സംസ്ഥാന യുവകർഷക അവാർഡ് ജേതാവ് ശ്യാം മോഹനെ ആദരിച്ചു.വെള്ളാങ്ങല്ലൂർ ഗ്രാമപഞ്ചായത്തും കൃഷിഭവനും സംയുക്തമായി കർഷകദിനം ആചരിച്ചു. സംസ്ഥാന യുവകർഷകൻ അവാർഡ് നേടിയ ശ്യാം മോഹനെ ചടങ്ങിൽ ആദരിച്ചു. അഡ്വ. വി ആർ സുനിൽകുമാർ എംഎൽഎ കർഷക ദിനാഘോഷം ഉദ്ഘാടനം ചെയ്തു.

പഞ്ചായത്തിലെ വിവിധ മേഖലയിൽ ഉള്ള മികച്ച കർഷകരെ ആദരിച്ചു. വെള്ളാങ്കല്ലൂർ ബ്ലോക്ക് പഞ്ചായത്ത് പ്രസിഡന്റ് വിജയലക്ഷ്മി വിനയചന്ദ്രൻ ചടങ്ങിൽ മുഖ്യാതിഥിയായി. ജൈവവൈവിധ്യ സുസ്ഥിര കൃഷിയിടങ്ങളാക്കി തെങ്ങിൻ തടങ്ങളെ മാറ്റിയെടുക്കുക എന്ന വിഷയത്തിൽ റിട്ട. കൃഷി ഓഫീസർ എൻ കെ തങ്കരാജ് സെമിനാർ അവതരിപ്പിച്ചു.

മുല്ലശ്ശേരി ബ്ലോക്ക് പഞ്ചായത്തും എളവള്ളി കൃഷിഭവനും സംയുക്തമായി സംഘടിപ്പിച്ച കിസാൻ മേളയ്ക്ക് തുടക്കമായി. ഭാരതീയ പ്രാകൃതിക് കൃഷി പദ്ധതിയുടെ ഭാഗമായാണ് കിസാൻ മേള ഒരുങ്ങിയത്.മേളയുടെ ഭാഗമായി നടീൽ വസ്തുക്കളുടെ വിതരണം, കാർഷിക ഉപകരണങ്ങൾ , ഉത്പന്നങ്ങൾ തുടങ്ങിയവയുടെ പ്രദർശനം, കുടുംബശ്രീ ഉൽപ്പന്നങ്ങളുടെ വിൽപ്പന, പച്ചക്കറി ചന്ത തുടങ്ങിയവയും ഒരുക്കി. വിവിധ കലാപരിപാടികളും നടന്നു.

മലമ്പുഴ സർക്കാർ മൃഗസംരക്ഷണ പരിശീലന കേന്ദ്രത്തിന്റെ ആഭിമുഖ്യത്തിൽ ആടിനെ അറിഞ്ഞാൽ ആദായം ഉറപ്പ് എന്ന വിഷയത്തിൽ ഓഗസ്റ്റ് 24 ന്.മൃഗസംരക്ഷണ പരിശീലന കേന്ദ്രം മലമ്പുഴയിൽ രാവിലെ 10.00 മുതൽ 5.00 മണി വരെ പരിശീലനം ഉണ്ടായിരിക്കും.പങ്കെടുക്കുന്നവർ ആധാർ കാർഡിൻറെ കോപ്പി കൊണ്ടുവരണം. പരിശീലനത്തിൽ പങ്കെടുക്കുന്നവർ 0491 2815454, 9188522713 എന്ന നമ്പറിൽ വിളിച്ച് മുൻകൂട്ടി രജിസ്റ്റർ ചെയ്യണം.

കാര്‍ഷിക സമ്പല്‍ സമൃദ്ധിയിലേക്കുള്ള ചുവടുവയ്പായി കുന്നംകുളം നഗരസഭ കര്‍ഷകദിനം. കുന്നംകുളം ടൗണ്‍ഹാളില്‍ കുന്നംകുളം – ആര്‍ത്താറ്റ് കൃഷിഭവനുകള്‍ സംയുക്തമായാണ് കര്‍ഷകദിനവും കര്‍ഷകരെ ആദരിക്കലും നടത്തിയത്.

