വെണ്ണിക്കുളം സര്‍ക്കാര്‍ പോളിടെക്നിക്ക് കോളേജില്‍ ഇലക്ട്രിക്കല്‍ എന്‍ജിനീയറിംഗ് വിഭാഗത്തില്‍ ഗസ്റ്റ് ലക്ചററുടെയും ആട്ടോമോബൈല്‍, സിവില്‍ വിഭാഗങ്ങളില്‍ ട്രേഡ്സ്മാന്‍റെ ഒഴിവിലേക്കും അപേക്ഷിക്കാം. ലക്ചറര്‍ക്ക് ഒന്നാം ക്ലാസോടെയുള്ള ഇലക്ട്രിക്കല്‍ എന്‍ജിനീയറിംഗ് ബിരുദവും ട്രേഡ്സ്മാന്  ബന്ധപ്പെട്ട ട്രേഡിലുള്ള ഐടിഐയുമാണ് യോഗ്യത. താത്പര്യമുള്ളവര്‍ ഈ മാസം 14ന് രാവിലെ 9.30ന് അസ്സല്‍ സര്‍ട്ടിഫിക്കറ്റുകളുമായി പോളിടെക്നിക്ക് കോളേജില്‍ കൂടിക്കാഴ്ചയ്ക്ക് എത്തണം. 
                                            (പിഎന്‍പി 3319/17)

സ്‌കോള്‍-കേരള മുഖേന ഹയര്‍സെക്കണ്ടറി കോഴ്‌സിന് രജിസ്റ്റര്‍ ചെയ്ത വിദ്യാര്‍ഥികള്‍ ഹയര്‍സെക്കണ്ടറി ഡയറക്ടറേറ്റ് പ്രസിദ്ധപ്പെടുത്തിയ 2018 മാര്‍ച്ചിലെ ഒന്നും രണ്ടും വര്‍ഷ ഹയര്‍സെക്കണ്ടറി പരീക്ഷ നോട്ടിഫിക്കേഷനിലെ വ്യവസ്ഥകള്‍ പ്രകാരം അനുവദിച്ചിട്ടുള്ള പരീക്ഷ കേന്ദ്രങ്ങളില്‍ നിശ്ചിത തീയതിക്കുള്ളില്‍ പരീക്ഷ ഫീസ് അടക്കണമെന്ന് എക്‌സിക്യൂട്ടീവ് ഡയറക്ടര്‍ അറിയിച്ചു.

പി.എന്‍.എക്‌സ്.5283/17

2017-18 അധ്യയന വര്‍ഷത്തെ രണ്ടാംപാദവാര്‍ഷിക പരീക്ഷകള്‍ 13 ന് ആരംഭിക്കും.  മൂന്നു മുതല്‍ ഏഴാം ക്ലാസുവരെയുള്ള പരീക്ഷകള്‍ 14 നും ഹൈസ്‌കൂള്‍ വിഭാഗം ക്ലാസുകളിലെ പരീക്ഷകള്‍ 13 നും ആരംഭിക്കും.  പരീക്ഷാനടത്തിപ്പിന് മുന്നോടിയായി ചോദ്യപേപ്പറുകള്‍ സ്‌കൂളുകളില്‍ എത്തിച്ചിട്ടുണ്ട്.  ടൈംടേബിള്‍ പൊതുവിദ്യാഭ്യാസ വകുപ്പിന്റെ വെബ്‌സൈറ്റില്‍ പ്രസിദ്ധീകരിച്ചിട്ടുണ്ട്.  പരീക്ഷയുടെ നടത്തിപ്പുമായി വിദ്യാഭ്യാസ ഓഫീസര്‍മാരും അധ്യാപകരും സഹകരിക്കണമെന്ന് പൊതുവിദ്യാഭ്യാസ ഡയറക്ടര്‍ അറിയിച്ചു.

