ശബരിമല തീര്‍ഥാടനം പ്രമാണിച്ച് ഇന്ന് (17ന്) രാത്രി തുറന്നു പ്രവര്‍ത്തിക്കുന്ന മെഡിക്കല്‍ സ്റ്റോറുകള്‍:    അല്‍ഷിഫ മെഡിക്കല്‍സ് പ്രൈവറ്റ് ബസ്റ്റാന്‍ഡിന് സമീപം പത്തനംതിട്ട, കൂടത്തുമണ്ണില്‍ മെഡിക്കല്‍സ് കോഴഞ്ചേരി, ഫാമിലി മെഡിക്കല്‍സ് കോന്നി, വാഴവിളയില്‍ ആശ്വാസ് മെഡിക്കല്‍സ് കെ.എസ്.ആര്‍.ടി.സിയ്ക്ക് സമീപം അടൂര്‍, വാഴപ്ലാവില്‍ മെഡിക്കല്‍സ് എംഎം ജംഗ്ഷന്‍ പന്തളം, കാരുണ്യ ഫാര്‍മസി തിരുവല്ല, സെന്‍റ് തോമസ് ഡ്രഗ് ഹൗസ് ഇട്ടിയപ്പാറ റാന്നി, നീതി മെഡിക്കല്‍ സ്റ്റോര്‍, വടശ്ശേരിക്കര.     

ശബരിമലപാതയുടെ പരിശുദ്ധി പരിപാലിക്കുന്നതില്‍ കുടുംബശ്രീയുടെ പങ്ക് പകരം വയ്ക്കാനില്ലാത്തതാണെന്ന് ജില്ലാകളക്ടര്‍ ആര്‍.ഗിരിജ  പറഞ്ഞു. പ്ലാസ്റ്റിക് രഹിത ശബരിമല ക്യാപയിന്‍റെ ജില്ലാതല ഉദ്ഘാടനം ളാഹ ഫോറസ്റ്റ് ചെക്ക്പോസ്റ്റ് പരിസരത്ത് നിര്‍വ്വഹിക്കുകയായിരുന്നു കളക്ടര്‍. തുടര്‍ച്ചയായ നാലാം വര്‍ഷവും  കുടുംബശ്രീയുടെ നേതൃത്വത്തില്‍ പ്ലാസ്റ്റിക്രഹിത ശബരിമല ക്യാപയിന്‍ നടപ്പിലാക്കുന്നതില്‍ കുടുംബശ്രീ പ്രവര്‍ത്തരകര്‍ പ്രകടിപ്പിക്കുന്ന താല്പര്യ സമൂഹത്തിന് മാതൃകയാണെന്നും പ്രകൃതി സംരക്ഷണം എല്ലാ വിഭാഗം ജനങ്ങളുടെയും പെരുമാറ്റത്തിന്‍റെ ഭാഗമാക്കേണ്ടതാണെന്നും കളക്ടര്‍ ആവശ്യപ്പെട്ടു.

ജില്ലാ സാക്ഷരതാ മിഷന്‍റെ നേതൃത്വത്തില്‍ തുടര്‍വിദ്യാ കേന്ദ്രങ്ങള്‍ സ്ഥിതി ചെയ്യുന്ന വാര്‍ഡുകളിലെ പൊതു ജലസ്രോതസ്സുകളുടെ പഠന റിപ്പോര്‍ട്ട് പ്രകാശനം ചെയ്തു.  വിശദമായ സര്‍വെകളുടെ അടിസ്ഥാനത്തിലാണ് റിപ്പോര്‍ട്ട് തയ്യാറാക്കിയിട്ടുള്ളത്. ജില്ലാ പഞ്ചായത്ത് പ്രസിഡന്‍റ് അന്നപൂര്‍ണാ ദേവി ചടങ്ങ് ഉദ്ഘാടനം ചെയ്തു.വികസന കാര്യ സ്റ്റാന്‍ഡിംഗ് കമ്മിറ്റി ചെയര്‍പേഴ്സണ്‍ എലിസബത്ത് അബു അധ്യക്ഷത വഹിച്ചു.

