കോട്ടയം: സംസ്ഥാനത്തെ ഐ.ടി.ഐകളിൽ (ഗവൺമെന്റ്/പ്രൈവറ്റ്) 2014 ആഗസ്റ്റ് മുതൽ 2022 വരെ എൻ.സി.വി.ടി. ട്രേഡുകളിൽ അഡ്മിഷൻ നേടിയ ട്രെയിനികളുടെ സർട്ടിഫിക്കറ്റിൽ പ്രൊഫൈൽ സംബന്ധമായ തിരുത്തലുകൾ വരുത്തുന്നതിന് ഇപ്പോൾ എം.ഐ.എസ്. പോർട്ടലിൽ അവസരമുണ്ട്. തിരുത്തലുകൾ ആവശ്യമുള്ളവർ അതത് ഐ.ടി.ഐ.കളുമായി ബന്ധപ്പെടണം. വിശദവിവരത്തിന് ഫോൺ: 0481 2551062, 9446278455.

കോട്ടയം: എലിക്കുളം ഗ്രാമപഞ്ചായത്തിന്റെ നേതൃത്വത്തിൽ വിദ്യാർഥികളിൽ കാർഷികാഭിരുചി വളർത്താൻ ആവിഷ്‌ക്കരിച്ച 'ഹരിതകം' പദ്ധതിക്കു തുടക്കമായി. ഇളങ്ങുളം ശ്രീ ധർമ്മശാസ്താ കെ.വി.എൽ.പി. സ്‌കൂളിൽ വിദ്യാർഥികൾക്ക് പച്ചക്കറി തൈ നൽകി പദ്ധതിയുടെ ഉദ്ഘാടനം ഗ്രാമപഞ്ചായത്ത് പ്രസിഡന്റ് എസ്. ഷാജി നിർവഹിച്ചു.

കോട്ടയം: മഹാത്മാഗാന്ധി സർവകലാശാല എംപ്ലോയ്‌മെന്റ് ഇൻഫർമേഷൻ ആൻഡ് ഗൈഡൻസ് ബ്യൂറോയുടെ നടത്തുന്ന 36 ദിവസത്തെ സൗജന്യ പി.എസ്.സി. മത്സരപരീക്ഷ പരിശീലനപരിപാടി ആരംഭിച്ചു. ജില്ലാ എംപ്ലോയ്‌മെന്റ് ഓഫീസർ ജി. സജയൻ ഉദ്ഘാടനം ചെയ്തു. ബ്യൂറോ മേധാവി ഡോ. രാജേഷ് മണി അധ്യക്ഷത വഹിച്ചു. ഡെപ്യൂട്ടി ചീഫ് ജി. വിജയകുമാർ, എംപ്ലോയ്‌മെന്റ് ഓഫീസർ പി.റ്റി. ഗോപകുമാർ, റോണികൃഷ്ണൻ, പി.യു. അഭിലാഷ് എന്നിവർ പ്രസംഗിച്ചു.

കോട്ടയം: സംസ്ഥാന സർക്കാർ പാമ്പാടിയിൽ നിർമിച്ച അസാപ് കമ്മ്യൂണിറ്റി സ്‌കിൽ പാർക്ക് ഇന്ന്(ചൊവ്വാഴ്ച, ഒക്ടോബർ 10) നാടിനു സമർപ്പിക്കും. ഉച്ചയ്ക്ക് 12ന് ഉന്നതവിദ്യാഭ്യാസ-സാമൂഹികനീതി വകുപ്പ് മന്ത്രി ഡോ. ആർ. ബിന്ദു ഉദ്ഘാടനം നിർവഹിക്കും. രാജ്യത്തെ പ്രമുഖ വ്യവസായസ്ഥാപനങ്ങളുമായി ചേർന്ന് ദേശീയ-അന്തർദേശീയ നിലവാരമുള്ള കോഴ്സുകളിൽ യുവതയ്ക്ക് തൊഴിൽ പരിശീലനം ലഭ്യമാക്കാനായി 14.68 കോടി രൂപ ചെലവിലാണ് പാർക്ക് യാഥാർഥ്യമാക്കിയത്. സഹകരണ- രജിസ്ട്രേഷൻ വകുപ്പ് മന്ത്രി വി.എൻ. വാസവൻ അധ്യക്ഷനാകും.

കോട്ടയം: ക്ഷീരവികസനവകുപ്പ് ജില്ലാ കൺട്രോൾ യൂണിറ്റിന്റെയും ഉദിക്കൽ ക്ഷീരോത്പാദക സഹകരണസംഘത്തിന്റെയും ആഭിമുഖ്യത്തിൽ ഇന്ന് (ചൊവ്വാഴ്ച, ഒക്ടോബർ 10) ഉദിക്കൽ, പൊങ്ങന്താനം, തോട്ടയ്ക്കാട് എന്നീ ക്ഷീരസഹകരണ സംഘങ്ങളിലെ കർഷകർക്കായി പാൽ ഗുണനിയന്ത്രണബോധവത്കരണ പരിപാടി സംഘടിപ്പിക്കും. രാവിലെ 10.30ന് വാകത്താനം പഞ്ചായത്ത് ഓഡിറ്റോറിയത്തിൽ നടക്കുന്ന പരിപാടി പഞ്ചായത്ത് പ്രസിഡന്റ് റോസമ്മ മത്തായി ഉദ്ഘാടനം ചെയ്യും. പഞ്ചായത്തംഗം ബീന സണ്ണി അധ്യക്ഷത വഹിക്കും. ജില്ലാ പഞ്ചായത്തംഗം സുധ കുര്യൻ മുഖ്യപ്രഭാഷണം നടത്തും. ഗ്രാമപഞ്ചായത്തംഗങ്ങൾ, ഉദ്യോഗസ്ഥർ എന്നിവർ പങ്കെടുക്കും.
 