പി.എന്‍.എക്‌സ്.5282/17

ന്യൂനപക്ഷക്ഷേമ വകുപ്പിനു കീഴില്‍  എല്ലാ ജില്ലകളിലെയും വിവിധ ഭാഗങ്ങളില്‍ ന്യൂനപക്ഷ വിദ്യാര്‍ത്ഥികളുടെ മത്സര പരീക്ഷ പരിശീലനത്തിനും ഓറിയന്റേഷനുമായി പ്രവര്‍ത്തിക്കുന്ന മൈനോരിറ്റി കോച്ചിംഗ് സെന്ററുകളുടെ പ്രിന്‍സിപ്പല്‍മാരുടെ യോഗം ഇന്ന് (ഡിസംബര്‍ 12)രാവിലെ 10  മുതല്‍ തൈക്കാട് ഗവണ്‍മെന്റ് ഗസ്റ്റ് ഹൗസില്‍ നടക്കും.

ന്യൂനപക്ഷക്ഷേമ മന്ത്രി ഡോ.കെ.ടി.ജലീല്‍ ഉദ്ഘാടനം ചെയ്യും.  വകുപ്പ് സെക്രട്ടറി ഷാജഹാന്‍ അദ്ധ്യക്ഷത വഹിക്കും.  പ്രിന്‍സിപ്പല്‍മാര്‍ വിഷയങ്ങള്‍ അവതരിപ്പിക്കും.  വകുപ്പ് ഡയറക്ടര്‍ ഡോ. മൊയ്തീന്‍ കുട്ടി.എ.ബി. പങ്കെടുക്കും.

പി.എന്‍.എക്‌സ്.5281/17

    ഫാക്ടറീസ് ആന്‍ഡ് ബോയ്ലേഴ്സ് വകുപ്പിന്‍റെ ആഭിമുഖ്യത്തില്‍ വ്യവസായ ശാലകളില്‍ പണിയെടുക്കുന്ന തൊഴിലാളികളുടെ സുരക്ഷിതത്വം എന്ന വിഷയത്തില്‍ തൊഴിലാളി സംഘടനാ നേതാക്കള്‍ക്ക് വേണ്ടി ആരോഗ്യ സുരക്ഷിതത്വ ശില്പശാല പത്തനംതിട്ടയില്‍ നടത്തി. വീണാജോര്‍ജ് എംഎല്‍എ ഉദ്ഘാടനം ചെയ്തു. ഫാക്ടറീസ് ആന്‍ഡ് ബോയ്ലേഴ്സ് വകുപ്പ് ഡയറക്ടര്‍ പി.പ്രമോദ് അധ്യക്ഷത വഹിച്ച ചടങ്ങില്‍ ജോയിന്‍റ് ഡയറക്ടര്‍ കെ.ജയചന്ദ്രന്‍, തൊഴിലാളി സംഘടനാ നേതാക്കളായ പി.ജെ അജയകുമാര്‍, എ.ഷംസുദ്ദീന്‍, എ.എസ്.രഘുനാഥന്‍, രാജു തോമസ്,  ഫാക്ടറീസ് ആന്‍ഡ് ബോയ്ലേഴ്സ് ഇന്‍സ്പെക്ടര്‍ കെ.ആര്‍.ഷാജികുമാര്‍ തുടങ്ങിയവര്‍ പങ്കെടുത്തു. 

സംസ്ഥാന ജൈവവൈവിധ്യ ബോര്‍ഡില്‍ നിലവിലുളള അസിസ്റ്റന്റ്  കം കാഷ്യര്‍ തസ്തികയിലെ ഒഴിവിലേക്ക് സര്‍ക്കാര്‍ വകുപ്പുകള്‍/പൊതുമേഖലാ സ്ഥാപനങ്ങള്‍/ബോര്‍ഡുകള്‍/കോര്‍പ്പറേഷനുകള്‍, സ്വയംഭരണസ്ഥാപനങ്ങള്‍ എന്നിവിടങ്ങളില്‍ സീനിയര്‍ ക്ലാര്‍ക്ക്/ഹെഡ് ക്ലാര്‍ക്ക്/ജൂനിയര്‍ സൂപ്രണ്ട് തസ്തികയില്‍ സേവനമനുഷ്ഠിക്കുന്ന സ്ഥിരം ജീവനക്കാരില്‍ നിന്നും ഡെപ്യൂട്ടേഷന്‍ വ്യവസ്ഥയില്‍ നിയമനത്തിനായി വകുപ്പ് മേധാവി മുഖേന അപേക്ഷ ക്ഷണിച്ചു. (വകുപ്പ് മേധാവിയുടെ നിരാക്ഷേപ സാക്ഷ്യപത്രം സഹിതം) അപേക്ഷ ലഭിക്കേണ്ട അവസാന തീയതി ഡിസംബര്‍ 30.  വിശദവിവരങ്ങള്‍ www.keralabiodiversity.org ല്‍.

