കൊച്ചി: മഹാരാജാസ് കോളേജിലെ ബിരുദബിരുദാനന്തര ഗവേഷണ രസതന്ത്ര വിഭാഗം, രണ്ടു ദിവസത്തെ അന്തര്‍ദേശീയ സെമിനാര്‍ നവംബര്‍ 14നും 15നും നടത്തുന്നു. നവംബര്‍ 14ന് കോളേജ് സെമിനാര്‍ ഹാളില്‍ മഹാത്മാ ഗാന്ധി സര്‍വ്വകലാശാല വൈസ് ചാര്‍സലന്‍ ഡോ.ബാബു സെബാസ്റ്റ്യന്‍ സെമിനാര്‍ ഉദ്ഘാടനം ചെയ്യും.

കൊച്ചി: മഹാരാജാസ് കോളേജില്‍ പുതുതായി അനുവദിച്ച എംഎ മ്യൂസിക് (വോക്കല്‍) കോഴ്‌സിലേക്ക് 2017-18 അധ്യയനവര്‍ഷത്തെ പ്രവേശനത്തിനായി അപേക്ഷ ക്ഷണിച്ചു. പ്രവേശന യോഗ്യത എംജി സര്‍വകലാശാല നിയമങ്ങള്‍ക്ക് അനുസൃതമായിരിക്കും.

താല്പര്യമുള്ളവര്‍  നവംബര്‍ 13ന് ഉച്ചയ്ക്ക് 2ന് മുമ്പ് കോളേജ് ഓഫീസില്‍ നിന്നും അപേക്ഷ വാങ്ങി പൂരിപ്പിച്ച് അന്നുതന്നെ നല്‍കേണ്ടതാണ്. പ്രവേശനത്തിനായി ടി.സി. ഉള്‍പ്പെടെ എല്ലാ അസ്സല്‍ രേഖകളും ഹാജരാക്കണം. പ്രവേശന നടപടികള്‍ നവംബര്‍ 13നു തന്നെ പൂര്‍ത്തീകരിക്കും.

കൊച്ചി: സംസ്ഥാനത്തെ പിന്നാക്ക വിഭാഗത്തിലെ പരമ്പരാഗത കരകൗശല തൊഴില്‍ ചെയ്യുന്ന വിശ്വകര്‍മ്മ, ശാലിയ, മൂപ്പര്‍, തോല്‍ക്കൊല്ലന്‍ (ഉപജാതികള്‍ ഉള്‍പ്പെടെ) തുടങ്ങിയ സമുദായങ്ങളില്‍പ്പെട്ട തൊഴിലാളികള്‍ക്ക് റ്റൂള്‍ കിറ്റ് ഗ്രാന്‍ഡ് നല്‍കുന്ന പദ്ധതിയുടെ കരട് മുന്‍ഗണനാ പട്ടിക www. bcdd.kerala.gov.in എന്ന വെബ്‌സൈറ്റില്‍ പ്രസിദ്ധീകരിച്ചിട്ടുണ്ട്.

അപേക്ഷകര്‍ പട്ടിക പരിശോധിച്ച് ആക്ഷേപങ്ങള്‍ ഉണ്ടെങ്കില്‍ നവംബര്‍ 23നകം എറണാകുളം ജില്ലാ മേഖലാ ഓഫീസില്‍ രേഖാമൂലം അറിയിക്കണമെന്ന് മേഖലാ ഡെപ്യൂട്ടി ഡയറക്ടര്‍ അറിയിച്ചു.

കൊച്ചി: സ്പാര്‍ക്കില്‍ (സര്‍വീസ് & പേറോള്‍ അഡ്മിനിസ്‌ട്രേറ്റീവ് റെപ്പോസിറ്ററി ഫോര്‍ കേരള) ഡിഡിഒ-മാരുടെ ഡിജിറ്റല്‍ സിഗ്‌നേച്ചര്‍ ഉള്‍പ്പെടുത്തുന്നതിനായി കെല്‍ട്രോണിന്റെ നേതൃത്വത്തില്‍ നവംബര്‍ 13,14 തീയതികളില്‍ സെന്റ് തെരേസാസ് കോളേജ് ഓഡിറ്റോറിയത്തില്‍ ഡിജിറ്റല്‍ സിഗ്‌നേച്ചര്‍ ക്യാമ്പ് നടത്തും.

എറണാകുളം സബ് ട്രഷറിയുടെയും അഡീഷനല്‍ സബ് ട്രഷറിയുടെയും കീഴിലുള്ള എല്ലാ ഡിഡിഒമാരും ക്യാമ്പില്‍ പങ്കെടുക്കണമെന്ന് സബ് ട്രഷറി ഓഫീസര്‍ അറിയിച്ചു. ഡിജിറ്റല്‍ സിഗ്‌നേച്ചര്‍ രജിസ്‌ട്രേഷന്‍ ഫോം, ആധാര്‍ കാര്‍ഡ്, പാന്‍ കാര്‍ഡ്്, ഒഫീഷ്യല്‍ ഐഡി കാര്‍ഡ് എന്നിവയുടെ സാക്ഷ്യപ്പെടുത്തിയ കോപ്പി കൊണ്ടുവരണം.

