പൊതുവിതരണ സഹകരണ മേഖലയിലെ ജനങ്ങള്‍ ഏറെ ആശ്രയിക്കുന്ന സ്ഥാപനമായ കണ്‍സ്യൂമര്‍ഫെഡിന്റെ സഞ്ചരിക്കുന്ന ത്രിവേണി സ്റ്റോറിന്റെ സേവനം എന്റെ കേരളം പ്രദര്‍ശന മേളയിലും ലഭിക്കും. പലചരക്ക് സാധനങ്ങളും സ്‌കൂള്‍ സ്റ്റേഷനറി സാധനങ്ങളും പൊതുവിപണിയേക്കാള്‍ വിലകുറവില്‍ ഇവിടെ ലഭ്യമാകും. വിഷുവിനും റംസാനും ആവശ്യമായ 21 നിത്യോപയോഗ സാധനങ്ങളടങ്ങിയ കിറ്റ് 999 രൂപക്ക് ഈ വാഹനത്തില്‍ ലഭ്യമാണ്. കൂടാതെ എല്ലാവിധ കോസ്‌മെറ്റിക്‌സ്, സ്റ്റേഷനറി സാധനങ്ങളും, ത്രിവേണി നോട്ടുബുക്കുകളും വാഹനത്തിലുണ്ട്. കിറ്റിലെ സാധനങ്ങളുടെ വിലയും അളവും വാഹനത്തിലുള്ള മറ്റു സാധനങ്ങളുടെ വിവരങ്ങളും താഴെ ചേര്‍ക്കുന്നു.

കാപ്പിയും  തുവരയും റാഗിയും ചാമയും ഉള്‍പ്പെട്ട നാടന്‍ ഉത്പന്നങ്ങളുമായി അട്ടപ്പാടി കോ-ഓപ്പറേറ്റീവ് ഫാമിങ് സൊസൈറ്റി. അട്ടപ്പാടിയിലെ തനത് ഉത്പന്നങ്ങളാണ് കോ-ഓപ്പറേറ്റീവ് ഫാമിങ് സൊസൈറ്റിയുടെ സ്റ്റാളിനെ വ്യത്യസ്തമാക്കുന്നത്. ഫാമിലെ കൃഷിയിടത്തില്‍ അറബിക്ക, റോബസ്റ്റ കാപ്പി ഇനങ്ങള്‍, തുവര, റാഗി, ചാമ, തിന, വരഗ്, കുരുമുളക്, മഞ്ഞള്‍ പൊടി, ഏലം, പുല്‍ തൈലം തുടങ്ങിയ പരമ്പരാഗത നാടന്‍ ഉത്പന്നങ്ങള്‍ കോ-ഓപ്പറേറ്റീവ് ഫാമിന്റെ സ്റ്റാളിലൂടെ ലഭിക്കും. രാവിലെ ഒന്‍പത് മുതല്‍ രാത്രി 10 വരെയാണ് മേള.

ടേബിള്‍ സ്റ്റാന്‍ഡുകള്‍, കൊട്ടകള്‍..

ഏപ്രില്‍ 15 വരെ ഇന്ദിരാഗാന്ധി മുന്‍സിപ്പല്‍ സ്റ്റേഡിയത്തില്‍ നടക്കുന്ന എന്റെ കേരളം-2023 പ്രദര്‍ശന വിപണന മേളയില്‍ തൊഴില്‍ അന്വേഷകര്‍ക്ക് അവസരമൊരുക്കി എംപ്ലോയ്‌മെന്റ് എക്‌സ്‌ചേഞ്ചിന്റെ ജോബ് ഡ്രൈവ്. ഇന്ന് (ഏപ്രില്‍ 12) കൂടി സ്‌പോട്ട് രജിസ്‌ട്രേഷന്‍ നടത്താം. നാളെ (ഏപ്രില്‍ 13) കൂടിക്കാഴ്ച നടക്കും. പ്ലസ് ടു, ബിരുദക്കാര്‍ക്കാണ് അവസരം. രജിസ്‌ട്രേഷന് എത്തുന്നവര്‍ ഏതെങ്കിലും ഒരു തിരിച്ചറിയല്‍ രേഖ കൈയ്യില്‍ കരുതണം. മുമ്പ് രജിസ്റ്റര്‍ ചെയ്തവര്‍ക്കും തൊഴില്‍മേളയില്‍ പങ്കെടുക്കാം. രാവിലെ ഒന്‍പത് മുതല്‍ വൈകിട്ട് അഞ്ച് വരെ രജിസ്‌ട്രേഷന്‍ ഉണ്ടായിരിക്കും.

