സഹകരണ വായ്പാ മേഖലയില്‍ നിക്ഷേപ തോത് വര്‍ധിപ്പിക്കുന്നതിനായി 2018 ജനുവരി 10 മുതല്‍ ഫെബ്രുവരി 9 വരെ നിക്ഷേപ സമാഹരണ യജ്ഞം സംഘടിപ്പിക്കുന്നു. 'സഹകരണ നിക്ഷേപം നവകേരള നിര്‍മ്മിതിക്ക്' എന്ന മുദ്രാവാക്യമുയര്‍ത്തി നടത്തുന്ന 38ാമത് സഹകരണ നിക്ഷേപ സമാഹരണ ക്യാമ്പയിനിലൂടെ അയ്യായിരം കോടി രൂപ സമാഹരിക്കാനാണ് ലക്ഷ്യമിടുന്നതെന്ന് മന്ത്രി കടകംപള്ളി സുരേന്ദ്രന്‍ പറഞ്ഞു. ഓരോ ജില്ലയ്ക്കും പ്രത്യേക നിക്ഷേപ സമാഹരണ ലക്ഷ്യം നിശ്ചയിച്ചു നല്‍കിയിട്ടുണ്ട്.

സ്വാമി വിവേകാനന്ദന്‍ കേരളം സന്ദര്‍ശിച്ചതിന്റെ 125 ാം വാര്‍ഷികം ആഘോഷിക്കുന്നതിന്റെ ഭാഗമായി സംസ്ഥാന സര്‍ക്കാര്‍ സംഘടിപ്പിച്ച വിവേകാനന്ദ സ്പര്‍ശത്തിന് എല്ലാ ജില്ലകളിലും മികച്ച ജനപങ്കാളിത്തം ലഭിച്ചതായി സാംസ്‌കാരിക മന്ത്രി എ. കെ. ബാലന്‍ പറഞ്ഞു. വിവേകാനന്ദ സ്പര്‍ശത്തിന്റെ സമാപന സമ്മേളനം ടാഗോര്‍ തിയേറ്ററില്‍ ഉദ്ഘാടനം ചെയ്യുകയായിരുന്നു അദ്ദേഹം. 

യൂത്ത് എക്‌സ്‌ചേഞ്ച്  പദ്ധതിയുടെ ഭാഗമായി മാലിദ്വീപില്‍ നിന്നും നാല് എന്‍.സി.സി കേഡറ്റുകളും ഒരു ഓഫീസറും അടങ്ങുന്ന സംഘം ഇന്ത്യാ സന്ദര്‍ശനത്തിന്റെ ഭാഗമായി കേരളത്തിലെത്തുന്നു. സംഘത്തിനെ ഇന്ന് (ഡിസംബര്‍ 23)  രാവിലെ 11ന് ഭാരത സര്‍ക്കാരിനു വേണ്ടി സഹകരണ-ടൂറിസം മന്ത്രി കടകംപള്ളി സുരേന്ദ്രന്‍ സ്വീകരിക്കും. സഹകരണമന്ത്രിയുടെ ചേമ്പറില്‍ നടക്കുന്ന പരിപാടിയില്‍ പൊതുവിദ്യാഭ്യാസ സെക്രട്ടറി എ.ഷാജഹാന്‍്, എന്‍.സി.സി. അഡീ.ഡയറക്ടര്‍ മേജര്‍ ജനറല്‍ അനൂപ് കുമാര്‍ എന്നിവരും പങ്കെടുക്കും.

പി.എന്‍.എക്‌സ്.5493/17

സ്‌കൂള്‍തലത്തില്‍ നടപ്പിലാക്കിവരുന്ന മികച്ച വിദ്യാഭ്യാസ മാതൃകകള്‍ കണ്ടെത്തി അംഗീകരിക്കാനും രേഖപ്പെടുത്തി വ്യാപിപ്പിക്കുന്നതിനും സംസ്ഥാന വിദ്യാഭ്യാസ ഗവേഷണ പരിശീലന സമിതി (എസ്.സി.ഇ.ആര്‍.ടി) പദ്ധതി ആവിഷ്‌കരിച്ചു. പ്രീ-പ്രൈമറി മുതല്‍ ഹയര്‍ സെക്കണ്ടറി വരെയുള്ള സ്ഥാപനങ്ങള്‍ക്കും അധ്യാപക വിദ്യാഭ്യാസ സ്ഥാപനങ്ങള്‍ക്കും അവര്‍ നടപ്പിലാക്കിയതോ നടപ്പിലാക്കിവരുന്നതോ ആയ പദ്ധതികള്‍ ഇതില്‍ ഉള്‍പ്പെടുത്താം. വിദ്യാഭ്യാസ ഗുണമേന്മ വര്‍ദ്ധിപ്പിക്കല്‍, അക്കാദമിക മികവ്, വിലയിരുത്തല്‍ തുടങ്ങിയവയിലെ  മികച്ച മാതൃകകളാണ് എസ്.സി.ഇ.ആര്‍.ടി അന്വേഷിക്കുന്നത്.