കര്‍ഷകര്‍ ഉല്പാദിപ്പിച്ച കാര്‍ഷിക ഇനങ്ങളുടെ വില്പനയും പഴയ കാലത്തെ കാര്‍ഷിക ഉപകരണങ്ങളുടെ പ്രദര്‍ശനവും കര്‍ഷകരുടെ കലാപരിപാടികളും ഓണസദ്യയും ചിങ്ങം ഒന്നിനെ പോയ്മറഞ്ഞ നല്ലനാളുകളുടെ ഓര്‍മ്മകളിലേക്ക് കൊണ്ടെത്തിച്ചു.

ഓണത്തിരക്ക് ഒഴിവാക്കാന്‍ കുന്നംകുളം പുതിയ ബസ്റ്റാന്‍ഡ് പരിസരത്തും പ്രധാന റോഡുകളിലും അനധികൃത പാര്‍ക്കിങ്ങ് പാടില്ലെന്ന മുന്നറിയിപ്പുമായി നഗരസഭ ഗതാഗത ഉപദേശക കമ്മറ്റി.ചെയര്‍പേഴ്സണ്‍ സീത രവീന്ദ്രന്റെ അധ്യക്ഷതയില്‍ നഗരസഭയില്‍ ചേര്‍ന്ന യോഗത്തിലാണ് തീരുമാനം. പുതിയ ബസ് സ്റ്റാന്‍ഡിലും പരിസരത്തുമായി വാഹനങ്ങള്‍ അനധികൃതമായി പാര്‍ക്ക് ചെയ്യുന്നതു മൂലം ആളുകള്‍ക്ക് ബുദ്ധിമുട്ടുണ്ടെന്ന പരാതി പരിഹരിക്കുമെന്ന് പോലീസ് യോഗത്തില്‍ ഉറപ്പുനല്‍കി. മലായ ജംക്ഷനിലെ ഗതാഗത പ്രശ്നം പരിഹരിക്കാന്‍ പ്രത്യേക പോലീസ് സേവനവും ഉറപ്പാക്കും.

കുടുംബശ്രീ സൂക്ഷ്മ സംരംഭ മേഖലയിൽ വൈദഗ്ദ്ധ്യ പരിശീലനം നടത്തുന്നതിനായി ഏജൻസികളെ എംപാനൽ ചെയ്യുന്നു.യോഗ്യത : 3 വർഷത്തിലധികം പരിശീലനം നൽകിയോ പ്രവർത്തിച്ചോ പരിചയം, കേരളത്തിൽ ഓഫീസ്, ജില്ലാതലത്തിലും ബ്ലോക്ക് അടിസ്ഥാനത്തിലും പരിശീലന സെന്ററുകൾ, ജിഎസ്ടി യും 3 വർഷത്തെ സി.എ. ഓഡിറ്റഡ് ഫിനാൻഷ്യൽ സ്റ്റേറ്റ്മെന്റ്, ടേൺ ഓവർ ഡീറ്റെയിൽസ് അപേക്ഷകൾ ഓഗസ്റ്റ് 25 ന് ശനിയാഴ്ച 5 മണിക്കകം നേരിട്ടോ തപാൽ മുഖേനയോ എത്തിക്കേണ്ടതാണ്.വിലാസം : ജില്ലാ മിഷൻ കോർഡിനേറ്റർ, കുടുംബശ്രീ, രണ്ടാം നില, കളക്ടറേറ്റ്, സിവിൽ സ്റ്റേഷൻ അയ്യന്തോൾ, തൃശൂർ - 680003.ഫോൺ : 0487 2362517

എൽ.ബി.എസ് സെന്റർ ഫോർ സയൻസ് ആൻഡ് ടെക്നോളജി ഫ്രാഞ്ചൈസികൾ ആരംഭിക്കുന്നതിന് അപേക്ഷ ക്ഷണിച്ചു. സാങ്കേതിക മേഖലയിലെ നൂതന കോഴ്സുകൾ വ്യാപിപ്പിക്കുന്നതിന്റെ മുന്നോടിയായാണ് ഫ്രാഞ്ചൈസികൾക്ക് തുടക്കമിടുന്നത്. തൊഴിൽ നൈപുണ്യം വളർത്തി എടുക്കുന്നതിന് പ്രാപ്തമായതും നൂതന സാങ്കേതികവിദ്യയായ ആർട്ടിഫിഷ്യൽ ഇന്റലിജൻസ്, ഡാറ്റ അനലിറ്റിക്സ്, റോബോട്ടിക്സ് തുടങ്ങിയ മേഖലകളിലെ കോഴ്സുകൾക്കാണ് പ്രമുഖ്യം നൽകുന്നത്. ഐ ടി കോഴ്സുകൾക്കു പുറമെ ടൂറിസം ഹോസ്പിറ്റാലിറ്റി മാനേജ്മെന്റ്, ലോജിസ്റ്റിക്സ്, ഏവിയേഷൻ, ഹെൽത്ത് കെയർ എന്നി മേഖലകളിലെ കോഴ്സുകളുടെ നടത്തിപ്പിനുമാണ് അപേക്ഷ ക്ഷണിച്ചത്.

