ലോക്സഭാ തിരഞ്ഞെടുപ്പിൻ്റെ പരസ്യ പ്രചാരണം ബുധനാഴ്ച (ഏപ്രിൽ 24) വൈകീട്ട് ആറിന് അവസാനിക്കും. അതിനു ശേഷം പൊതു യോഗങ്ങൾ, പ്രകടനങ്ങൾ എന്നിവ നടത്താൻ പാടില്ല. 

വ്യാഴാഴ്ച നിശബ്ദ പ്രചാരണമാണ്.  ഏപ്രിൽ 26 വെള്ളിയാഴ്ച രാവിലെ ഏഴു മുതൽ വൈകീട്ട് ആറു വരെയാണ് വോട്ടെടുപ്പ്. ജൂൺ നാലിനാണ് ഫല പ്രഖ്യാപനം.

തിരഞ്ഞെടുപ്പിന് മുമ്പുള്ള അവസാന 48 മണിക്കൂറിൽ വോട്ടർമാരെ സ്വാധീനിക്കുന്ന തരത്തിലുള്ള പ്രവർത്തനങ്ങൾ തിരഞ്ഞെടുപ്പ് കമ്മീഷൻ കർശനമായി നിരോധിച്ചിട്ടുണ്ട്.

സംസ്ഥാന ഇലക്ട്രിസിറ്റി ലൈസൻസിങ് ബോർഡ് വയർമാൻ എഴുത്തുപരീക്ഷ- 2023 വിജയിച്ചവർക്കായി ഏപ്രിൽ 29, 30, മെയ്‌ 2, 3, 4, 6 തീയതികളിൽ അളകപ്പ നഗറിലെ ത്യാഗരാജൻ പോളിടെക്നിക് കോളജിൽ പ്രായോഗിക പരീക്ഷ നടത്തുന്നു. പരീക്ഷാർഥികൾ 'സംരക്ഷാ' സോഫ്റ്റ്‌വെയറിൽ നിന്നും ഹാൾടിക്കറ്റ് ഡൗൺലോഡ് ചെയ്തെടുക്കണം. ഫോൺ: 0487 2973280.

എളനാട്- വാണിയമ്പാറ റോഡിൽ നവീകരണ പ്രവർത്തികൾ നടക്കുന്നതിനാൽ ഇന്നു (ഏപ്രിൽ 24) മുതൽ ഈ വഴി ഭാഗികമായോ പൂർണമായോ ഗതാഗത തടസ്സം ഉണ്ടാകും. വാഹനങ്ങൾ എളനാട് സെന്ററിൽ നിന്നും ആരംഭിച്ച് തിരുമണി സെന്ററിൽ അവസാനിക്കുന്ന പഞ്ചായത്ത് റോഡിലൂടെയും കുന്നുംപുറം സെന്ററിൽ  നിന്നും കണ്ണമ്പ്ര റോഡിലൂടെയും വഴി തിരിഞ്ഞു പോകണമെന്ന് ചേലക്കര പിഡബ്ല്യുഡി റോഡ്സ് സബ് ഡിവിഷൻ അസിസ്റ്റന്റ് എക്സിക്യൂട്ടീവ് എൻജിനീയർ അറിയിച്ചു.