പി.എന്‍.എക്‌സ്.5280/17

ക്ഷീര വികസന വകുപ്പിനു കീഴില ക്ഷീര പരിശീലന കേന്ദ്രം ആരംഭിച്ച് 25 വര്‍ഷമായ സാഹചര്യത്തില്‍ ക്ഷീരാമൃതം എന്ന പേരില്‍ സില്‍വര്‍ ജൂബിലി സ്മരണിക പുറത്തിറക്കുന്നു.  സ്മരണികയുടെ പ്രകാശനം നാളെ (ഡിസംബര്‍ 13) രാവിലെ 11.45ന് പട്ടം ക്ഷീര പരിശീലന കേന്ദ്രത്തില്‍ മൃഗസംരക്ഷണ ക്ഷീര വികസന വകുപ്പ് മന്ത്രി അഡ്വ. കെ. രാജു നിര്‍വഹിക്കും.  കെ. മുരളീധരന്‍ എം.എല്‍.എ അധ്യക്ഷത വഹിക്കും.  ഡോ. ജോര്‍ജ് ഓണക്കൂര്‍ സ്മരണിക ഏറ്റുവാങ്ങും. ജീവനക്കാരുടെ ഏകദിന ശില്‍പശാല ക്ഷീരകര്‍ഷക ക്ഷേമ ബോര്‍ഡ് ചെയര്‍മാന്‍ എന്‍. രാജന്‍ ഉദ്ഘാടനം ചെയ്യും.  റ്റി.ആര്‍.സി.എം.പി.യു ചെയര്‍മാന്‍ കല്ലട രമേശ് മുന്‍ പ്രിന്‍സിപ്പല്‍മാരെ ആദരിക്കും.

    സ്വാമി വിവേകാനന്ദന്‍റെ കേരളസന്ദര്‍ശനത്തിന്‍റെ 125-ാം വാര്‍ഷികാഘോഷങ്ങളുടെ ഭാഗമായി സാംസ്കാരിക വകുപ്പ് വിദ്യാര്‍ഥികള്‍ക്കായി ക്വിസ് മത്സരവും വിവേകാനന്ദ ദര്‍ശനവും കാലിക ഭാരതവും എന്ന വിഷയത്തില്‍ ഉപന്യാസ മത്സരവും നടത്തുന്നു. ഹൈസ്കൂള്‍, ഹയര്‍ സെക്കന്‍ഡറി, കോളേജ് തലത്തിലെ മത്സരവിജയികള്‍ക്കായി ഈ മാസം 16ന് രാവിലെ 10ന് പത്തനംതിട്ട കോ-ഓപ്പറേറ്റീവ് കോളേജിലാണ് മത്സരം നടക്കുക. വിജയികള്‍ക്ക് ഈ മാസം 20ന് നടക്കുന്ന പൊതുസമ്മേളനത്തില്‍ സമ്മാനം നല്‍കും.
                 (പിഎന്‍പി 3316/17)    
 

    തദ്ദേശ സ്വയംഭരണ വകുപ്പിന്‍റെ കീഴിലുള്ള ജില്ലാ ശുചിത്വ മിഷനുകളില്‍ അസിസ്റ്റന്‍റ് ജില്ലാ കോ-ഓര്‍ഡിനേറ്റര്‍ ഒഴിവുകളിലേക്ക് സംസ്ഥാന സര്‍ക്കാരിന്‍റെ വിവിധ വകുപ്പുകളി ല്‍ നിന്നും ശുചിത്വ മിഷന്‍ പ്രവര്‍ത്തനങ്ങളില്‍ താത്പര്യമുള്ളവരില്‍ നിന്നും ഡെപ്യൂട്ടേഷന്‍ വ്യവസ്ഥയില്‍ നിയമനത്തിന് അപേക്ഷിക്കാം. 20000-45800 മുതല്‍ 35700-75600 വരെ ശമ്പള സ്കെയിലുള്ളവരായിരിക്കണം അപേക്ഷകര്‍.