നബാര്‍ഡ് കേരളയും , ജന്‍ ശിക്ഷണ്‍ സന്‍സ്ഥാന്‍ മലപ്പുറവും സംയുക്തമായി നടപ്പിലാക്കുന്ന സമഗ്ര ആദിവാസി വികസന പദ്ധതിയുടെ ഭാഗമായി " നങ്കോണം 2023 " ഗുണഭോക്താക്കളുടെ കുടുംബ സംഗമവും , ഓണാഘോഷ പരിപാടിയും നിലമ്പൂര്‍ ഒ സി കെ ഓഡിറ്റോറിയത്തില്‍ നടന്നു. 18 കോളനികളിൽ നിന്നായി 375 കുടുംബങ്ങളിലെ ആയിരത്തിൽ അധികം പേർ ഓണാഘോഷത്തിൽ പങ്കാളികളായി.

കൊണ്ടോട്ടി ബ്ലോക്ക് പഞ്ചായത്തിൽ പുതിയ പ്രസിഡന്റായി കരിപ്പൂര്‍ ഡിവിഷനില്‍ നിന്ന് തെരഞ്ഞെടുക്കപ്പെട്ട കെ. ബിന്ദു സത്യപ്രതിജ്ഞ ചെയ്തു അധികാരമേറ്റു. മുന്‍ ധാരണ പ്രകാരം വി.പി. ഷെജിനി ഉണ്ണി രാജിവെച്ച ഒഴിവിലേക്ക് ഐകകണ്‌ഠ്യേനയാണ് ബിന്ദുവിനെ തെരഞ്ഞെടുത്തത്. പ്രസിഡന്റ് സ്ഥാനം എസ്.സി വനിത സംവരണമായ ബ്ലോക്കില്‍ ആദ്യ രണ്ടര വര്‍ഷത്തെ അധ്യക്ഷ സ്ഥാനമാണ് ഷെജിനി ഉണ്ണിക്ക് നല്‍കിയിരുന്നത്. എസ്.സി വനിത മെമ്പര്‍മാരില്ലാത്തതിനാല്‍ പ്രതിപക്ഷത്തുനിന്ന് എതിര്‍ സ്ഥാനാര്‍ഥിയുണ്ടായിരുന്നില്ല.

പൂവിളികളും പൂക്കളവുമായി ഭിന്നശേഷി വിദ്യാർത്ഥികളുടെ ഓണാഘോഷം.

നിലമ്പൂർ നഗരസഭയുടെയും സമഗ്ര ശിക്ഷാ കേരളം നിലമ്പൂർ ബി.ആർ.സിയുടെയും ആഭിമുഖ്യത്തിൽ നിലമ്പൂർ ലിറ്റിൽ ഫ്ലവർ ഹയർസെക്കൻഡറി സ്കൂൾ

ഓഡിറ്റോറിയത്തിൽ നടന്ന കേരളീയം 2023 ഓണാഘോഷം നിലമ്പൂരിന്റെ ഉത്സവമായി. രാജ്യസഭാ എംപി പി.വി അബ്ദുൽ വഹാബ് കേരളീയം 2023 ഉദ്ഘാടനം ചെയ്തു.

മലപ്പുറം- മഞ്ചേരി റോഡിൽ മെഡിക്കൽ കോളേജിന് മുൻവശത്ത് കലുങ്ക്  പുതുക്കി പണിയുന്ന പ്രവൃത്തി  ആരംഭിക്കുന്നതിനാൽ സെപ്റ്റംബർ ഒന്നു മുതൽ പ്രവൃത്തി പൂർത്തീകരിക്കുന്നതു വരെ  മെഡിക്കൽ കോളേജിന് മുൻവശത്ത് ഭാഗിക ഗതാഗതം നിയന്ത്രണം ഉണ്ടായിരിക്കുമെന്ന് പൊതുമരാമത്ത് വകുപ്പ് എക്സിക്യൂട്ടീവ് എഞ്ചിനീയർ അറിയിച്ചു.

ഓണാഘോഷവുമായി ബന്ധപ്പെട്ട് ഇൻഫർമേഷൻ പബ്ലിക് റിലേഷൻസ് വകുപ്പ് പൊതുജനങ്ങൾക്കായി വീഡിയോ മത്സരം സംഘടിപ്പിക്കുന്നു. ജില്ലാതലത്തിൽ ഓണാഘോഷവുമായി ബന്ധപ്പെട്ട് മികച്ച വീഡിയോ  തയ്യാറാക്കുന്നവർക്ക് സമ്മാനം നൽകും. ഒന്നാം സമ്മാനം 5,000 രൂപയും രണ്ടാം സമ്മാനം 3,000 രൂപയും മൂന്നാം സമ്മാനം 2000 രൂപയും ആണ്. വീഡിയോകളുടെ ദൈർഘ്യം ഒരു മിനിട്ട് മുതൽ മൂന്നു മിനിട്ട് വരെ.

കാവനൂര്‍ ഗ്രാമപഞ്ചായത്ത് പരിരക്ഷ പാലിയേറ്റീവ് പദ്ധതിയിലേക്ക് പാലിയേറ്റീവ് നഴ്സിനെ നിയമിക്കുന്നു. യോഗ്യരായ ഉദ്യോഗാര്‍ഥികള്‍ വയസ്സ്, വിദ്യാഭ്യാസ യോഗ്യത, പ്രവൃത്തി പരിചയം എന്നിവ തെളിയിക്കുന്നതിനുള്ള അസ്സല്‍ സര്‍ട്ടിഫിക്കറ്റുകളും ആയതിന്റെ സ്വയം സാക്ഷ്യപ്പെടുത്തിയ പകര്‍പ്പുകളും സഹിതം സെപ്റ്റംബര്‍ രണ്ടിന്  രാവിലെ 10 മണിക്ക് കാവനൂര്‍ പി.എച്ച്.സി ഓഫീസില്‍ കൂടിക്കാഴ്ചക്ക് ഹാജരാവണം. കൂടുതല്‍ വിവരങ്ങള്‍ക്ക്: 0483 2959021 .