ലോക്സഭാ തിരഞ്ഞെടുപ്പിന് ഓർഡർ സോഫ്റ്റ്‌വെയർ മുഖേന തിരഞ്ഞെടുപ്പ് ഡ്യൂട്ടി ലഭിച്ച ഉദ്യോഗസ്ഥരിൽ ഇനിയും ബാങ്ക് വിവരങ്ങൾ അപ്‌ലോഡ് ചെയ്യാത്തവർ വ്യക്തിഗത ലോഗിനിൽ ലോഗിൻ ചെയ്ത് വിവരങ്ങൾ അപ്‌ലോഡ് ചെയ്യണം. എന്തെങ്കിലും കാരണവശാൽ ഇതിന് സാധിച്ചില്ലെങ്കിൽ ഇന്ന് (ഏപ്രിൽ 24) വൈകിട്ട് അഞ്ചിനു മുമ്പായി അതത് എ.ആർ.ഒ.മാർക്ക് വിവരങ്ങൾ നൽകണം. ഐ.ഡി കാർഡിനായി ഏപ്രിൽ 22 നുള്ളിൽ ഫോട്ടോ അപ്ലോഡ് ചെയ്യാത്ത ഉദ്യോഗസ്ഥർ  ഏപ്രിൽ 25ന് വിതരണകേന്ദ്രത്തിൽ ഡ്യൂട്ടിക്ക് ഹാജരാകുമ്പോൾ രണ്ട് പാസ്പോർട്ട് സൈസ് ഫോട്ടോ കൂടി കൊണ്ടുവരണമെന്ന് ജില്ലാ തിരഞ്ഞെടുപ്പ് ഉദ്യോഗസ്ഥനായ ജില്ലാ കലക്ടർ അറിയിച്ചു.

ലോക്‌സഭാ തിരഞ്ഞെടുപ്പില്‍ തൃശൂര്‍ ജില്ലയില്‍ മാതൃകാ പോളിങ് ബൂത്തുകള്‍ക്ക് പുറമെ പ്രത്യേക ബൂത്തുകളും സജ്ജമാക്കും. തിരഞ്ഞെടുപ്പിന്റെ കമ്മീഷന്റെ നിര്‍ദേശാനുസരണം ജില്ലയില്‍ രണ്ട് ലെപ്രസി ബൂത്തുകള്‍, മൂന്ന് ട്രൈബല്‍ ബൂത്തുകള്‍, ഒന്നു വീതം ഫോറസ്റ്റ്, കോസ്റ്റല്‍ ബൂത്തുകളാണ് സജ്ജീകരിക്കുക. തൃശൂര്‍ ലോക്‌സഭാ മണ്ഡലത്തിലെ ഒല്ലൂര്‍ നിയോജക മണ്ഡലത്തില്‍ മുളയം ദാമിയന്‍ ഇന്‍സ്റ്റിട്ട്യൂട്ടും ചാലക്കുടി പാര്‍ലമെന്റ് മണ്ഡലത്തില്‍ ചാലക്കുടി നിയോജക മണ്ഡലത്തില്‍ കൊരട്ടി ലെപ്രസി ആശുപത്രിയിലെ കുമ്പീസ് മെമ്മോറിയല്‍ ഹാളിലുമാണ് ലെപ്രസി രോഗികളായ വോട്ടര്‍മാര്‍ക്കായി പോളിങ് ബൂത്ത് ഒരുക്കുക.

നിരോധനം നാളെ (ഏപ്രില്‍ 24) വൈകിട്ട് ആറുമുതല്‍ 26ന് വൈകിട്ട് ആറുവരെ

ലോക്സഭാ തിരഞ്ഞെടുപ്പ് ദിവസവും തിരഞ്ഞെടുപ്പിന് തലേ ദിവസവും (ഏപ്രില്‍ 25, 26) അച്ചടി മാധ്യമങ്ങളിലെ രാഷ്ട്രീയ പരസ്യങ്ങള്‍ക്ക് മീഡിയ സര്‍ട്ടിഫിക്കേഷന്‍ ആന്റ് മോണിറ്ററിങ് കമ്മിറ്റി (എം.സി.എം.സി)യുടെ മുന്‍കൂര്‍ സര്‍ട്ടിഫിക്കേഷന്‍ ആവശ്യമാണെന്ന് തിരഞ്ഞെടുപ്പ് കമ്മിഷന്‍ അറിയിച്ചു.