മഹാത്മാഗാന്ധി ദേശീയ ഗ്രാമീണ തൊഴിലുറപ്പു പദ്ധതിയിലെ അടുത്ത വര്‍ഷത്തെ  ലേബര്‍ ബജറ്റ്, കര്‍മ പദ്ധതി രൂപീകരണം എന്നിവയുടെ നടപടികള്‍ ഊര്‍ജിതപ്പെടുത്തണമെന്ന് ജില്ലാ കലക്ടര്‍ ആര്‍ ഗിരിജ നിര്‍ദേശിച്ചു. കുറ്റമറ്റ ലേബര്‍ ബജറ്റും പ്രോജക്ടുകളുടെ പട്ടികയും ഡിസംബര്‍ മൂന്നിനകം ബ്ലോക്ക് പഞ്ചായത്തുകളുടെ അംഗീകാരത്തിനായി ലഭ്യമാക്കണമെന്നും കലക്ടര്‍ പറഞ്ഞു.  ഓരോ ഗ്രാമപഞ്ചായത്തും പ്രദേശത്ത് അടുത്ത വര്‍ഷം പദ്ധതിയിലുളള  ഓരോ കുടുംബത്തിനും 100 തൊഴില്‍ ദിനം ലഭിക്കും വിധമാണ് ലേബര്‍ ബജറ്റ് തയ്യാറാക്കേണ്ടത്. ആവശ്യമായി വരുന്ന തൊഴില്‍ദിനങ്ങള്‍ ശരിയായ രീതിയില്‍ തിട്ടപ്പെടുത്തി ലേബര്‍ ബജറ്റ് കണക്കാക്കണം.

ജില്ലാ പദ്ധതി രൂപീകരണവുമായി ബന്ധപ്പെട്ട് പ്ലാനിംഗ് അസിസ്റ്റന്‍റ് തസ്തികയില്‍ താത്ക്കാലിക അടിസ്ഥാനത്തില്‍ നിയമിക്കുന്നതിന് ഈ മാസം 20ന് വാക്ക് ഇന്‍ ഇന്‍റര്‍വ്യൂ നടക്കും. ജ്യോഗ്രഫി/ജിയോളജിയില്‍ ബിരുദാനന്തര ബിരുദമോ തത്തുല്യ യോഗ്യതയും ജിഐഎസ് സോഫ്റ്റ് വെയറില്‍ പ്രാവീണ്യവും അല്ലെങ്കില്‍ റിമോട്ട് സെന്‍സിംഗില്‍ ബിരുദമോ അല്ലെങ്കില്‍ ജിഐഎസ് ആപ്ലിക്കേഷനില്‍ പ്രാവീണ്യമുള്ള സമാനമായ ബിരുദമോ ഉള്ളവര്‍ രാവിലെ 10ന് പത്തനംതിട്ട മിനി സിവില്‍ സ്റ്റേഷനില്‍ മൂന്നാം നിലയില്‍ പ്രവര്‍ത്തിക്കുന്ന നഗരാസൂത്രകന്‍റെ കാര്യാലയത്തില്‍ എത്തണം. ഫോണ്‍.0468 2222435. 

(പിഎന്‍പി 3079/17)

പട്ടികജാതി വികസന വകുപ്പ് പന്തളം ഐറ്റിഐയില്‍ എംപ്ലോയബിലിറ്റി സ്കില്‍സ് പഠിപ്പിക്കുന്നതിന് താത്ക്കാലിക അധ്യാപകന്‍റെ ഒഴിവിലേക്ക് അപേക്ഷിക്കാം. എംബിഎ/ ബിബിഎ ബിരുദവും കംപ്യൂട്ടര്‍ പരിജ്ഞാനവുമാണ് യോഗ്യത. താത്പര്യമുള്ളവര്‍ അസല്‍ സര്‍ട്ടിഫിക്കറ്റുകളുമായി ഈ മാസം 20ന് രാവിലെ 10ന് പന്തളം ചേരിക്കലിലുള്ള ഐറ്റിഐ ഓഫീസില്‍ ഹാജരാകണം. കൂടുതല്‍ വിവരങ്ങള്‍ക്ക് ഫോണ്‍: 04734 252243. 

