അടുത്ത 24 മണിക്കൂറിനുള്ളില്‍ കേരള, കര്‍ണാടക തീരങ്ങളിലും ലക്ഷദ്വീപിലും മണിക്കൂറില്‍ 65 കിമീറ്റര്‍ വേഗത്തില്‍ ഓഖി കൊടുങ്കാറ്റു വീശാന്‍ സാധ്യതയുണ്ടെന്നും മത്സ്യത്തൊഴിലാളികള്‍ കടലില്‍ പോകരുതെന്നും കാലാവസ്ഥാ നിരീക്ഷണകേന്ദ്രം അറിയിച്ചു.

പി.എന്‍.എക്‌സ്.5145/17

കടല്‍ക്ഷോഭത്തില്‍ അപകടത്തില്‍പ്പെട്ട് മെഡിക്കല്‍ കോളേജിലും ജനറല്‍ ആശുപത്രിയിലും ചികിത്സയില്‍ കഴിയുന്ന മത്സ്യത്തൊഴിലാളികളെ മുഖ്യമന്ത്രി പിണറായി വിജയന്‍ സന്ദര്‍ശിച്ചു. ചികിത്സയില്‍ കഴിയുന്നവരുടെ ചികിത്സാവിവരങ്ങള്‍ തിരക്കിയ മുഖ്യമന്ത്രി ഇവര്‍ക്ക് മികച്ച ചികിത്സ ലഭ്യമാക്കണമെന്ന് ആരോഗ്യവകുപ്പ് അധികൃതര്‍ക്ക് നിര്‍ദേശം നല്‍കി. ഇനിയും കണ്ടെത്താനുള്ളവര്‍ക്കായി തെരച്ചില്‍ ഊര്‍ജ്ജിതമായി തുടരുകയാണെന്നും കടല്‍ ശാന്തമായതോടെ മത്സ്യത്തൊഴിലാളികള്‍ കൂടി തെരച്ചില്‍ പ്രവര്‍ത്തനങ്ങളില്‍ ഏര്‍പ്പെടുന്നത് തെരച്ചില്‍ കൂടുതല്‍ ഫലപ്രദമാകാന്‍ ഉപകരിക്കുന്നുണ്ടെന്നും മുഖ്യമന്ത്രി പറഞ്ഞു. 

കൊച്ചി: ലോകഭിന്നശേഷി ദിനാഘോഷത്തിന്റെ ഭാഗമായുളള സംസ്ഥാനതല പരിപാടികള്‍ എറണാകുളം സെന്റ് ആല്‍ബര്‍ട്ട്‌സ് ഹയര്‍ സെക്കന്‍ഡറി സ്‌കൂളില്‍ ഇന്ന് (ഡിസംബര്‍ 3) നടക്കും. ഭിന്നശേഷിക്കാര്‍ക്കായി തിരിച്ചറിയല്‍ കാര്‍ഡ് വിതരണം, ജോബ് ഫെയര്‍, എംപ്ലോയ്‌മെന്റ് രജിസ്‌ട്രേഷന്‍, ഭിന്നശേഷിക്കാര്‍ നിര്‍മ്മിച്ച ഉത്പന്നങ്ങളുടെ വിപണന മേള, ഭിന്നശേഷിക്കാര്‍ക്കുളള സംസ്ഥാനതല അവാര്‍ഡ് വിതരണം എന്നിവ നടക്കും. രാവിലെ 8.30 ന് ജില്ല പഞ്ചായത്ത് വൈസ് പ്രസിഡന്റ് അബ്ദുള്‍ മുത്തലിബ് പതാക ഉയര്‍ത്തും. വൈകിട്ട് നാലിന് നടക്കുന്ന സമാപന സമ്മേളനത്തില്‍ മന്ത്രി കെ.കെ. ശൈലജ ഭിന്നശേഷിക്കാര്‍ക്കുളള സംസ്ഥാനതല അവാര്‍ഡുകള്‍ വിതരണം ചെയ്യും.

കൊച്ചി: നവീകരിച്ച ജില്ലാ ഇടപെടല്‍ കേന്ദ്രത്തിന്റെയും സഞ്ചരിക്കുന്ന യൂണിറ്റിന്റെയും ഉദ്ഘാടനം ഇന്ന് (2017 ഡിസംബര്‍ 3ന്) രാവിലെ 9 മണിക്ക് എറണാകുളം ജനറല്‍ ആശുപത്രിയില്‍ ആരോഗ്യ കുടുംബക്ഷേമ വകുപ്പ് മന്ത്രി കെ.കെ. ശൈലജ നിര്‍വഹിക്കും. 

കൊച്ചി: കടല്‍ക്ഷോഭത്തെ  തുടര്‍ന്ന് ജില്ലയില്‍ 7 ക്യാമ്പുകള്‍ സജ്ജീകരിച്ചിട്ടുണ്ടെന്ന് ജില്ലാ കലക്ടര്‍ കെ മുഹമ്മദ് വൈ സഫീറുള്ള അറിയിച്ചു. 1258 കുടുംബങ്ങളിലായി 4674 പേരാണ് ക്യാമ്പുകളില്‍ ഉള്ളത്. 

