സംഗീത നാടക അക്കാദമിയുടെ ഏഴ് ദിവസം നീണ്ടുനില്‍ക്കുന്ന നവഭവ കഥകളി മഹോത്സവത്തിന് ഇന്ന് ( ഡിസംബര്‍ ഒമ്പത്) തുടക്കമാകും. കാറല്‍മണ്ണ വാഴേങ്കട കുഞ്ചുനായര്‍ സ്മാരക ട്രസ്റ്റില്‍ വൈകിട്ട് അഞ്ചിന് നടക്കുന്ന പരിപാടി സാംസ്കാരിക-പിന്നാക്ക ക്ഷേമ- നിയമ വകുപ്പ് മന്ത്രി എ.കെ. ബാലന്‍ ഉദ്ഘാടനം ചെയ്യും. പുതുതലമുറ കഥകളി കലാകാരന്മാര്‍ക്ക് അവസരമൊരുക്കുകയാണ് പരിപാടിയുടെ ലക്ഷ്യം. കഥകളിയെക്കുറിച്ചുള്ള സംവാദത്തില്‍ പ്രശസ്ത കഥകളി കലാകാരന്മാര്‍ പങ്കെടുക്കും. കഥകളി രംഗത്ത് ദീര്‍ഘകാലം പ്രവര്‍ത്തിച്ച കലാകാരികളെ പരിപാടിയില്‍ ആദരിക്കും. പി.കെ. ശശി എം.എല്‍.എ. പരിപാടിയില്‍ അധ്യക്ഷനാകും.

ഹരിതകേരളം മിഷന്‍ ഒന്നാം വാര്‍ഷികത്തോടനുബന്ധിച്ച് സിവില്‍ സ്റ്റേഷനിലെ ഇ-മാലിന്യങ്ങളുടെ ഒന്നാം ഘട്ട ശേഖരണം ഹരിതകേരളമിഷന്‍റേയും ശുചിത്വമിഷന്‍റേയും നേതൃത്വത്തില്‍ നടന്നു. ഡെപ്യൂട്ടി ഡയറക്ടര്‍ ഓഫ് പഞ്ചായത്ത്, ജില്ല പ്രോസിക്യൂഷന്‍ ഓഫീസ്, ജില്ലാ ഇന്‍ഫര്‍മേഷന്‍ ഓഫീസ് എന്നിവിടങ്ങളില്‍ നിന്നാണ് ആദ്യഘട്ടത്തില്‍ മാലിന്യം ശേഖരിച്ചത്.. സംസ്ഥാന സര്‍ക്കാരിന്‍റെ അധീനതയിലുള്ള ക്ലീന്‍ കേരള കമ്പനിയാണ് ശാസ്ത്രീയ സംസ്കരണത്തിനായി ഇ.മാലിന്യങ്ങള്‍ ശേഖരിക്കുന്നത്.

മാലിന്യ സംസകരണത്തോടൊപ്പം വൈദ്യുതി, ശുദ്ധജലം, ചാരം എന്നിവ ഒരേ സമയം നിര്‍മിക്കുന്ന വിവിധോദ്ദേശ മാലിന്യ സംസ്കരണ സംവിധാനവുമായാണ് മൊയന്‍സ് സ്കൂള്‍ വിദ്യാര്‍ഥിനികള്‍ ഹരിതകേരളം വാര്‍ഷികാഘോഷത്തിന്‍റെ ഭാഗമായി നടന്ന പ്രദര്‍ശനത്തിനെത്തിയത്. മാലിന്യം നിശ്ചിത ഊഷ്മാവില്‍ കത്തിക്കുമ്പോള്‍ ഉണ്ടാകുന്ന നീരാവിയില്‍ നിന്നും ശുദ്ധജലം ഉണ്ടാകുകയും ഈ ജലം പ്രത്യേക  കുഴലുകള്‍ വഴി കടത്തിവിട്ട് വൈദ്യുതി നിര്‍മിക്കുകയും ചെയ്യുന്നതാണ് വിദ്യാര്‍ഥിനികളുടെ കണ്ടെത്തല്‍. മാലിന്യം കത്തുമ്പോള്‍ ഉണ്ടാകുന്ന ചാരം വളമായും ഉപയോഗിക്കാം. വലിയ വ്യവസായ സ്ഥാപനങ്ങള്‍ക്ക് ഉതകുന്ന രീതിയിലുള്ളതാണ് ഈ സംവിധാനം.

