈ. പദ്ധതി ഗുണഭോക്താക്കള്‍ക്കുള്ള ആദ്യ ഗഡു വിതരണപദ്ധതി ഉദ്ഘാടനം ചെയ്യുകയായിരുന്നു മന്ത്രി.
    30,000 രൂപ വീതമാണ് ഒന്നാം ഗഡുവായി വിതരണം ചെയ്യുന്നത്.  നഗരസഭയുമായി കരാറൊപ്പിട്ട 1300 ഗുണഭോക്താക്കളുടെ അക്കൗണ്ടുകളിലേയ്ക്ക് ഓണ്‍ലൈനായാണ് ആദ്യഗഡു എത്തിയത്.

   അതിരപ്പിള്ളി വൈദ്യുത പദ്ധതി നടപ്പാക്കണമെന്ന നിലപാടാണ് തനിക്കിപ്പോഴുമുള്ളതെന്ന് വൈദ്യുതി മന്ത്രി എം.എം. മണി.  വികസന പദ്ധതികള്‍ വരുമ്പോള്‍ മുടന്തന്‍ ന്യായങ്ങള്‍ നിരത്തി അതിനെ എതിര്‍ക്കുന്നത് ഭാവി തലമുറയോട് ചെയ്യുന്ന ക്രൂരതയാണെന്നും മന്ത്രി.  ശാസ്തമംഗലത്തിന് സമീപത്തുള്ള കാടുവെട്ടി മൈക്രോ ജലവൈദ്യുത പദ്ധതിയുടെ നിര്‍മാണോദ്ഘാടനം നിര്‍വഹിച്ച് സംസാരിക്കുകയായിരുന്നു അദ്ദേഹം.

അടുത്ത 48 മണിക്കൂറിനുളളില്‍ കിഴക്കുദിശയില്‍ നിന്നും കേരള, ലക്ഷദ്വീപ് തീരങ്ങളില്‍ മണിക്കൂറില്‍ 45-55 കി.മീ. വേഗതയില്‍ ശക്തമായ കാറ്റടിക്കാന്‍ സാധ്യതയുണ്ടെന്ന് കാലാവസ്ഥാനിരീക്ഷണ കേന്ദ്രം അറിയിച്ചു. ഇന്ന് (21) രാത്രി 11.30 വരെ  കേരളത്തിലും തെക്കന്‍തമിഴ്‌നാട് തീരങ്ങളിലും ശക്തമായ തിരമാലകളുണ്ടാകാന്‍ സാധ്യതയുണ്ടെന്നും അറിയിച്ചു. മത്സ്യത്തൊഴിലാളികള്‍ ജാഗ്രത പാലിക്കണം.

പട്ടികവര്‍ഗ വികസന വകുപ്പിന്റെ ആഭിമുഖ്യത്തില്‍ കാഞ്ഞങ്ങാട് ദുര്‍ഗ ഹയര്‍സെക്കന്ററി സ്‌കൂളില്‍ ഡിസംബര്‍ 28,29,30 തീയതികളിലായി  സര്‍ഗോത്സവം എന്ന പേരില്‍ കലാസാംസ്‌കാരിക പരിപാടി സംഘടിപ്പിക്കും.  32   ഇനങ്ങളിലായി  നടക്കുന്ന  മത്സരപരിപാടിയില്‍  രണ്ടായിരത്തോളം പേര്‍ മാറ്റുരയ്ക്കാനെത്തും.  28 ന് രാവിലെ  10 മണിക്ക്  പട്ടകജാതി-പട്ടകവര്‍ഗ വികസന വകുപ്പു മന്ത്രി എ.കെ ബാലന്‍ പരിപാടി ഉദ്ഘാടനം ചെയ്യും.  30 ന് വൈകുന്നേരം  നടക്കുന്ന സമാപന പരിപാടി റവന്യൂ-ഭവന നിര്‍മ്മാണ വകുപ്പു മന്ത്രി  ഇ.ചന്ദ്രശേഖരന്‍  ഉദ്ഘാടനം ചെയ്യും. 