കൊച്ചി: പട്ടികജാതി വികസന വകുപ്പ് നടപ്പിലാക്കി വരുന്ന ഇ-ഗ്രാന്റ്‌സ് വിദ്യാഭ്യാസ ആനുകൂല്യ വിതരണം കുറ്റമറ്റ രീതിയില്‍ നടപ്പിലാക്കുന്നതിന് സപ്പോര്‍ട്ടിംഗ് എന്‍ജിനീയറെ തെരഞ്ഞെടുക്കുന്നു.പട്ടികജാതി വിഭാഗത്തില്‍പെട്ട ബി. ടെക് കമ്പ്യൂട്ടര്‍ സയന്‍സ് ബിരുദം/ ബി.ടെക് ഐ.ടി. ബിരുദം/ എം.സി.എ./ എം.എസ്.സി. ഐ.ടി/ എം.എസ്.സി. കമ്പ്യൂട്ടര്‍ സയന്‍സ് യോഗ്യതയുള്ളവരായിരിക്കണം അപേക്ഷകര്‍.  

കൊച്ചി: സമഗ്ര ആരോഗ്യ ഇന്‍ഷുറന്‍സ് പദ്ധതി (ഞടആഥ)-ല്‍ നിലവില്‍   അംഗമല്ലാത്ത മത്സ്യത്തൊഴിലാളികള്‍ക്ക് പദ്ധതിയില്‍ ചേരുന്നതിനുളള തീയതി നവംബര്‍ 15 വരെ നീട്ടി.

മത്സ്യത്തൊഴിലാളികള്‍ എറണാകുളം ഫിഷറീസ്  ഡെപ്യൂട്ടി ഡയറക്ടര്‍  (മേഖല) ഓഫീസിലോ, അടുത്തുളള അക്ഷയ സെന്ററുകളിലോ മത്സ്യത്തൊഴിലാളി ക്ഷേമനിധി പാസ്ബുക്ക്, റേഷന്‍കാര്‍ഡ്, ആധാര്‍ കാര്‍ഡ് എന്നിവ സഹിതം എത്തിച്ചേരണം.

ഫോണ്‍ 0484-2394476 

ജില്ലാതല ശിശുദിനാഘോഷം 14ന് വിപുലമായ പരിപാടികളോടെ പത്തനംതിട്ടയില്‍ നടക്കുമെന്ന് ജില്ലാ കളക്ടര്‍ ആര്‍. ഗിരിജ അറിയിച്ചു. വര്‍ണശബളമായ ശിശുദിന റാലി, പൊതുസമ്മേളനം, കലാപരിപാടികള്‍ എന്നിവ യുണ്ടാകും. ജില്ലയിലെ സ്‌കൂള്‍ വിദ്യാര്‍ഥികളും എന്‍സിസി കേഡറ്റുകളും അണിനിരക്കുന്ന ശിശുദിന ഘോഷയാത്ര രാവിലെ എട്ടിന് പത്തനംതിട്ട കളക്ടറേറ്റില്‍ നിന്ന് ആരംഭിക്കും. ജില്ലാ പോലീസ് മേധാവി ഡോ. സതീഷ് ബിനോ പതാക ഉയര്‍ത്തും. മുന്‍സിപ്പല്‍ ചെയര്‍പേഴ്‌സണ്‍ രജനി പ്രദീപ് റാലി ഫ്‌ളാഗ് ഓഫ് ചെയ്യും. 

ലോക്‌സഭ/നിയമസഭ സംക്ഷിപ്ത വോട്ടര്‍ പട്ടിക പുതുക്കലിന്റെ ഭാഗമായി ജില്ലയിലെ എല്ലാ പോളിംഗ് സ്‌റ്റേഷനുകളും ഇന്ന്(നവംബര്‍ 11) രാവിലെ 10 മുതല്‍ വൈകിട്ട് നാലു വരെ പ്രവര്‍ത്തിക്കും.

ബൂത്ത് ലെവല്‍ ഓഫീസര്‍മാരുടെയും ബൂത്ത് ലെവല്‍ ഏജന്റുമാരുടെയും യോഗം അതത് പോളിംഗ് സ്‌റ്റേഷനുകളില്‍ നടക്കും. 2017 ഒക്ടോബര്‍ 31ന് പ്രസിദ്ധീകരിച്ച അഞ്ച് നിയോജകമണ്ഡലങ്ങളിലെയും സംക്ഷിപ്ത കരട് വോട്ടര്‍ പട്ടിക പൊതുജനങ്ങള്‍ക്ക് പരിശോധിക്കാം.

പൊതുജനങ്ങള്‍ ഈ അവസരം പ്രയോജനപ്പെടുത്തണമെന്ന് ജില്ലാ തെരഞ്ഞെടുപ്പ് ഓഫീസര്‍ കൂടിയായ ജില്ലാ കളക്ടര്‍ ആര്‍. ഗിരിജ അറിയിച്ചു. 

കേന്ദ്ര ടൂറിസം സഹമന്ത്രി അല്‍ഫോണ്‍സ് കണ്ണന്താനം നാളെ(12) ഉച്ചയ്ക്ക് രണ്ടിന് ശബരിമലയില്‍ സന്ദര്‍ശനം നടത്തും. കേന്ദ്ര വിനോദസഞ്ചാര വകുപ്പിലെ ഉന്നത ഉദ്യോഗസ്ഥരും മന്ത്രിയോടൊപ്പം ഉണ്ടാകും.