നെടുമങ്ങാട് ഗവൺമെന്റ് എൽ.പി.എസിലെ പ്രീ പ്രൈമറി വിഭാഗത്തിനായുള്ള ശിശു സൗഹൃദ ക്ലാസ് മുറിയും ഹെൽത്തി കിഡ്‌സ് പദ്ധതിയുടെ ഭാഗമായുള്ള ഇൻഡോർ, ഔട്ട്‌ഡോർ  ഗെയിം ഉപകരണങ്ങളുടെ ഉദ്ഘാടനവും ഭക്ഷ്യ പൊതുവിതരണ വകുപ്പ് മന്ത്രി ജി.ആർ അനിൽ നിർവഹിച്ചു.എ. ഡി1820 ൽ വിദ്യാലയം തുടങ്ങാൻ അനുവാദം നൽകിക്കൊണ്ടുള്ള രാജകീയ വിളംബരം ആലേഖനം ചെയ്ത ശിലാഫലകവും മന്ത്രി അനാച്ഛാദനം ചെയ്തു. എണ്ണൂറിലധികം കുരുന്നുകൾ പഠിക്കുന്ന നെടുമങ്ങാട് എൽ.പി.എസിന്റെ പൂർണ്ണ വികസനമാണ് തന്റെ ലക്ഷ്യമെന്ന് മന്ത്രി ജി.ആർ അനിൽ പറഞ്ഞു.

മേരി മാട്ടി മേരാ ദേശ് (എൻറെ മണ്ണ്, എൻറെ രാജ്യം) ക്യാമ്പയിനിന്റെ ജില്ലാതല ഉദ്ഘാടനം പൂക്കോട്ടൂർ മൈലാടിയിൽ ജില്ലാ കളക്ടർ വി.ആർ പ്രേംകുമാർ നിർവഹിച്ചു. ആസാദി കാ അമൃത് മഹോത്സവത്തിന് സമാപനം കുറിച്ചുകൊണ്ട് ആഗസ്റ്റ് ഒമ്പത് മുതല്‍ 15 വരെ ദേശവ്യാപകമായി നടക്കുന്ന പരിപാടിയുടെ ഭാഗമായാണ് മേരിമാട്ടി മേരാ ദേശ് ക്യാമ്പയിന്‍ നടക്കുന്നത്. 

മലപ്പുറം എം.എസ്.പി ഹയര്‍സെക്കന്‍ഡറി സ്കൂളില്‍ ഒഴിവുള്ള എച്ച്.എസ്.എസ്.ടി കൊമേഴ്സ്  തസ്തികയിലേക്ക് ദിവസ വേതനാടിസ്ഥാനത്തിലുള്ള നിയമനത്തിനായി ആഗസ്റ്റ്  14 (തിങ്കള്‍) രാവിലെ 9.30 ന് ഓഫീസില്‍ വെച്ച് കൂടിക്കാഴ്ച നടക്കും. ഫോണ്‍: 04832734921.

മദ്രാസ് റെജിമെന്റിൽ നിന്നും വിരമിച്ച മലപ്പുറം ജില്ലയില്‍ നിന്നുള്ള വിമുക്തഭടന്മാർക്കും അവരുടെ ആശ്രിതർക്കുമായി  ആഗസ്റ്റ് 21  ന് മലപ്പുറം ജില്ലാ സൈനിക ക്ഷേമ ഓഫീസിൽ വെച്ച് സമ്പർക്ക പരിപാടി സംഘടിപ്പിക്കുന്നു. റെക്കോർഡ് ഓഫീസുമായി ബന്ധപ്പെട്ട പ്രശ്നപരിഹാരം ആവശ്യമുളളവർ ബന്ധപ്പെട്ട രേഖകളുമായി പങ്കെടുക്കണമെന്ന് ജില്ലാ സൈനിക ക്ഷേമ ഓഫീസര്‍ അറിയിച്ചു. കൂടുതല്‍ വിവരങ്ങൾക്ക് ഫോണ്‍: 9048672601.