കോട്ടയം: ക്ഷീരവികസനവകുപ്പ് ജില്ലാ കൺട്രോൾ യൂണിറ്റിന്റെയും കൂടല്ലൂർ ക്ഷീരോത്പാദക സഹകരണസംഘത്തിന്റെയും ആഭിമുഖ്യത്തിൽ ഒക്ടോബർ 12ന് കൂടല്ലൂർ ക്ഷീരസഹകരണ സംഘത്തിൽ കർഷകർക്കായി പാൽ ഗുണനിയന്ത്രണബോധവത്കരണ പരിപാടി സംഘടിപ്പിക്കും.
രാവിലെ 9.30ന് നടക്കുന്ന പരിപാടി കിടങ്ങൂർ ഗ്രാമപഞ്ചായത്ത് പ്രസിഡന്റ് തോമസ് മാളിയേക്കൽ ഉദ്ഘാടനം ചെയ്യും. കൂടല്ലൂർക്ഷീര സഹകരണസംഘം പ്രസിഡന്റ് ജയ്മോൻ തോമസ് അധ്യക്ഷത വഹിക്കും. ക്ഷീരവികസന വകുപ്പ് ഡെപ്യൂട്ടി ഡയറക്ടർ സി.ആർ. ശാരദ പദ്ധതി വിശദീകരിക്കും.  ഗ്രാമപഞ്ചായത്തംഗങ്ങൾ, ഉദ്യോഗസ്ഥർ എന്നിവർ പങ്കെടുക്കും.

 നവകേരള ബഹുജന സദസിനായി കോട്ടയം ഒരുങ്ങുന്നു; സംഘാടകസമിതിയായി

കോട്ടയം: പനച്ചിക്കാട് ദക്ഷിണമൂകാംബി ക്ഷേത്രത്തിലെ നവരാത്രി മഹോത്സവത്തോടനുബന്ധിച്ച് ഒക്‌ടോബർ 14 മുതൽ 24 വരെ ക്ഷേത്രത്തിന്റെ മൂന്നു കിലോമീറ്റർ ചുറ്റളവിലുള്ള പ്രദേശം ഉത്സവമേഖലയായി പ്രഖ്യാപിച്ച് ജില്ലാ കളക്ടർ ഉത്തരവായി.

 
കോട്ടയം: കേരള പ്രവാസി കമ്മീഷൻ ഒക്ടോബർ 25ന് രാവിലെ 10.30ന് കോട്ടയം കളക്ടറേറ്റ് കോൺഫറൻസ് ഹാളിൽ അദാലത്ത് നടത്തും. കമ്മീഷൻ ചെയർപേഴ്സൺ ജസ്റ്റിസ് പി.ഡി. രാജൻ, അംഗങ്ങളായ പി.എം. ജാബിർ, പീറ്റർ മാത്യു, അഡ്വ. ഗഫൂർ പി. ലില്ലീസ്, ഉദ്യോഗസ്ഥർ എന്നിവർ പങ്കെടുക്കും. പ്രവാസികൾ നേരിടുന്ന വിവിധ വിഷയങ്ങൾ സംബന്ധിച്ച് പരാതി നൽകാം. പുതിയ അപേക്ഷ നൽകുന്നവർ അപേക്ഷയോടൊപ്പം പാസ്പോർട്ടിന്റെ പകർപ്പ്, എതിർകക്ഷികളുടെ വ്യക്തമായ പേരും മേൽവിലാസവും, മറ്റ് അനുബന്ധ രേഖകൾ എന്നിവ നൽകണം. പ്രവാസി സംഘടനാ പ്രതിനിധികളുമായി കമ്മീഷൻ സംവദിക്കും.

കോട്ടയം: ജില്ലയിൽ ശിശുദിനാഘോഷത്തിന്റെ ഭാഗമായി വിപുലമായ പരിപാടികൾ സംഘടിപ്പിക്കും. ആഘോഷത്തിന്റെ ഭാഗമായി 'വർണോത്സവം' കലോത്സവവും നവംബർ 14ന് ചങ്ങനാശേരിയിൽ വർണാഭമായ ശിശുദിനറാലിയും സംഘടിപ്പിക്കും. കളക്‌ട്രേറ്റിൽ നടന്ന ജില്ലാ ശിശുക്ഷേമ സമിതി എക്‌സിക്യൂട്ടീവ് യോഗത്തിലാണ് തീരുമാനം. ഒക്‌ടോബർ 21ന് രാവിലെ ഒമ്പതു മുതൽ ചങ്ങനാശേരി ഗവൺമെന്റ് മോഡൽ എച്ച്.എസ്.എസിൽ 'വർണോത്സവം' എന്ന പേരിൽ വിദ്യാർഥികൾക്കായി വിവിധ മത്സരങ്ങൾ നടത്തും. പ്രസംഗം(മലയാളം, ഇംഗ്ലീഷ്), കവിതാ രചന(മലയാളം), കഥാരചന(മലയാളം), ഉപന്യാസരചന(മലയാളം), പദ്യപാരായണം (മലയാളം, ഇംഗ്ലീഷ്), ക്വിസ്, ലളിതഗാനം എന്നീ മത്സരങ്ങളാണ് നടത്തുക.