ശിശുദിനത്തോടനുബന്ധിച്ച് ഹയര്‍ സെക്കന്‍ഡറി വകുപ്പിന്‍റെ കീഴിലുള്ള അസാപ്പിലെ വിദ്യാര്‍ഥികള്‍ എലിയറയ്ക്കല്‍ സെന്‍റ് മേരീസ് ഇംഗ്ലീഷ് മീഡിയം സ്കൂളില്‍ വിവിധ പരിപാടികള്‍ നടത്തി. പപ്പറ്റ് ഷോ, പേപ്പര്‍ ക്രാഫ്റ്റ്, ഗെയിംസ്, കലാപരിപാടികള്‍ എന്നിവയാണ് നടത്തിയത്. അസാപ്പ് പ്രോഗ്രാം ഓഫീസര്‍ തസ്നി നിസാര്‍, സ്കൂള്‍ പ്രിന്‍സിപ്പല്‍ സൂസി ഉമ്മര്‍, അസാപ്പ് ട്രെയിനര്‍ ഹരികൃഷ്ണന്‍, ശ്രുതി, ശാന്തന്‍, ബി.സബിന്‍ തുടങ്ങിയവര്‍ പങ്കെടുത്തു.                                                    (പിഎന്‍പി 3049/17)

    സ്വകാര്യ മേഖലയിലെ ആരോഗ്യ സംവിധാനങ്ങളെക്കുറിച്ച് പഠിക്കുന്നതിന്  കേരളത്തിലെ സ്വകാര്യ ആരോഗ്യ സ്ഥാപനങ്ങളെ സംബന്ധിച്ച് സാമ്പത്തിക സ്ഥിതിവിവര കണക്ക് വകുപ്പ് ജില്ലയില്‍ സര്‍വെ ആരംഭിച്ചു. വിവരങ്ങള്‍ ശേഖരിക്കുന്ന ഇന്‍വെസ്റ്റിഗേറ്റര്‍മാര്‍ക്കും സൂപ്പര്‍വൈസര്‍മാര്‍ക്കുമുള്ള ജില്ലാതല പരിശീലനം പത്തനംതിട്ട ഗവണ്‍മെന്‍റ് ഗസ്റ്റ് ഹൗസില്‍  വകുപ്പ് ഡെപ്യൂട്ടി ഡയറക്ടര്‍ പി.കെ.ശാലിനി ഉദ്ഘാടനം ചെയ്തു. ഡോ.ആശിഷ് മോഹന്‍ കുമാര്‍,ഡോ.വി.അജയന്‍, സുധീര്‍ തുടങ്ങിയവര്‍ ക്ലാസുകള്‍ നയിച്ചു. 
                                               (പിഎന്‍പി 3045/17)

വെളിയം പഞ്ചായത്തില്‍ ആരംഭിക്കുന്ന ഗവണ്‍മെന്റ് ഐ.ടി.ഐയിലെ ക്ലാസുകള്‍ നവംബര്‍ 20ന് തുടങ്ങും. വെല്‍ഡര്‍, ഇലക്ട്രീഷ്യന്‍ ട്രേഡുകളില്‍ പ്രവേശനം നേടിയ ട്രെയിനികള്‍ രാവിലെ 10ന് രക്ഷകര്‍ത്തായിനോടൊപ്പം എത്തണം. 

(പി.ആര്‍.കെ.നമ്പര്‍  2525/17)

ഇളമാട് ഗവണ്‍മെന്റ് ഐ.ടി.ഐയില്‍ നോര്‍ക്കാ റൂട്ട്‌സും വ്യാവസായിക പരിശീലന വകുപ്പും സംയുക്തമായി ആരംഭിക്കുന്ന പ്ലംബിംഗ് ആന്റ് സാനിറ്റേഷന്‍ കോഴ്‌സിന് അപേക്ഷ ക്ഷണിച്ചു.  

പ്ലംബര്‍, സാനിറ്ററി ഹാര്‍ഡ്‌വെയര്‍, ഫിറ്റര്‍ ഐ.ടി.ഐ ട്രേഡ് പഠിച്ചവര്‍ക്കും പ്ലംബിംഗ്/സാനിറ്ററി ഹാര്‍ഡ്‌വെയര്‍ ഫിറ്റിംഗില്‍ രണ്ടുവര്‍ഷത്തെ പ്രവൃത്തിപരിചയമുള്ളവര്‍ക്കും അപേക്ഷിക്കാം. അവസാന തീയതി നവംബര്‍ 18.  അപേക്ഷാഫോമും വിശദവിവരങ്ങളും ഐ.ടി.ഐ ഓഫീസില്‍ ലഭിക്കും. ഫോണ്‍: 0474-2671715.
(പി.ആര്‍.കെ.നമ്പര്‍  2524/17)

കൊല്ലം ജില്ലാ സായുധസേനാ ക്യാമ്പില്‍ സൂക്ഷിച്ചിരിക്കുന്ന വകുപ്പിന് ഉപയോഗ യോഗ്യമല്ലാത്ത വാഹനങ്ങള്‍ നവംബര്‍ 25ന് രാവിലെ 11നും സ്‌പെയര്‍ പാര്‍ട്ട്‌സുകള്‍ നവംബര്‍ 28ന് രാവിലെ 11നും ലേലം ചെയ്യും.

വിശദ വിവരങ്ങള്‍ 0474-2764422 എന്ന നമ്പരില്‍ ലഭിക്കും.
(പി.ആര്‍.കെ.നമ്പര്‍  2523/17)
 

സംക്ഷിപ്ത വോട്ടര്‍പട്ടിക 2017-18 പുതുക്കലിന്റെ ഭാഗമായി തിരഞ്ഞെടുപ്പ് കമ്മീഷന്‍ സംഘടിപ്പിക്കുന്ന സ്‌പെഷ്യല്‍ ഡ്രൈവ് നവംബര്‍ 15 മുതല്‍ 30 വരെ നടക്കും. വോട്ടര്‍പട്ടികയില്‍ അര്‍ഹതയുള്ള എല്ലാ വോട്ടര്‍മാരെയും ഉള്‍പ്പെടുത്തുക, മരണമടഞ്ഞവര്‍/സ്ഥിരമായി താമസം മാറിപോയവര്‍/അനര്‍ഹര്‍ എന്നിവരെ ഒഴിവാക്കി വോട്ടര്‍പട്ടിക ശുദ്ധീകരിക്കുക എന്നിവയാണ് പരിപാടിയുടെ ലക്ഷ്യം. 
ഈ കാലയളവില്‍ ബൂത്ത് ലെവല്‍ ഓഫീസര്‍മാര്‍ അവരുടെ അധികാര പരിധിയിലുള്ള മേഖലകളില്‍ വിവരശേഖരണത്തിനായി ഭവനസന്ദര്‍ശനം നടത്തും.