പട്ടാമ്പി സർക്കാർ സംസ്കൃത കോളേജിൽ കെമിസ്ട്രി വിഭാഗം ഗവേഷണ കേന്ദ്രത്തിൽ പി.എച്ച്.ഡി എനി ടൈം കാറ്റഗറിയിൽ മൂന്ന് സീറ്റുകൾ ഒഴിവുണ്ട്. യു.ജി.സി (ജെ.ആർ.എഫ്) പരീക്ഷ പാസായവരും ഗവേഷണത്തിന് യോഗ്യരുമായ വിദ്യാർത്ഥികൾ സെപ്റ്റംബര്‍ അഞ്ചിന് മുമ്പായി ആവശ്യമായ രേഖകൾ സഹിതം അപേക്ഷിക്കണം. കൂടിക്കാഴ്ച സെപ്റ്റംബര്‍ 11 ന് നടക്കും.

മങ്ക‌ട ഗവ. കോളേജിൽ ഒന്നാം സെമസ്റ്റർ ബി.എ എക്കണോമിക്സ് (എസ്.ടി, പി.ഡബ്ല്യു.ഡി), ബി.എ ഹിസ്റ്ററി (എസ്.ടി), ബി.എ ഇംഗ്ലീഷ് (എസ്.ടി, ഒ.ബി.എക്സ്, ഇ.ഡബ്ല്യു.എസ്), ബി.ബി.എ (എസ്.ടി, പി.ഡബ്ല്യു.ഡി), ബി.എസ്.സി സൈക്കോളജി (എസ്.ടി), ബി.എസ്.സി മാത്‍സ് (ഇ.ഡബ്ല്യു.എസ്, എസ്.സി, എസ്.ടി, പി.ഡബ്ല്യു.ഡി), ബി.കോം (എസ്.ടി) സംവരണ വിഭാഗങ്ങളിലായി സീറ്റുകള്‍ ഒഴിവുണ്ട്.  പ്രവേശനത്തിന് താൽപര്യമുള്ള വി‍ദ്യാ‍ർത്ഥികൾ ആവശ്യമായ സർ‌ട്ടിഫിക്കറ്റുകൾ സഹിതം സെപ്റ്റംബര്‍ അഞ്ചിന് ഉച്ചയ്ക്ക് മൂന്നിന് മുമ്പായി ഓഫീസിൽ റിപ്പോ‌ർട്ട് ചെയ്യണം.  ഫോൺ: 04933202135.

സംസ്ഥാന സര്‍ക്കാറിനു കീഴില്‍ കോഴിക്കോട് ബേപ്പൂർ നടുവട്ടത്ത് സ്ഥിതിചെയ്യുന്ന  ക്ഷീരപരിശീലന കേന്ദ്രത്തിൽ വെച്ച് ക്ഷീരകര്‍ഷകര്‍ക്കായി പരിശീലന പരിപാടികള്‍ സംഘടിപ്പിക്കുന്നു. സെപ്റ്റംബര്‍ നാല്, അഞ്ച് തീയതികളില്‍  ശുദ്ധമായ പാലുൽപാദനം എന്ന വിഷയത്തിലും സെപ്തംബര്‍ ഏഴ്, എട്ട് തീയതികളില്‍ തീറ്റപ്പുല്‍ കൃഷി എന്ന വിഷയത്തിലുമാണ് പരിശീലനം. രജിസ്ട്രേഷൻ ഫീസ് 20രൂപ. ആധാർ കാർഡിന്റെയും ബാങ്ക് പാസ്സ്ബുക്കിന്റെയും പകർപ്പുകൾ പരിശീലന സമയത്ത് ഹാജരാക്കുന്നവർക്ക് ദിനബത്ത, യാത്രാബത്ത എന്നിവ ലഭിക്കും.

പൊതുസമൂഹത്തിലും യുവതീ -യുവാക്കളിലും കൂടികൊണ്ടുവരുന്ന മദ്യത്തിന്റെയും  മയക്കുമരുന്നിന്റെയും  ഉപയോഗ ദോഷഫലങ്ങളെക്കുറിച്ച് ബോധവൽക്കരിക്കുക, ദൈനംദിന ജീവിതശൈലി രോഗങ്ങളിൽ നിന്നും പൊതുജനങ്ങളുടെ ആരോഗ്യം സംരക്ഷിക്കുക എന്നീ ലക്ഷ്യങ്ങളോട് കൂടി നെഹ്റു യുവകേന്ദ്രയുടെയും ഇസാഫ് ഫൗണ്ടേഷന്റെയും ആഭിമുഖ്യത്തിൽ   മോണിങ് സ്റ്റാർ തിരൂർ, ആംസ്ട്രോങ്ങ് തിരൂർ, ശിഹാബ് തങ്ങൾ ഹോസ്പിറ്റൽ , ടീം വാക്കേഴ്സ്, ഡൗൺ ബ്രിഡ്ജ് തിരൂർ എന്നിവരുടെ സംയുക്ത  സഹകരണത്തോടെ   ആരോഗ്യ ബോധവൽക്കരണ മിനി മാരത്തോണും ആരോഗ്യ ബോധവൽക്കരണ ക്യാമ്പയിനും സംഘടിപ്പിച്ചു.