വലിയപറമ്പ ഗ്രാമപഞ്ചായത്തില്‍ ഇടയിലെക്കാട് സെന്‍ട്രല്‍ ബോട്ട് ജെട്ടിമുതല്‍ പാലം സൈറ്റ്‌വരെ ഉപ്പുവെള്ളം കയറുന്നതിനെതിരെ ബണ്ട് നിര്‍മ്മാണവും കയര്‍ഭൂവസ്ത്രം വിരിച്ച് മണ്ണ് ജലസംരക്ഷണ പ്രവര്‍ത്തയുടെയും ഉദ്ഘാടനവും ഈ മാസം 23ന് നടക്കും.  ഉച്ച കഴിഞ്ഞ് 2.30ന് ഇടയിലെക്കാട് നടക്കുന്ന ചടങ്ങില്‍ എം.രാജഗോപാലന്‍ എംഎല്‍എ ഉദ്ഘാടനം നിര്‍വഹിക്കും. വലിയപറമ്പ ഗ്രാമപഞ്ചായത്ത് പ്രസിഡന്റ് എം.ടി അബ്ദുള്‍ ജബാര്‍ അധ്യക്ഷതവഹിക്കും. നീലേശ്വരം ബ്ലോക് പഞ്ചായത്ത് പ്രസിഡന്റ് വി.പി ജാനകി മുഖ്യാതിഥിയായിരിക്കും. 

മടിക്കൈ ഗ്രാമ പഞ്ചായത്തിന്റെയും കാര്‍ഷിക ക്ഷേമവകുപ്പിന്റെയും സംയുക്താഭിമുഖ്യത്തില്‍ ഹരിത കേരളം പദ്ധതിയുടെയും സമഗ്ര നെല്‍കൃഷി വികസന പദ്ധതിയുടെയും ഭാഗമായി നാദക്കോട്ട് വയലില്‍ ഞാറുനടീലും 2018-19 വര്‍ഷത്തെ ഹരിത കേരളം പദ്ധതി പ്രഖ്യാപനവും നടത്തി. ഞാറുനടീലും പദ്ധതി പ്രഖ്യാപനവും ഹരിത കേരളം മിഷന്‍ ഡയറക്ടര്‍ ഡോ.ടി.എന്‍ സീമ നിര്‍വഹിച്ചു.ഗ്രാമപഞ്ചായത്ത് പ്രസിഡന്റ് സി.പ്രഭാകരന്‍ അധ്യക്ഷനായിരുന്നു.

2018-പ്ലാസ്റ്റിക് മുക്ത ബദിയടുക്ക ഗ്രാമപഞ്ചായത്ത് എന്ന ലക്ഷ്യം സാക്ഷാല്‍ക്കരിക്കുന്നതിനായി  ഗ്രാമപഞ്ചായത്ത് പരിധിയില്‍  50 മൈക്രോണില്‍ താഴെയുളള  പ്ലാസ്റ്റിക്കുകളുടെ  ഉപയോഗം സര്‍ക്കാര്‍ ഉത്തരവിന്റെ  അടിസ്ഥാനത്തില്‍ കര്‍ശനമായി  നിരോധിച്ചു.  പ്ലാസ്റ്റിക് കവറുകള്‍, ബോട്ടിലുകള്‍, നിരോധിത പ്ലാസ്റ്റിക്കുകള്‍ എന്നിവ ഉല്‍പ്പാദിപ്പിക്കുകയോ ശേഖരിക്കുകയോ വില്‍ക്കുകയോ കൈകാര്യം  ചെയ്യുവാനോ പാടില്ല.  2018 ജനുവരി ഒന്നു മുതല്‍ ഈ വസ്തുക്കള്‍ കണ്ടെടുക്കുന്ന പക്ഷം പിഴ ചുമത്തുകയോ നിയമപ്രകാരമുളള  കര്‍ശന നടപടികള്‍ സ്വീകരിക്കുകയോ ചെയ്യുമെന്ന് പഞ്ചായത്ത് പ്രസിഡന്റ്  അറിയിച്ചു.
 

കാസര്‍കോട് സബ് കോടതിയുടെ  വജ്രജൂബിലി ആഘോഷങ്ങളുടെ ഭാഗമായി ജനാധിപത്യത്തില്‍ മാധ്യമങ്ങളുടെ പങ്ക് എന്ന വിഷയത്തില്‍ ഇന്ന്(21) സെമിനാര്‍ നടക്കും. ഉച്ചയ്ക്ക് 1.30 വിദ്യാനഗര്‍ ജില്ലാ കോടതി കോംപ്ലക്‌സില്‍ നടക്കുന്ന സെമിനാര്‍ കേരള ഹൈക്കോടതി മുന്‍ ജഡ്ജിയും  രണ്ടാം ദേശീയജുഡീഷ്യല്‍ ശമ്പള കമ്മീഷന്‍ അംഗവുമായ ജസ്റ്റിസ് ആര്‍.ബസന്ത്  ഉദ്ഘാടനം ചെയ്യും.