പത്തനംതിട്ട ജില്ലയിലെ കോന്നിയിൽ പ്രവർത്തിക്കുന്ന കൗൺസിൽ ഫോർ ഫുഡ് റിസർച്ച് ആന്റ് ഡെവലപ്മെന്റ് (സി.എഫ്.ആർ.ഡി) ന്റെ കീഴിൽ കോളേജ് ഓഫ് ഇൻഡിജനസ് ഫുഡ് ടെക്നോളജി (സി.എഫ്.റ്റി.കെ) നടത്തുന്ന ബി.എസ്.സി ഫുഡ് ടെക്നോളജി ക്വാളിറ്റി അഷ്വറൻസ് കോഴ്സിലെ 2023 - 26 ബാച്ചിലേക്ക് (എംജി യൂണിവേഴ്സിറ്റി അഫിലി യേഷൻ) മാനേജ്മെന്റ് ക്വോട്ടായിൽ ഒഴിവുള്ള സീറ്റിലേക്ക് ഓഗസ്റ്റ് 18 വെള്ളിയാഴ്ച രാവിലെ 10.30 മണിക്ക് സ്പോട്ട് അഡ്മിഷൻ വഴി പ്രവേശനം നടത്തുന്നു. ഫോൺ : 0468 2240047, 9846585609,

ദേശീയ ആരോഗ്യ ദൗത്യത്തിന്റെ (എൻ എച്ച് എം) കീഴിലുള്ള വിവിധ ആരോഗ്യ സ്ഥാപനങ്ങളിലേക്ക് എ എച്ച് കൗൺസിലർ തസ്തികയിലേക്ക് അപേക്ഷ ക്ഷണിച്ചു.എംഎസ്ഡബ്ല്യു (മെഡിക്കൽ സൈക്കാട്രി എംഎ / എം എസ് സി (സൈക്കോളജി)) തുടങ്ങിയ യോഗ്യതയുള്ളവർക്ക് അപേക്ഷിക്കാം. അപേക്ഷകർ അപേക്ഷകൾ തയ്യാറാക്കി ആഗസ്റ്റ് 23 ന് വൈകീട്ട് 5 മണിക്ക് മുൻപായി ആരോഗ്യ കേരളം ഓഫീസിൽ അപേക്ഷ .സമർപ്പിക്കണം. ജനന തിയ്യതി, രജിസ്ട്രേഷൻ, യോഗ്യത, പ്രവർത്തി പരിചയം എന്നിവ തെളിയിക്കുന്ന അസൽ രേഖകളുടെ പകർപ്പും ബയോഡാറ്റയും അപേക്ഷയോടൊപ്പം സമർപ്പിക്കണം. പ്രവർത്തി പരിചയം അഭികാമ്യം. പ്രായപരിധി 40 വയസ്സ്. പരീക്ഷയുടെയും ഇന്റർവ്യൂയുടെയും അടിസ്ഥാനത്തിലാണ് നിയമനം.

തൃശൂർ ജനറൽ ആശുപത്രിയിലേയ്ക്ക് ഒ.പി ടിക്കറ്റ് പ്രിന്റിങ്ങ് ഫോംസ് ഒരു വർഷത്തേക്ക് പ്രിന്റ് ചെയ്തു തരുന്നതിന് ടെണ്ടറുകൾ ക്ഷണിച്ചു. ടെണ്ടർ ഫോം സ്വീകരിക്കുന്ന അവസാന തീയതി ഓഗസ്റ്റ് 25 ന് ഉച്ചയ്ക്ക് രണ്ട് മണി. കൂടുതൽ വിവരങ്ങൾക്ക് പ്രവർത്തി ദിവസങ്ങളിൽ ജനറൽ ആശുപത്രി സൂപ്രണ്ടിന്റെ ഓഫീസിൽ നിന്നറിയാം. ഫോൺ - 0487 2427778