എന്റെ കേരളം പ്രദര്‍ശന വിപണന മേളയില്‍ സാഹസികതയ്ക്ക് അവസരമൊരുക്കി പാലക്കാട് അഗ്നിരക്ഷാസേനയുടെ ബര്‍മ്മ ബ്രിഡ്ജ്. മേളയിലെത്തുന്ന സാഹസികത ഇഷ്ടപ്പെടുന്നവര്‍ക്ക് ബര്‍മ്മ ബ്രിഡ്ജിലൂടെ യാത്ര ചെയ്യാം. വെള്ളപ്പൊക്കം, ഉരുള്‍പൊട്ടല്‍ പോലുള്ള പ്രകൃതിദുരന്തങ്ങള്‍ ഉണ്ടാവുന്ന സമയത്ത് സ്ഥിരമായി നിര്‍മ്മിച്ച പാലങ്ങള്‍ നശിച്ചുപോവുകയോ ഒലിച്ചു പോവുകയോ ചെയ്യുന്ന സാഹചര്യത്തില്‍ താത്ക്കാലികമായി നിര്‍മ്മിക്കുന്ന കയര്‍ പാലമാണ് ബര്‍മ്മ ബ്രിഡ്ജ്. ബ്രിഡ്ജിലേക്ക് കയറുന്നവര്‍ക്ക് ആവശ്യമായ രക്ഷാകവചങ്ങള്‍ സേന ധരിപ്പിക്കും. സുരക്ഷക്കായി അഗ്നിരക്ഷാ സേനാംഗങ്ങള്‍ ഒപ്പമുണ്ട്.

മണ്ണാര്‍ക്കാട് താലൂക്ക് ആശുപത്രിയില്‍ ഡയാലിസിസ് ടെക്നീഷ്യന്‍ തസ്തികയില്‍ ഇന്ന് (ഏപ്രില്‍ 12) രാവിലെ 11 ന് കൂടിക്കാഴ്ച നടക്കും. ഡി.എം.ഇ, അംഗീകൃത ഡയാലിസിസ് ടെക്നിഷ്യന്‍ കോഴ്‌സ് എന്നിവയാണ് യോഗ്യത. ബന്ധപ്പെട്ട മേഖലയില്‍ ഒരു വര്‍ഷത്തെ പ്രവര്‍ത്തിപരിചയം നിര്‍ബന്ധം. മണ്ണാര്‍ക്കാട് താലൂക്ക് പരിധിയിലുള്ള ഉദ്യോഗാര്‍ത്ഥികള്‍ക്ക് മുന്‍ഗണന. താത്പര്യമുള്ളവര്‍ യോഗ്യതയും പ്രവര്‍ത്തിപരിചയവും തെളിയിക്കുന്ന അസല്‍ സര്‍ട്ടിഫിക്കറ്റുമായി നേരിട്ടെത്തണമെന്ന് മണ്ണാര്‍ക്കാട് താലൂക്ക് ആസ്ഥാന ആശുപത്രി സൂപ്രണ്ട് അറിയിച്ചു. ഫോണ്‍: 04924 224549.

മലമ്പുഴ ഗവ ഐ.ടി.ഐയില്‍ ടര്‍ണര്‍ ട്രേഡില്‍ ഗസ്റ്റ് ഇന്‍സ്ട്രക്ടര്‍ നിയമനത്തിനുള്ള കൂടിക്കാഴ്ച ഇന്ന് (ഏപ്രില്‍ 12) രാവിലെ 11 ന് നടക്കും. ബന്ധപ്പെട്ട ട്രേഡില്‍ എന്‍.ടി.സിയും മൂന്ന് വര്‍ഷത്തെ പ്രവര്‍ത്തി പരിചയവും അല്ലെങ്കില്‍ എന്‍.എ.സിയും ഒരു വര്‍ഷത്തെ പ്രവര്‍ത്തി പരിചയവും അല്ലെങ്കില്‍ ബന്ധപ്പെട്ട എന്‍ജിനീയറിങ് ബ്രാഞ്ചില്‍ മൂന്ന് വര്‍ഷ ഡിപ്ലോമയോ ഡിഗ്രിയോ ആണ് യോഗ്യത. താത്പര്യമുള്ളവര്‍ യോഗ്യത തെളിയിക്കുന്ന അസല്‍ സര്‍ട്ടിഫിക്കറ്റുമായി നേരിട്ടെത്തണമെന്ന് പ്രിന്‍സിപ്പാള്‍ അറിയിച്ചു.