സ്വാമി വിവേകാനന്ദന് യുവ പ്രതിഭാ പുരസ്കാരം, മികച്ച യുവജന ക്ലബ്ബ് അവാര്ഡ്: നോമിനേഷനും അപേക്ഷയും ക്ഷണിച്ചു
കേരള സംസ്ഥാന യുവജനക്ഷേമ ബോര്ഡ് സ്വാമി വിവേകാനന്ദന് യുവ പ്രതിഭാ പുരസ്കാരത്തിനായി നിശ്ചിത ഫോറത്തില് നോമിനേഷനുകളും അഫിലിയേറ്റഡ് യൂത്ത് ക്ലബ്ബുകളില് നിന്ന് അവാര്ഡിനായി അപേക്ഷ ക്ഷണിച്ചു. വ്യക്തിഗത പുരസ്കാരത്തിനായി 18 മുതല് 40 വയസ്സ് വരെ പ്രായമുള്ള യുവജനങ്ങളെയാണ് നോമിനേറ്റ് ചെയ്യേണ്ടത്. സാമൂഹ്യപ്രവര്ത്തനം, മാധ്യമ പ്രവര്ത്തനം (പ്രിന്റ് മീഡിയ), മാധ്യമ പ്രവര്ത്തനം (ദൃശ്യമാധ്യമം), കല, സാഹിത്യം, കായികം (വനിത), കായികം (പുരുഷന്), സംരംഭകത്വം, കൃഷി എന്നീ ഒമ്പത് മേഖലകളില്നിന്നായി മികച്ച ഓരോ വ്യക്തിക്ക് വീതം ആകെ ഒമ്പത് പേര്ക്കാണ് പുരസ്കാരം നല്കുന്നത്. പുരസ്കാരത്തിനായി സ്വയം അപേക്ഷ സമര്പ്പിക്കാന് കഴിയില്ലെന്നും അതത് മേഖലകളുമായി ബന്ധപ്പെട്ട ഏതൊരാള്ക്കും മറ്റൊരാളെ നോമിനേറ്റ് ചെയ്യാമെന്നും അറിയിപ്പില് വ്യക്തമാക്കുന്നു.
പുരസ്കാരത്തിന് അര്ഹരാകുന്നവര്ക്ക് 50,000 രൂപയും പ്രശസ്തി പത്രവും ലഭിക്കും. ഇതോടൊപ്പം കേരള സംസ്ഥാന യുവജനക്ഷേമ ബോര്ഡില് അഫിലിയേറ്റ് ചെയ്തിട്ടുള്ള യൂത്ത് ക്ലബ്ബുകളില് നിന്നും അവാര്ഡിനായി അപേക്ഷ ക്ഷണിച്ചു. ഓരോ ജില്ലാതലത്തില് നിന്നും തിരഞ്ഞെടുക്കുന്ന മികച്ച ക്ലബ്ബിന് 30,000 രൂപയും പ്രശസ്തി പത്രവും പുരസ്കാരവും നല്കും. ജില്ലാതലത്തില് അവാര്ഡിന് അര്ഹത നേടിയ ക്ലബ്ബുകളെയാണ് സംസ്ഥാന തലത്തിലെ അവാര്ഡിനായി പരിഗണിക്കുക. സംസ്ഥാന അവാര്ഡ് നേടുന്ന ക്ലബ്ബിന് 50,000 രൂപയും പ്രശസ്തി പത്രവും പുരസ്കാരവും ലഭിക്കുന്നതാണ്. മാര്ഗ്ഗനിര്ദ്ദേശങ്ങളും അപേക്ഷാ ഫോറവും അതത് ജില്ലാ യുവജന കേന്ദ്രങ്ങളിലും കേരള സംസ്ഥാന യുവജനക്ഷേമ ബോര്ഡിന്റെ ജില്ലാ ഓഫീസിലും ലഭ്യമാണ്.
- Log in to post comments