ഹരിതകേരള മിഷന്‍റെ ഒന്നാം വാര്‍ഷിക ആഘോഷത്തോടനുബന്ധിച്ച് നഗരസഭാ ടൗണ്‍ഹാള്‍ അനക്സില്‍ നടത്തിയ മാലിന്യ സംസ്കരണ ഉപാധികളുടേയും മിഷന്‍ പ്രവര്‍ത്തനങ്ങളുടെ ഫോട്ടോകളുടേയും പ്രദര്‍ശനം ശ്രദ്ധേയമാണെന്ന് എം.ബി. രാജേഷ് എം.പി. പറഞ്ഞു. പ്രദര്‍ശന സ്റ്റാളുകള്‍ സന്ദര്‍ശിച്ച് സംസാരിക്കുകയായിരുന്നു എം.പി. കുടുംബശ്രീ, കാര്‍ഷിക വികസന കര്‍ഷകക്ഷേമ വകുപ്പ്, മണ്ണ് പര്യവേക്ഷണ-സംരക്ഷണ വകുപ്പ്, മുണ്ടൂര്‍ ഐ.ആര്‍.റ്റി.സി., എക്കോബഗ്, ജി.റ്റി.ബി.എല്‍. തുടങ്ങിയവരാണ് സംസ്ക്കരണ ഉപാധികള്‍ പ്രദര്‍ശിപ്പിക്കുന്നതിനും വിത്പ്പന നടത്തുന്നതിനും സ്റ്റാളുകള്‍ ഒരുക്കിയത്.

നവകേരളാ മിഷന്‍റെ ഭാഗമായി ശുചിത്വത്തിനും കൃഷിക്കും പ്രാധാന്യം നല്‍കുന്നതിനായി സര്‍ക്കാര്‍ ആവിഷ്കരിച്ച ഹരിത കേരള മിഷന്‍ പദ്ധതിയുടെ ഒന്നാം വാര്‍ഷികാഘോഷത്തിന്‍റെ ഭാഗമായി ഫോട്ടോ പ്രദര്‍ശനവും മാലിന്യ സംസ്കരണ ഉപാധികളുടെ പ്രദര്‍ശനവും നഗരസഭാ ടൗണ്‍ഹാള്‍ അനക്സില്‍ നടന്നു. വാര്‍ഷികാഘോഷം ജില്ലാ പഞ്ചായത്ത് പ്രസിഡന്‍റ് കെ.ശാന്തകുമാരി ഉദ്ഘാടനം ചെയ്തു. പരിപാടിയോടനുബന്ധിച്ച് ജില്ലാ ശുചിത്വ മിഷന്‍ തയാറാക്കിയ ഒരുവര്‍ഷത്തെ  പ്രവര്‍ത്തന റിപ്പോര്‍ട്ട് ജില്ലാ പഞ്ചായത്ത് പ്രസിഡന്‍റ പ്രകാശനം ചെയ്തു. രാജ്യത്തിനുതന്നെ മാതൃകയായ പദ്ധതിയാണ് ഹരിതകേരള മിഷന്‍.