എടവനക്കാട് ഗവണ്‍മെന്റ് യുപി സ്‌കൂള്‍, ചെല്ലാനം സെന്റ് മേരീസ് എച്ച്എസ്എസ്,  ചെല്ലാനം പുത്തന്‍തോട് ഗവണ്‍മെന്റ് ഹയര്‍ സെക്കന്‍ഡറി സ്‌കൂള്‍, ചെല്ലാനം സെന്റ് {ഫാന്‍സിസ് ചര്‍ച്ച് പാരിഷ് ഹാള്‍, ചെല്ലാനം സെന്റ് ജോര്‍ജ്ജ് ചര്‍ച്ച് പാരിഷ് ഹാള്‍,  നായരമ്പലം ദേവിവിലാസം സ്‌കൂള്‍, ഞാറയ്ക്കല്‍ ഗവണ്‍മെന്റ് ഫിഷറീസ് സ്‌കൂള്‍ എന്നിവിടങ്ങളിലാണ് ക്യാമ്പുകള്‍ ആരംഭിച്ചിട്ടുള്ളത്. 

കൊച്ചി: നവീകരിച്ച ജില്ലാ ഇടപെടല്‍ കേന്ദ്രത്തിന്റെയും സഞ്ചരിക്കുന്ന യൂണിറ്റിന്റെയും ഉദ്ഘാടനം ഇന്ന് (2017 ഡിസംബര്‍ 3ന്) രാവിലെ 9 മണിക്ക് എറണാകുളം ജനറല്‍ ആശുപത്രിയില്‍ ആരോഗ്യ കുടുംബക്ഷേമ വകുപ്പ് മന്ത്രി കെ.കെ. ശൈലജ നിര്‍വഹിക്കും. 

കൊച്ചി: ആരോഗ്യരംഗത്ത് സമഗ്രമാറ്റം ലക്ഷ്യമിട്ട് സംസ്ഥാനസര്‍ക്കാര്‍ നടപ്പിലാക്കുന്ന ആര്‍ദ്രം ദൗത്യത്തിന്റെ ഭാഗമായി ജില്ലാതല സെമിനാര്‍ ഇന്ന് (2017 ഡിസംബര്‍ 3ന്) രാവിലെ 10 മണിക്ക് എറണാകുളം ടൗണ്‍ ഹാളില്‍ മന്ത്രി ആരോഗ്യവകുപ്പ് മന്ത്രി കെ.കെ. ശൈലജ ഉദ്ഘാടനം ചെയ്യും. പ്രൊഫ. കെ.വി. തോമസ് എം പി, ഹൈബി ഈഡന്‍ എംഎല്‍എ, ജില്ലാ പഞ്ചായത്ത് പ്രസിഡന്റ് ആശ സനില്‍, ജില്ലാ കളക്ടര്‍ മുഹമ്മദ് വൈ സഫീറുള്ള തുടങ്ങിയവര്‍ പങ്കെടുക്കും. ആര്‍ദ്രം ദൗത്യത്തിന്റെ ഭാഗമായി ജില്ലയില്‍ ആരോഗ്യരംഗത്ത് വിവിധ പദ്ധതികള്‍ നടന്നുവരികയാണ്. പതിനഞ്ച് പ്രാഥമികാരോഗ്യകേന്ദ്രങ്ങള്‍ കുടുംബാരോഗ്യ കേന്ദ്രങ്ങളായി ഉയര്‍ത്തുകയാണ്.

ലോകമെമ്പാടുമുള്ള മലയാളികളായ പ്രവാസികളുടെ പ്രതിനിധികള്‍ ഉള്‍ക്കൊള്ളുന്ന  ലോക കേരള സഭ ഒരു സ്ഥിരം സംവിധാനമാക്കുമെന്ന് മുഖ്യമന്ത്രി പിണറായി വിജയന്‍ പറഞ്ഞു. സംസ്ഥാനത്തിന്റെ എംപിമാരും എംഎല്‍എമാരും മറ്റു രാജ്യങ്ങളിലെ മലയാളികളായ ജനപ്രതിനിധികളുമുള്‍പ്പെടെ 351 പേര്‍ സഭയിലുണ്ടാകുമെന്നും മുഖ്യമന്ത്രി പറഞ്ഞു. ജനുവരി 12,13 തിയതികളില്‍ നടക്കുന്ന ലോക കേരള സഭയ്ക്കു മുന്നോടിയായി വിളിച്ചു ചേര്‍ത്ത വിവിധ മാധ്യമസ്ഥാപനങ്ങളിലെ പത്രാധിപര്‍മാരുടെ യോഗത്തില്‍ സംസാരിക്കുകയായിരുന്നു അദ്ദേഹം.