ഓഖി ചുഴലിക്കാറ്റില്‍ ദുരിതമനുഭവിക്കുന്നവര്‍ക്ക് സഹായം ലഭിക്കുന്നതിന് മുഖ്യമന്ത്രിയുടെ ദുരിതാശ്വാസനിധിയിലേക്ക് കേരള സ്റ്റേറ്റ് സ്‌പോര്‍ട്‌സ് കൗണ്‍സിലിലെ ജീവനക്കാര്‍ സര്‍ക്കാര്‍ നിര്‍ദേശപ്രകാരമുള്ള തുക നല്‍കുമെന്ന് സംസ്ഥാന സ്‌പോര്‍ട്‌സ് കൗണ്‍സില്‍ പ്രസിഡന്റ് ടി.പി. ദാസന്‍ അറിയിച്ചു. ജീവനക്കാരെ കൂടാതെ കൗണ്‍സില്‍ അംഗീകരിച്ചിട്ടുള്ള എല്ലാ സംസ്ഥാന സ്‌പോര്‍ട്‌സ് അസോസിയേഷനുകളും 5000 രൂപയില്‍ കുറയാത്ത തുകയും ജില്ലാ സ്‌പോര്‍ട്‌സ് അസോസിയേഷനുകള്‍ 1000 രൂപയില്‍ കുറയാത്ത തുകയും നല്‍കാന്‍ സന്നദ്ധത പ്രകടിപ്പിച്ചിട്ടുണ്ട്.

മുഖ്യമന്ത്രിയുടെ ദുരിതാശ്വാസ നിധിയിലേക്ക് ജോയ് ആലൂക്കാസ് ഗ്രൂപ്പ് ഒരു കോടി രൂപ  നല്‍കി. ചെയര്‍മാന്‍ ജോയ് ആലൂക്കാസ് ചെക്ക് മുഖ്യമന്ത്രി പിണറായി വിജയന് കൈമാറി. ടെക്‌നോപാര്‍ക്ക് ഐടി ജീവനക്കാരില്‍ നിന്ന് സമാഹരിച്ച 3,42,400 രൂപ ജീവനക്കാരുടെ സാമൂഹ്യ-സാംസ്‌കാരിക-ക്ഷേമ സംഘടനയായ പ്രതിധ്വനി മുഖേന സംഭാവന നല്‍കി. ശ്രീചിത്തിര തിരുനാള്‍ ഇന്‍സ്റ്റിറ്റ്യൂട്ട് ഓഫ് മെഡിക്കല്‍ സയന്‍സസ് 2,50,000 രൂപയും തോന്നയ്ക്കല്‍ ബ്ലൂമൗണ്ട് സ്‌കൂള്‍ 1,00,000 രൂപയും ഓഖി ദുരിതാശ്വാസ നിധിയിലേക്ക് സംഭാവന നല്‍കി. 

പി.എന്‍.എക്‌സ്.5490/17

2018 -19 അധ്യയന വര്‍ഷത്തേക്കുളള പ്ലസ്‌വണ്‍, പ്ലസ്ടു പാഠപുസ്തകങ്ങള്‍ക്കുളള ഓണ്‍ലൈന്‍ ഇന്‍ന്റിംഗ് ആരംഭിച്ചു.  പുസ്തകത്തിനുളള ഓര്‍ഡര്‍ www.dhseonline.in എന്ന പോര്‍ട്ടലിലൂടെ ഡിസംബര്‍ 23ന് വൈകിട്ട് മൂന്നിനകം സമര്‍പ്പിക്കണമെന്ന് ഹയര്‍സെക്കന്ററി ഡയറക്ടര്‍ അറിയിച്ചു.

പി.എന്‍.എക്‌സ്.5489/17

കേരള നിയമസഭയുടെ ആരോഗ്യവും കുടുംബക്ഷേമവും സംബന്ധിച്ച സബ്ജക്ട് കമ്മിറ്റി ഡിസംബര്‍ 26ന് രാവിലെ 10 മുതല്‍ 11 വരെ നിയമസഭാ സമുച്ചയത്തിലെ 5 ഡി കോണ്‍ഫറന്‍സ് ഹാളില്‍ സമിതിയുടെ പരിഗണനയിലുളള കേരള ക്ലിനിക്കല്‍ സ്ഥാപനങ്ങള്‍ (രജിസ്‌ട്രേഷനും നിയന്ത്രണവും) ബില്‍, 2017 സംബന്ധിച്ച് വ്യക്തികളില്‍ നിന്നും സംഘടനകളില്‍ നിന്നും ഹര്‍ജികളും നിവേദനങ്ങളും സ്വീകരിക്കും. ഹര്‍ജികളും നിവേദനങ്ങളും നല്‍കാനാഗ്രഹിക്കുന്ന വ്യക്തികളും സംഘടനകളും അവ സമിതി ചെയര്‍പേഴ്‌സനെ അഭിസംബോധന ചെയ്ത് നല്‍കണം.

പി.എന്‍.എക്‌സ്.5488/17

ദുരന്ത നിവാരണ പ്രവര്‍ത്തനങ്ങളില്‍ സര്‍ക്കാരിനെ സഹായിക്കാന്‍ തയ്യാറുള്ള സന്നദ്ധ സ്ഥാപനങ്ങള്‍ സംഘടനകള്‍ എന്നിവയില്‍ നിന്ന് സര്‍ക്കാര്‍ അപേക്ഷ ക്ഷണിച്ചു. മുന്‍ പരിചയമുള്ളവര്‍ക്ക് മുന്‍ഗണന. തെരെഞ്ഞെടുക്കുന്നവരെ ഉള്‍പ്പെടുത്തി സംസ്ഥാന ദുരന്ത നിവാരണ അതോറിറ്റി പാനല്‍ തയ്യാറാക്കും. ഓണ്‍ലൈനായി അപേക്ഷിക്കണം. www.sdma.gov.in എന്ന വെബ്‌സൈറ്റില്‍ വിശദാംശമുണ്ട്. അവസാന തീയതി ഡിസംബര്‍31.

പി.എന്‍.എക്‌സ്.5487/17