തീരമൈത്രി പദ്ധതിയുടെ ഭാഗമായി മലപ്പുറം ജില്ലയിലെ ഉള്‍നാടന്‍/ തീരദേശ മത്സ്യത്തൊഴിലാളി കുടുംബത്തിലെ വനിതകള്‍ക്ക് സൂക്ഷ്മ തൊഴില്‍ സംരംഭം ആരംഭിക്കുന്നതിന് 20 വയസ്സിനും 50 വയസ്സിനും  ഇടയില്‍ പ്രായമുളളവരില്‍ നിന്ന് അപേക്ഷ ക്ഷണിക്കുന്നു. ഫിഷറീസ് വകുപ്പിന്റെ കീഴിലുളള സൊസൈറ്റി ഫോര്‍ അസിസ്റ്റന്‍സ് ടു ഫിഷര്‍വിമന്‍ (സാഫ്) ന്റെ നേതൃത്വത്തിലാണ് പദ്ധതി നടപ്പാക്കുന്നത്. അപേക്ഷകള്‍ അതത് മത്സ്യഭവനുകളില്‍ നിന്നും പൊന്നാനി ഫിഷറീസ് ഡെപ്യൂട്ടി ഡയറക്ടര്‍ ഓഫീസില്‍ നിന്നും നവംബര്‍ 17 മുതല്‍ വിതരണം ചെയ്യും. ഒരു ഗ്രൂപ്പില്‍ 2 മുതല്‍ 4 വരെ അംഗങ്ങള്‍ ആവാം.

വയറിളക്കരോഗനിയന്ത്രണ ബോധവത്ക്കരണത്തിന്റെ ഭാഗമായി ഹൈസ്‌ക്കൂള്‍ , ഹയര്‍സെക്കന്ററി വിദ്യാര്‍ത്ഥികള്‍ക്കായി ജലജന്യരോഗങ്ങളും നിയന്ത്രണമാര്‍ഗവും പാനീയ ചികിത്സയുടെ പ്രാധാന്യവും എന്ന വിഷയത്തെആസ്പദമാക്കി പ്രബന്ധ രചനാ മത്സരം നടത്തി . സിവില്‍ സ്റ്റേഷനിലെ ഐടി @ സ്‌കൂള്‍ ഹാളിലാണ് മത്സരങ്ങള്‍ സംഘടിപ്പിച്ചത്. വിജയികള്‍ക്കുള്ള സമ്മാനങ്ങള്‍ പൊതുചടങ്ങില്‍  വിതരണം ചെയ്യും.

കഴിഞ്ഞ പ്ലസ് 2 പരീക്ഷയില്‍ എല്ലാ വിഷയങ്ങള്‍ക്കും എ പ്ലസ് ലഭിച്ച ഒബിസി വിദ്യാര്‍ത്ഥികള്‍ക്ക് കേരള സംസ്ഥാന പിന്നോക്ക വിഭാഗ വികസന കോര്‍പ്പറേഷന്‍ അനുവദിച്ച സ്‌കോളര്‍ഷിപ്പിന്റെ വിതരണോദ്ഘാടനം മലപ്പുറം എം. എല്‍എ പി. ഉബൈദുള്ള നിര്‍വ്വഹിക്കും . ലഘുവായ്പാ പദ്ധതിയില്‍ കുഴിമണ്ണ ഡിഎസിനു അനുവദിച്ച 52 ലക്ഷം രൂപയുടെ വിതരണവും എംഎല്‍എ നിര്‍വ്വഹിക്കും. കോര്‍പ്പറേഷന്‍ നടപ്പാക്കുന്ന വിവിധ പദ്ധതികളെക്കുറിച്ച് ബോധവത്ക്കരണ ക്ലാസും നടക്കും

ജില്ലാ ആസൂത്രണ സമിതിയോഗം ഇന്ന് ( നവം 16 ) ഉച്ചതിരിഞ്ഞ് 3ന് ജില്ലാ പഞ്ചായത്ത് കോണ്‍ഫറന്‍സ് ഹാളില്‍ ചേരും .

വേങ്ങര ബ്ലോക്ക് പഞ്ചായത്തില്‍ സര്‍ക്കാര്‍ അംഗീകൃത സെക്യുരിറ്റി ജോലികള്‍ ലഭിക്കുന്നതിന് യുവതീയുവാക്കള്‍ക്ക് പ്രീ- റിക്രൂട്ട്‌മെന്റ് പരിശീലനം നല്‍കുന്നു. പട്ടികജാതി വിഭാഗത്തില്‍പ്പെട്ട ദാരിദ്യരേഖക്ക് താഴെയുള്ള യുവതീയുവാക്കള്‍ക്ക് അപേക്ഷിക്കാം . അപേക്ഷകര്‍ 8-ാംക്ലാസ് പാസായതും 17നും 45 നുമിടയില്‍ പ്രായമുള്ളവരും 2 മാസക്കാലം കാമ്പസില്‍ താമസിച്ചു പരിശീലനം നടത്താന്‍ തയ്യാറുള്ളവരുമായിരിക്കണം . ജാതി സര്‍ട്ടിഫിക്കറ്റ് , വരുമാന സര്‍ട്ടിഫിക്കറ്റ് , വിദ്യാഭ്യാസ യോഗ്യത തെളിയിക്കുന്ന സര്‍ട്ടിഫിക്കറ്റ് എന്നിവ സഹിതം 27 നു മുമ്പായി അപേക്ഷ നല്‍കണം .