പാലക്കാട് മെഡിക്കല്‍ കോളെജില്‍ നിര്‍മിച്ച ഹോസ്റ്റല്‍ കെട്ടിടങ്ങള്‍ പിന്നാക്കക്ഷേമ-നിയമ-സാംസ്കാരിക വകുപ്പ് മന്ത്രി എ.കെ. ബാലന്‍ ഇന്ന് (ഡിസംബര്‍ 10) രാവിലെ 10ന് ഉദ്ഘാടനം ചെയ്യും.  26 കോടി ചെലവിട്ടാണ് ആണ്‍കുട്ടികള്‍ക്കും പെണ്‍കുട്ടികള്‍ക്കും ഹോസ്റ്റലുകള്‍ നിര്‍മിച്ചത്. 50260 ചതുരശ്ര അടി വിസ്തീര്‍ണ്ണമുള്ള ഒരു ഹോസ്റ്റലില്‍ 11 നിലകളാണുള്ളത്. 120 കിടപ്പ് മുറികള്‍, 20 അതിഥി മുറികള്‍, ഡൈനിങ് ഹാള്‍, അടുക്കള, വാര്‍ഡന്‍ ഓഫീസ് എന്നിവയാണ് ഹോസ്റ്റലില്‍ ഉള്ളത്. ഒരു ഹോസ്റ്റലില്‍ 200 പേര്‍ക്ക് താമസ സൗകര്യമുണ്ടാകും. ഷാഫി പറമ്പില്‍ എം.എല്‍.എ. അധ്യക്ഷനാകുന്ന പരിപാടിയില്‍ എം.ബി. രാജേഷ് എം.പി. മുഖ്യാതിഥിയാകും.

പൊതുജനാരോഗ്യരംഗത്ത് മെച്ചപ്പെട്ട ചികിത്സാസൗകര്യങ്ങളും പരിരക്ഷയും ലക്ഷ്യമിട്ട് സര്‍ക്കാര്‍ നടപ്പാക്കുന്ന ആര്‍ദ്രം പദ്ധതിയില്‍ ഉള്‍പ്പെടുത്തി കിഴക്കഞ്ചേരി പഞ്ചായത്തിലെ പ്രാഥമികാരോഗ്യകേന്ദ്രം കുടുംബാരോഗ്യകേന്ദ്രമായി പ്രവര്‍ത്തനം ആരംഭിക്കുന്നു. ഉദ്ഘാടനം ഇന്ന് (ഡിസംബര്‍ 10) വൈകീട്ട് മൂന്നിന് രോഗി സൗഹൃദ ആശുപത്രി പരിസരത്ത് നിയമസാംസ്കാരിക പട്ടികജാതി-പട്ടികവര്‍ഗ വകുപ്പ് മന്ത്രി എ.കെ ബാലന്‍ നിര്‍വഹിക്കും. കെ.ഡി പ്രസേനന്‍ എം.എല്‍.എ അധ്യക്ഷനാവും.  

കൊച്ചി: ഓഖി ചുഴലിക്കാറ്റിനെ തുടര്‍ന്നുണ്ടായ കടല്‍ക്ഷോഭത്തില്‍ തകര്‍ന്ന കടല്‍ഭിത്തികളുടെ പുനഃനിര്‍മ്മാണം ആരംഭിച്ചു. കടല്‍ഭിത്തി തകര്‍ന്ന വേളാങ്കണ്ണി ബസാര്‍, മറുവക്കാട്, ആലുങ്കല്‍, ചെറിയകടവ് എന്നിവിടങ്ങളിലാണ് കടല്‍ഭിത്തി പുനഃനിര്‍മ്മാണം ആരംഭിച്ചത്. നിലവില്‍ കടല്‍ഭിത്തി തകര്‍ന്ന പ്രദേശങ്ങളില്‍ വേലിയേറ്റ സമയത്ത് വീണ്ടും വെള്ളം കയറാന്‍ സാധ്യതയുള്ളതിനാല്‍ തകര്‍ന്ന ഭാഗങ്ങളില്‍ കല്ലുകള്‍ പുനസ്ഥാപിച്ചു.

ഓഖി ചുഴലിക്കാറ്റ് മൂലം സംസ്ഥാനത്തുണ്ടായ നഷ്ടങ്ങള്‍ കണക്കിലെടുത്ത് 1843 കോടി രൂപയുടെ കേന്ദ്ര സഹായം തേടി മുഖ്യമന്ത്രി പിണറായി വിജയന്‍ കേന്ദ്ര ആഭ്യന്തര മന്ത്രി രാജ്‌നാഥ് സിംഗിന് നിവേദനം നല്‍കി. ഡല്‍ഹിയിലെത്തിയാണ് മുഖ്യമന്ത്രി കേന്ദ്രത്തിന് നിവേദനം സമര്‍പ്പിച്ചത്.