ലോക്‌സഭാ തിരഞ്ഞെടുപ്പിന് തൃശൂര്‍ ലോക്‌സഭാ മണ്ഡലത്തില്‍ ഇതുവരെ 27 സര്‍വീസ് വോട്ടര്‍മാര്‍ വോട്ട് രേഖപ്പെടുത്തി.  ഇ.ടി.പി.ബി.എസ് (ഇലക്ട്രോണിക്കലി ട്രാന്‍സ്മിറ്റഡ് പോസ്റ്റല്‍ ബാലറ്റ് സിസ്റ്റം) സംവിധാനം വഴി 728 സർവീസ് വോട്ടർമാർക്കാണ് ഇ - ബാലറ്റ് അയച്ചിട്ടുള്ളത്. 657 പുരുഷന്മാരും 71 സ്ത്രീ സർവീസ് വോട്ടർമാരുമാണ് തൃശൂർ പാർലമെന്റ് മണ്ഡലത്തിൽ ഉള്ളത്. കൂടുതൽ വോട്ടർമാർ ഒല്ലൂർ മണ്ഡലത്തിലാണ്- 180 പേർ. കുറവ് മണലൂരിലും - 85 പേർ. ഗുരുവായൂർ- 46, തൃശൂർ- 88, നാട്ടിക- 90, ഇരിഞ്ഞാലക്കുട - 88, പുതുക്കാട്- 151 എന്നിങ്ങനെയാണ് സർവീസ് വോട്ടർമാരുടെ കണക്ക്.

എറണാകുളം ലോക്സഭാ മണ്ഡലത്തിൽ മത്സരിക്കുന്ന സ്ഥാനാർത്ഥികളുടെ  മൂന്നാംഘട്ട ചെലവ് 
പരിശോധന നടത്തി. ചെലവ് നിരീക്ഷകൻ പ്രമോദ് കുമാറിൻ്റെ നേതൃത്വത്തിൽ എറണാകുളം ഗസ്റ്റ് ഹൗസ് മീറ്റിംഗ് ഹാളിൽ നടന്ന പരിശോധനയില്‍ സ്ഥാനാര്‍ത്ഥികളുടെ ഏജന്റുമാരും പ്രതിനിധികളും പങ്കെടുത്തു.

ചെലവ് നിരീക്ഷക വിഭാഗം ഉദ്യോഗസ്ഥര്‍ സൂക്ഷിക്കുന്ന ഷാഡോ രജിസ്റ്ററുമായി സ്ഥാനാര്‍ഥികള്‍ തയ്യാറാക്കിയ ചെലവ് രജിസ്റ്റര്‍ താരതമ്യപ്പെടുത്തുന്നതിനും പൊരുത്തക്കേടുകളുണ്ടെങ്കില്‍ ബന്ധപ്പെട്ട സ്ഥാനാര്‍ത്ഥികളെ അറിയിക്കുകയും ആവശ്യമായ നടപടികള്‍ കൈകൊള്ളുകയും ചെയ്യുന്നതിനാണ് പരിശോധന നടത്തുന്നത്. 

 ചാലക്കുടി ലോക്സഭാ മണ്ഡലത്തിൽ മത്സരിക്കുന്ന സ്ഥാനാർത്ഥികളുടെ അവസാന ഘട്ട ചെലവ് രജിസ്റ്റർ പരിശോധന ചെലവ് നിരീക്ഷകൻ അരവിന്ദ് കുമാർ സിങ്ങിന്റെ നേതൃത്വത്തിൽ ഏപ്രിൽ 24 ബുധനാഴ്ച രാവിലെ 10ന് കാക്കനാട് കളക്ടറേറ്റ് ട്രെയിനിങ് ഹാളിൽ നടക്കും.
പരിശോധനയ്ക്കായി സ്ഥാനാർത്ഥികൾ ചുമതലപ്പെടുത്തിയ ഏജന്റുമാർ ചെലവ് രജിസ്റ്ററും മറ്റ് രേഖകളും സഹിതം നിർബന്ധമായും പങ്കെടുക്കേണ്ടതാണെന്ന് എക്സ്പെൻഡിച്ചർ മോണിറ്ററിംഗ് നോഡൽ ഓഫീസർ അറിയിച്ചു.