കേരള കള്ള് വ്യവസായ തൊഴിലാളി ക്ഷേമ നിധി അംഗങ്ങളായ തൊഴിലാളികളുടെ മക്കള്‍ക്ക് ലാപ്‌ടോപ്പ് നല്‍കുന്നതിന് കേന്ദ്ര - സംസ്ഥാന സര്‍ക്കാരുകള്‍ നടത്തിയ എന്‍ട്രന്‍സ് പരീക്ഷയിലൂടെ 2017-18 വര്‍ഷം പ്രവേശനം ലഭിച്ച ഒന്നാം വര്‍ഷ പ്രൊഫഷണല്‍ വിദ്യാര്‍ത്ഥികളില്‍ നിന്ന് അപേക്ഷ ക്ഷണിച്ചു . അപേക്ഷ സ്വീകരിക്കുന്ന അവസാന തിയ്യതി ഡിസംബര്‍ 10. കൂടുതല്‍ വിവരങ്ങള്‍ക്ക് മലപ്പുറം ജില്ലാ ഓഫീസുമായി ബന്ധപ്പെടുക . ഫോണ്‍ - 0483-2734827

ജില്ലാ പട്ടിക ജാതി വികസന വകുപ്പിനു കീഴിലുള്ള 5 ഗവ. പ്രീ- മെട്രിക് ഹോസ്റ്റലുകളിലേക്ക് വിദ്യാര്‍ത്ഥികളുടെ രാത്രി കാല പഠന മേല്‍നോട്ടങ്ങള്‍ക്കായി കരാര്‍ അടിസ്ഥാനത്തില്‍ ട്യൂട്ടര്‍മാരെ നിയമിക്കുന്നു. ബിരുദവും ബിഎഡും ഉള്ളവര്‍ക്ക് അപേക്ഷിക്കാം . നിയമിക്കപ്പെടുന്ന ട്യൂട്ടര്‍മാരുടെ ജോലി സമയം വൈകീട്ട് 4 മുതല്‍ പിറ്റേന്ന് രാവിലെ 8 വരെയായിരിക്കും . പരപ്പനങ്ങാടി , പെരിന്തല്‍മണ്ണ എന്നിവിടങ്ങളിലേക്ക് പുരുഷന്‍മാരും മഞ്ചേരി , വണ്ടൂര്‍ , പെരുമ്പടപ്പ് എന്നിവിടങ്ങളിലേക്ക് സ്ത്രീകളുമാണ് അപേക്ഷിക്കേണ്ടത് .

വേങ്ങര ഗവ. ബോയ്‌സ് ഹയര്‍ സെക്കണ്ടറി സ്‌കൂള്‍ പരീക്ഷാ കേന്ദ്രമായി തിരഞ്ഞെടുത്ത പ്ലസ് വണ്‍ ഓപ്പണ്‍ സ്‌കൂള്‍ വിദ്യാര്‍ത്ഥികള്‍ക്കുള്ള കോണ്‍ടാക്റ്റ് ക്ലാസ് നവംബര്‍ 18 ന് രാവിലെ 9.30 മുതല്‍ നടത്തും .

മണ്ണാര്‍മല വിദ്യാപോഷിണി ഗ്രന്ഥാലയത്തിന്റെ ആഭിമുഖ്യത്തില്‍ വയോജനങ്ങള്‍ക്കായി വിനോദയാത്ര സംഘടിപ്പിക്കുന്നു. 65വയസ്സിന് മുകളിലുള്ള എഴുപത്തിയഞ്ചോളം പേര്‍ ഈ യാത്രയില്‍ പങ്കെടുക്കും. മലമ്പുഴ ഉദ്യാനം, പാലക്കാട് കോട്ട എന്നിവ സന്ദര്‍ശിക്കും. മണ്ണാര്‍മലയിലെ ആദിവാസികുടുംബങ്ങള്‍,  ഭിന്നശേഷിക്കാര്‍ എന്നിവര്‍ നാളെ നടക്കുന്ന വിനോദയാത്രയില്‍ പങ്കാളികളാകും. ഗ്രന്ഥാലയത്തിന്റെ 20 ഓളം വളണ്ടിയര്‍മാര്‍ യാത്രക്ക് നേതൃത്വം നല്‍കും.