കൊണ്ടോട്ടി ഗവ. ആർട്സ് ആൻഡ് സയൻസ് കോളേജിൽ രണ്ടാം വർഷ ബിരുദ പ്രവേശനത്തിന് ബി എ ഫങ്ഷണൽ ഇംഗ്ലീഷ്, ബി കോം(സ്പോർട്സ് ക്വാട്ട) എന്നീ വിഭാഗങ്ങളിൽ ഓരോ സീറ്റ് വീതം ഒഴിവുണ്ട്. അർഹരായ വിദ്യാർത്ഥികൾ ആഗസ്റ്റ് 17 ന് 10 മണിക്ക് കോളേജ് ഓഫീസിൽ അസ്സൽ സർട്ടിഫിക്കറ്റുകളുമായി ഹാജരാവണമെന്ന് പ്രിന്‍സിപ്പല്‍ അറിയിച്ചു.

ഓണം ഖാദി മേളയോടനുബന്ധിച്ചു ജില്ലാ ഖാദി ഗ്രാമവ്യവസായ ആഫീസിന്റെ പരിധിയിലുള്ള ഇലന്തൂര്‍, അടൂര്‍ റവന്യൂ ടവറിലുള്ള ഖാദി ഗ്രാമ സൗഭാഗ്യ, പത്തനംതിട്ട അബാന്‍ ജംഗ്ഷന്‍ ഉള്ള ഖാദി ഗ്രാമ സൗഭാഗ്യ, റാന്നി ചേത്തോങ്കരയിലുള്ള ഖാദി ഗ്രാമ സൗഭാഗ്യ എന്നീ വിപണന ശാലകള്‍ ഓഗസ്റ്റ് 28 വരെ രാവിലെ 9.30 മുതല്‍ എല്ലാ ദിവസവും (ഞായര്‍ ഉള്‍പ്പെടെ)തുറന്നു പ്രവര്‍ത്തിക്കുന്നതാണെന്നു പ്രോജക്ട് ആഫീസര്‍ എം. വി.മനോജ് കുമാര്‍. അറിയിച്ചു. ഫോണ്‍ : 0468 2362070, ഇ-മെയില്‍ : popta@kkvib.org

സ്‌കോൾ-കേരള മലയാളത്തിലേക്ക് വിവർത്തനം ചെയ്ത ഹയർസെക്കന്‍ഡറി ഒന്നും രണ്ടും വർഷ വിദ്യാർഥികൾക്കുള്ള സ്വയംപഠന സഹായികളുടെ വിൽപ്പന സ്‌കോൾ-കേരളയുടെ ജില്ലാകേന്ദങ്ങൾ വഴി ആരംഭിച്ചു. www.scolekerala.org എന്ന വെബ്സൈറ്റ് മുഖേന രജിസ്റ്റർ ചെയ്ത ശേഷം പുസ്തകവില ഓഫ് ലൈനായും ഓൺലൈനായും അടച്ച് ചെലാൻ ജില്ലാ കേന്ദ്രങ്ങളിൽ സമർപ്പിച്ച് പഠനസഹായികൾ വാങ്ങാം. ഹിസ്റ്ററി, ഇക്കണോമിക്‌സ്, പൊളിറ്റിക്കൽ സയൻസ്, സോഷ്യോളജി എന്നീ വിഷയങ്ങളുടെ മലയാളത്തിലേക്ക് വിവർത്തനം ചെയ്ത ഒന്നും രണ്ടും വർഷത്തെ സ്വയംപഠന സഹായികളാണ് വിൽപ്പനക്ക് തയാറായിട്ടുള്ളത്.

വെണ്ണിക്കുളം സര്‍ക്കാര്‍ പോളിടെക്നിക്ക് കോളേജില്‍ ഫിസിക്സ് വിഭാഗത്തില്‍ ഗസ്റ്റ് അസിസ്റ്റന്റ് പ്രൊഫസര്‍ തസ്തികയിലെ ഒരു താല്‍ക്കാലിക ഒഴിവിലേക്ക് അപേക്ഷ ക്ഷണിച്ചു.  ആഗസ്റ്റ് 16 ന്
രാവിലെ 11 ന് നടക്കുന്ന കൂടിക്കാഴ്ചയില്‍ ഉദ്യോഗാര്‍ഥികള്‍ക്ക് അസല്‍ സര്‍ട്ടിഫിക്കറ്റുകളുമായി പങ്കെടുക്കാം.  ബന്ധപ്പെട്ട വിഷയത്തിലുള്ള എം.എസ്.സി ബിരുദവും (55ശതമാനം മാര്‍ക്കാടെ പാസ് ആയിരിക്കണം) നെറ്റുമാണ് യോഗ്യത.