(പിഎന്‍പി 3078/17)  
 

മാരക കീടനാശിനികളുടെ അമിത ഉപയോഗം നിയന്ത്രിക്കുന്നതിന് കാര്‍ഷിക വികസന കര്‍ഷക ക്ഷേമ വകുപ്പ് ഈ മാസം 18 വരെ കാമ്പയിന്‍ നടത്തും. ഗാര്‍ഹിക കീടനിയന്ത്രണത്തിനുള്ള കീടനാശിനി ഉല്‍പ്പന്നങ്ങളുടെ വിതരണത്തിലും വില്പ്പനയിലും നിയന്ത്രണം ഏര്‍പ്പെടുത്തുന്നതിന്‍റെ ഭാഗമായി കൃഷിവകുപ്പിന്‍റെ ഗുണനിലവാര എന്‍ഫോഴ്സ്മെന്‍റാണ് കാമ്പയിന്‍ നടത്തുന്നത്. ഗാര്‍ഹിക കീടനാശിനികളെ സംബന്ധിച്ച് പൊതുജനങ്ങളുടെയും വില്പ്പന വിതരണക്കാരുടെയും ഇടയില്‍ ആവശ്യമായ അവബോധം സൃഷ്ടിക്കുകയാണ് കാമ്പയിന്‍റെ ലക്ഷ്യം. 

വിദ്യാര്‍ഥികള്‍ പ്ലാസ്റ്റിക് വിരുദ്ധ സന്ദേശ വാഹകരാകണമെന്ന് വീണാജോര്‍ജ് എംഎല്‍എ പറഞ്ഞു. മിഷന്‍ ഗ്രീന്‍ ശബരിമല പദ്ധതിയുടെ ഭാഗമായി പമ്പയില്‍ മാലിന്യ മുക്ത സന്ദേശം പ്രചരിപ്പിക്കുന്നതിനായി ഹയര്‍ സെക്കന്‍ഡറി വിദ്യാര്‍ഥികള്‍ നടത്തുന്ന പ്രചാരണ പരിപാടി പത്തനംതിട്ട കെ.എസ്.ആര്‍.ടി.സി സ്റ്റാന്‍ഡിന് സമീപം ഫ്ളാഗ് ഓഫ്     ചെയ്യുകയായിരുന്നു എംഎല്‍എ. ശബരിമല തീര്‍ഥാടത്തോടനുബന്ധിച്ച് നടപ്പാക്കുന്ന മിഷന്‍ ഗ്രീന്‍ ശബരിമല പദ്ധതി പ്രകൃതി സംരക്ഷണത്തെക്കുറിച്ചുള്ള പുതിയ ഉള്‍ക്കാഴ്ച നല്‍കുമെന്നും എംഎല്‍എ പറഞ്ഞു.

കിര്‍ത്താഡ്സിന്‍റെ ആഭിമുഖ്യത്തില്‍ നടത്തുന്ന 35-ാമത് സംസ്ഥാനതല തലയ്ക്കല്‍ ചന്തു സ്മാരക അമ്പെയ്ത്ത് മത്സരത്തില്‍ പങ്കെടുക്കുന്നതിന് അപേക്ഷിക്കാം. 18 വയസ്സിന് മുകളില്‍ പ്രായമുള്ള പട്ടികവര്‍ഗ സമുദായത്തില്‍പ്പെട്ട വ്യക്തികളായിരിക്കണം അപേക്ഷകര്‍. ഒരു ടീമില്‍ നാലു പേരാണുള്ളത്. അപേക്ഷ ഈ മാസം 20നകം   ഡെപ്യൂട്ടി ഡയറക്ടര്‍, (പരിശീലനം), ഡയറക്ടറേറ്റ് ഓഫ് കിര്‍ത്താഡ്സ്, ചേവായൂര്‍ പി.ഒ, കോഴിക്കോട് 673017 എന്ന വിലാസത്തില്‍ ലഭിക്കണം.

വ്യാജ ജാതി സര്‍ട്ടിഫിക്കറ്റ് ഉപയോഗിച്ച് സര്‍ക്കാര്‍ ജോലി നേടിയതായുള്ള പരാതിയിേډല്‍ 31 പേര്‍ക്കെതിരെ സ്പെഷ്യല്‍ ബ്രാഞ്ച് അന്വേഷണം നടത്തി റിപ്പോര്‍ട്ട് നല്‍കാന്‍ സംസ്ഥാന പട്ടികജാതി ഗോത്ര കമ്മീഷന്‍ ചെയര്‍മാന്‍ ജഡ്ജ് പി.എന്‍.വിജയകുമാര്‍ ശുപാര്‍ശ ചെയ്തു.