കോവിഡ് 19 ലോക്ക് ഡൗണ്‍ - സര്‍ക്കാര്‍ നിര്‍ദേശങ്ങള്‍ പാലിക്കണം: മന്ത്രി ജെ മേഴ്‌സിക്കുട്ടിയമ്മ
കോവിഡ് വ്യാപകമാകുന്ന സാഹചര്യത്തില്‍ സാമൂഹ്യമായ ഇടപെടല്‍ കുറയ്ക്കുന്നതിന് സംസ്ഥാന സര്‍ക്കാര്‍ പ്രഖ്യാപിച്ചിട്ടുള്ള ലോക്ക് ഡൗണ്‍ നടപടിയോട് പൊതുജനങ്ങള്‍ സഹകരിക്കണമെന്ന് മന്ത്രി ജെ മേഴ്‌സിക്കുട്ടിയമ്മ അറിയിച്ചു. കലക്‌ട്രേറ്റില്‍ നടന്ന കോവിഡ് 19 അവലോകന യോഗത്തിന് ശേഷം മാധ്യമ പ്രവര്‍ത്തകരോട് സംസാരിക്കുകയായിരുന്നു മന്ത്രി. സാധാരണക്കാരുടെ ജീവിതത്തെ പ്രതികൂലമായി ബാധിക്കാത്ത തരത്തിലായിരിക്കും ലോക്ക് ഡൗണ്‍ നടപ്പിലാക്കുക. അരിയും പലചരക്കും പച്ചക്കറിയും ഉള്‍പ്പെടെയുള്ള അവശ്യസാധനങ്ങളുടെ വിപണനം ഉണ്ടാകും. ജില്ലയില്‍ രാവിലെ ഏഴ് മുതല്‍ വൈകിട്ട് അഞ്ചുവരെയായിരിക്കും കടകള്‍ തുറന്നിരിക്കുക. അതുകൊണ്ട് തന്നെ കൂടുതല്‍ സാധനങ്ങള്‍ വാങ്ങിക്കൂട്ടാന്‍ ജനങ്ങള്‍ തിക്കുംതിരക്കും കൂട്ടേണ്ടതില്ല.
ജില്ലയില്‍ കോവിഡ് പോസിറ്റീവ് കേസുകള്‍ റിപ്പോര്‍ട്ട് ചെയ്തിട്ടില്ല എന്ന വിശ്വാസത്തില്‍ ജനങ്ങള്‍ തെരുവില്‍ തടിച്ചുകൂടാന്‍ ശ്രമിക്കരുത്. അനാവശ്യയാത്രകള്‍ ഒഴിവാക്കുക തന്നെവേണം. വൈകുന്നേരങ്ങളില്‍ പാര്‍ക്കുകളിലും ലൈബ്രറികളിലും പോകുന്ന ശീലം തത്കാലത്തേക്ക് ഉപേക്ഷിക്കണം. കോവിഡ് രോഗം സംബന്ധിച്ച് ജില്ലയ്ക്ക് ആശങ്കപ്പെടേണ്ട അവസ്ഥയില്ല. ജനങ്ങള്‍ ഒത്തൊരുമിച്ച് പ്രവര്‍ത്തിച്ചാല്‍ നിലവിലെ സാഹചര്യം നുമുക്ക് മുന്നോട്ട് കൊണ്ടുപോകാന്‍ സാധിക്കും.
ജില്ലയിലെ ഹാര്‍ബറുകളിലും ലാന്റിങ് സെന്ററുകളിലും മത്സ്യലേലം നിരോധിച്ചു. വലിയ തോതില്‍ മത്സ്യലേലങ്ങള്‍ നടക്കുന്ന നീണ്ടകര, ശക്തികുളങ്ങര അടക്കമുള്ള ഹാര്‍ബറുകളില്‍ നടപ്പിലാക്കിയ നിയന്ത്രണങ്ങള്‍ ലംഘിച്ചാല്‍ ഹാര്‍ബര്‍ അടച്ചിടേണ്ടിവരുമെന്നും മന്ത്രി പറഞ്ഞു.
- Log in to post comments