മുൻഗണനാ കാർഡുകളുടെ വിതരണോദ്ഘാടനം ഇന്ന് (മാർച്ച് 13) മുഖ്യമന്ത്രി നിർവഹിക്കും

അർഹരായ 65000 കുടുംബങ്ങൾക്ക് കൂടി മുൻഗണനാകാർഡുകൾ അനുവദിക്കുന്നതിന്റെ സംസ്ഥാനതല വിതരണോദ്ഘാടനം ഇന്ന് (മാർച്ച് 13) ഉച്ചയ്ക്ക് ശേഷം 3ന് മുഖ്യമന്ത്രി പിണറായി വിജയൻ അയ്യങ്കാളി ഹാളിൽ നിർവ്വഹിക്കും. ഭക്ഷ്യപൊതുവിതരണ വകുപ്പ് മന്ത്രി ജി. ആർ. അനിൽ അധ്യക്ഷനാകുന്ന ചടങ്ങിൽ പൊതുവിദ്യാഭ്യാസ വകുപ്പ് മന്ത്രി വി. ശിവൻകുട്ടി വിശിഷ്ടാതിഥിയായി പങ്കെടുക്കും.

ഇതോടെ ഈ സർക്കാർ അധികാരത്തിൽ വന്ന ശേഷം ഇതുവരെ AAY(മഞ്ഞ കാർഡ്), PHH (പിങ്ക് കാർഡ്) എന്നീ മുൻഗണനാ വിഭാഗത്തിലേക്ക് തരം മാറ്റി നൽകിയ ആകെ കാർഡുകളുടെ എണ്ണം 7,16,692 തികയുകയാണ്. കേന്ദ്രസർക്കാർ മാനദണ്ഡപ്രകാരം സംസ്ഥാനത്തെ ജനസംഖ്യയിൽ 53 ശതമാനം പേരെ മാത്രമേ മുൻഗണനാപട്ടികയിൽ ഉൾപ്പെടുത്താൻ കഴിയൂ. ഇതുമൂലം അർഹരായ ഒട്ടേറെ കുടുംബങ്ങൾക്ക് മുൻഗണനാകാർഡുകൾ നൽകാൻ കഴിയാതെ വന്നിട്ടുണ്ട്. ഇത്തരക്കാർക്കായി സ്വമേധയാ മുൻഗണനാ കാർഡുകൾ ഉപേക്ഷിക്കാനുള്ള സർക്കാരിന്റെ ആഹ്വാന പ്രകാരം ലഭിച്ചതും പരിശോധനയിലൂടെ അനർഹരിൽ നിന്നും പിടിച്ചെടുത്തതും ഉൾപ്പെടെയുള്ള ഒഴിവുകളിലേക്കാണ് മുൻഗണനാപട്ടിക ശുദ്ധീകരണത്തിലൂടെ കഴിഞ്ഞ 5 വർഷങ്ങളായി കാർഡുകൾ അനുവദിച്ച് വന്നിട്ടുള്ളത്.

വിഷൻ 2031 ന്റെ ഭാഗമായി തയ്യാറാക്കിയ ഭക്ഷ്യപൊതുവിതരണ വകുപ്പിന്റെ വിഷൻ ഡോക്യുമെന്റ് ചടങ്ങിൽ മന്ത്രി ജി. ആർ. അനിൽ വി. കെ. പ്രശാന്ത് എംഎൽഎയ്ക്ക് നൽകി പ്രകാശനം ചെയ്യും. മേയർ വി. വി. രാജേഷ്, ജില്ലാ പഞ്ചായത്ത് പ്രസിഡന്റ് വി. പ്രിയദർശിനി, ഭക്ഷ്യ കമ്മീഷൻ ചെയർപേഴ്സൺ ഡോ. ജിനു സക്കറിയ ഉമ്മൻ, സപ്ലൈകോ മാനേജിംഗ് ഡയറക്ടർ ജയകൃഷ്ണൻ. വി. എം., പാളയം വാർഡ് കൗൺസിലർ ഷെർളി  എസ്, ലീഗൽ മെട്രോളജി കൺട്രോളർ റീനാ ഗോപാൽ. ആർ എന്നിവർ പങ്കെടുക്കും. ഭക്ഷ്യ വകുപ്പ് സെക്രട്ടറി എം. ഡി. രാജമാണിക്യം സ്വാഗതവും പൊതുവിതരണ ഉപഭോക്തൃകാര്യ കമ്മീഷണർ കെ. ഹിമ നന്ദിയും അറിയിക്കും.

പി.എൻ.എക്‌സ്. 1163/2026