പോളിംഗ് ഉദ്യോഗസ്ഥർക്കായി മെഗാ ക്യാമ്പ് തിങ്കളാഴ്ച (മാർച്ച് 23)

നിയമസഭാ തെരഞ്ഞെടുപ്പുമായി ബന്ധപ്പെട്ട് ഇലക്ഷൻ ഡ്യൂട്ടിക്ക് നിയോഗിക്കപ്പെട്ട ഉദ്യോഗസ്ഥർക്ക് പോസ്റ്റൽ ബാലറ്റ് ലഭ്യമാക്കുന്നതിനുള്ള മെഗാ ക്യാമ്പ് തിങ്കളാഴ്ച (മാർച്ച് 23) സംഘടിപ്പിക്കുമെന്ന് ജില്ലാ ഇലക്ഷൻ ഓഫീസറും ജില്ലാ കളക്ടറുമായ കെ. ഇമ്പശേഖർ അറിയിച്ചു.

മാർച്ച് 22 (ഞായർ) വൈകുന്നേരത്തോടെ ഉദ്യോഗസ്ഥരെ പോളിംഗ് ഡ്യൂട്ടിക്കായി നിയോഗിച്ചുള്ള ഉത്തരവ് ബന്ധപ്പെട്ട സ്ഥാപനങ്ങളുടെ ഓർഡർ സോഫ്റ്റ്‌വെയർ ലോഗിനുകളിൽ ലഭ്യമാകും. തുടർന്ന് തിങ്കളാഴ്ച രാവിലെ ഈ ഉത്തരവും അതിനോടൊപ്പം ലഭ്യമാകുന്ന ഫോം 12 അപേക്ഷയും പ്രിന്റ് എടുത്ത് ആവശ്യമായ വിവരങ്ങൾ പൂരിപ്പിച്ച്, ഇലക്ഷൻ തിരിച്ചറിയൽ കാർഡിന്റെ പകർപ്പും സഹിതം ബന്ധപ്പെട്ട പഞ്ചായത്ത്/മുനിസിപ്പാലിറ്റി ഓഫീസുകളിൽ എത്തിച്ച് പോസ്റ്റൽ ബാലറ്റിനായി അപേക്ഷ സമർപ്പിക്കാം.

രാവിലെ 10 മണി മുതൽ വൈകിട്ട് 5 മണി വരെ അതത് തദ്ദേശസ്വയംഭരണ സ്ഥാപനങ്ങളിൽ ക്യാമ്പ് നടക്കും. നിയമന ഉത്തരവ് ലഭിച്ച എല്ലാ ഉദ്യോഗസ്ഥരും ഓർഡർ സോഫ്റ്റ്‌വെയറിൽ നിന്ന് ഫോം 12 ഡൗൺലോഡ് ചെയ്ത് തങ്ങൾ ജോലി ചെയ്യുന്ന തദ്ദേശസ്വയംഭരണ സ്ഥാപനങ്ങളിൽ സമർപ്പിക്കണം.ക്യാമ്പിൽ പങ്കെടുക്കുമ്പോൾ എപ്പിക് കാർഡ്, നിയമന ഉത്തരവ്, ഫോം 12 അപേക്ഷ എന്നിവ നിർബന്ധമായും കൊണ്ടുവരണമെന്ന് അധികൃതർ അറിയിച്ചു. മാർച്ച് 23 തിങ്കളാഴ്ച മാത്രമേ ഉദ്യോഗസ്ഥർക്ക് ഈ സൗകര്യം ലഭ്യമാവുകയുള്ളൂ.